خلال سنتين من زواجنا عانيت من مشاكل كثيرة من ريلي ومن أهل ريلي
لحد درجة اني طحت مرضيه بسببهم
وكم طردني من البيت وكم هددني بالطلاق وكم فتن علي ومايعطيني حقوقي الجنسية فترة طويله وكم زعلني ويرفع ضغطي بتصرفاته وهو يقول انه يستانس يوم يعذبني كان عفان الله سلبياته اكثر عن ايجابياته حتى في وفاة ابوي الله يرحمه ماوقف وياي اذا الواحد ماشارك اللي يحبهم في افراحهم واحزانهم شو تتوقعون اني بستفيد منه وصله خبر وفاة ابوي وانا ميته من الصياح وهو عادي عنده معلي صوت التلفزيون ويتابع ولا جنه حاس فيني بالمرة..
حالياً ومن هالأسبوع ريلي حس فيني انه معذبني وانه مقصر معاي
ويعاملني أوكيه وانا اتنمنى انه يتم دوم جيه بس اهله مثل ماهم
المهم هو معاملته لي فنانه بشكل اللي انا كنت اباه قبل يعاملني بس المشكلة اللي اواجهها اني ماقدر انسى تصرفاته لي سابقاً احسه متراكم على بعض وريلي مش النوع اللي يراضي او لو صحت يحن علي يعني احس مشاكله كلها اتذكرها
احاول اني انسى مااقدر
ساعدوني كيف انسى قساوته معاي
ولا ساعات الشيطان يوسوس لي انه مابيستحمل وبرد يعاملني مثل قبل (بوطبيع مايوز عن طبعه)
مثال:: ريلي اذا اتصل فيني مثلاً الصبح وانا مارديت عليه سواء كنت مشغوله او ماانتبهت عادي مايتصل فيني يوم ولا يومين بحكم انه دوامه بعيد عنا يترياني انا اتصل
عاد البارحة اتصل فيني مرتين ورا بعض انا استغربت قلت له خير في شي مهم
قال لا بس ليش تطنزين (قصده استغرابي تطنيز) وقال انا احاول اتغير واباج اتساعديني
ابا اساعده بس استويت جامدة صبرت عليه وايد والحين كيف انسى تصرفاته الشينه وافتح معاه صفحة يديده احس اني ماقدر
بشو تنصحوني..!؟ الحين الخلل فيني مش فيه صرت مااصدق كلامه ولا باحاسيسه مااعرف كيف اوصف لكم شعوري…
صعب انسى .. مستحيل انسى ..
اي شي ،، الزين والشين منه دايما في بالي طول سنوات اللي اعرفه …
ما اقدر انصحج لاني روحي محتاجه حد ينصحني ،، ولكن انا روحي ما با انسى …^_^
الله يوفقج ان شاء الله وتنسين الله يقوي قلبج ،، حاولي تنسين ،، هو روحه قال انا ابا اتغير ،،لا تبينين له انج مب واثقة فيه
الله يحفظكم لبعض ويحفظ لكم البنوتة الحلوة
انا وياح صعب الوحدة تنسى الاشياء الكبيرة اللي عانت منها وخصوصا من أقرب الناس لها
الحين يالغالية .. اللي عليج هو
تنسين الماضي ولا حتى ذكرينه فيه ( ترى الرياييل ما يحبون الماضي )
دام انه بادي يتغير للأحسن فهذي نعمه بحد ذاتها .. وخصوصا هو قالج اباج تساعديني
يعنى وقفي وياه ترى هو عنده النية للتغيير وحس انه ظلمج قبل او أذاج
لا تخلين الشيطان يوسولج .. بالعكس حاولي تكسبين ريلج أكثر
الحين انت في معركة انتصار بينج وبين الشيطان
كوني قوية .. ^_^
لا تخلين الماضي يكسرج
اذا كلنا بذكر الماضي .. صدقيني الجروح بترجع وبأثر هالشي في علاقتج مع ريلج
الله يديم السعادة بينكم
وادعي ولا تنسين تكثرين من الصدقة والاستغفار
ربي يحفظج
لا و هذا من ريلج يعني المفروض أفضل و أقرب انسان لج.
شوفي، دام هو احين يريد يتغير حاولي حاولي قدر المستطاع إنج تعتبرين الماضي كأنه ما صار. أدري إني طلبت المستحيل بس حاولي. اذكري الله كثير ترى هالدنيا لهو و تروح لكن الأعمال بتقعد للواحد. يعني لما إنت تعاملينه بالحسنة لما هو يعاملج بالسيئة ترى هذا إن شاء الله ربي ما يهمله و بيرفع شأنج في الدنيا و الآخرة بإذن الله. احتسبي على الله و إن شاء الله ما تشوفين شر أختي.
ادريـ صعبـ تنسين بس تناسي لين تنسين ، بتقدرين انـ شااء الله بس يبالج وقتـ لانـ الله سبحاانهـ وتعاالى
خلق فيناا نعمة النسيانـ ..
نقطهـ حلوهـ أنهـ حس في غلطتهـ ويمكن ندماانـ بس مايبا يعترف لج وهذا طبع في بعض الرياييل فـ سايريهـ
ولاتبينين لهـ انج مستغربهـ من تصرفااتهـ مشي وياهـ فـ النهاايهـ انتوا الكسبانين
ولاتحطين في بالج انها فترهـ وبيرد يمكن ماايرد .. ف توكلي وخلي ثقتج بربـ العالمين
نتمنى لج حياهـ خاليهـ من المشااكل وانـ شاء الله خير 