اشحالكم يا الامهات
بدش في الموضوع
انا اودي ولدي الحضانه ولاحضت اليهال الي بصفه اهاليهم يحطون لهم سمونتين فاضيات وحده للريوق ووحده للغدا
الصراحه كسروا خاطري
مرات ايي اشل ولدي احصلهم متيمعين حول ولدي يحاولون يالون من اكله
الصراحه يكسروون الخاطر
ياليت الامهات ينوعون الاكل لعيالهم لانه الصراحه شي يسد النفس شو سمونه فاضيه هو تعذيب ,اليهال يلعبون ويستهلكون طاقه فلازم اتحطولهم اكل يفيدهم
المهم راح اعطيكم بعض الاقتراحات للامهات العاملات والغيرعاملات
للريوق
السمونه بدل ما تخليتها فاضيه قصيها ثلاث اجزاء جزء حطي فيه لبنه مع خيار جزء حطي في زيت زيتون وزعنتر وجزء حطي فيه بيض اوملت وجزء حطي فيه جبن كيري او كاسات وجزء حطي فيه نوتيلا او حمص
عندج عجينه العشر دقائق سوي كميه تكفي شهر لفطاير صغيره وومشله ومن بينهم بيتزا
او رز بحليب
او يبي خبز التوست وشربيه بخليط البض والحليب واقليهم بملعه زبده
او سوي كب كيك بس حففي السكر
عاذي الاشياء كلها ماتاخد وقت
عندج الغدا
حطي خيار وطماطم قلقل رومي ملون+ اكل البيت بس يكون خالي من اللحوم عشان ما يخترب او يتغير طعمه
انا احط عيش برياني او معكرونه اواي اكل اسويه زاحط روب
انتو حطو اكل ولا تقولون مماياكل لا بياكل شرات ما اكل السمونه
والي عندها اضافات لا تبخل علينا
و
وماشاءالله ياكلهم
لان ولدي راح ادششوا الحضانه ها السنه ان شاء الله
اول خطوة لازم يتعود الياهل انه يتريق في البيت
اضافة الى الاشياء الي ذكرتيها :
ممكن نحط له زبادي بالفواكه كل يوم فاكهة معينة
عشان نغير روتين الروب
سلطة فواكه مقصصة وجاهزة
اصابع بسكوت مع جبن تكون جاهزة في علبة وحدة
مرة عصير ومرة حليب بنكهة و مرة ….
عالغذا افضل تكون خفايف …مب عيش و غيره من اكل البيت
مثلا خضروات مشوحة في زبدة …
دياي مشوي او لحم مفروم مشوي شكل اقراص
ممكن عيش ابيض مع خضراوات (مثل الصيني )
اسباكيتي بصلصة الطماط خفيفة وفوقها جبن
تصبيرة لين يرجع البيت …
الله يحفظ عيالنا ويصلحهم
يمكن اهلهم ماعندهم اكل اكثر من السمون اللي يسد يوعهم او معتمدين على الخدامات تحط له الخدامة سمون خالي وهي تلهط الباقي خخخخ
الله اعلم
بإذن الله اذا الله راد السنة الياية بدخل ولدي بري كيجي
حليب بنكهة وصمون صغير بحشوة كل يوم شكل مثل ماذكرتي
الغدا خيارة صغيرة وطماطم من الصغار (شيري) روب وصدر دجاج مشوي او كباب لحم او نقانق، معكرونة او عيش ابيض او عيش مع خضرة او بطاط صغير مسلوق،، اخاف المرق واللحوم اللي فيها سوائل تخترب احسن الناشف او المشوي
*
والله أذكر دخلت ولدي الحضانه وما عمري حطيت له صمون >< أصلا ما يحبه ..
عموما بقولكم شو كنت أحط له .. الحمدالله فديته الحين في المدرسه و الاكل عليهم ..
المهم ….. نظام الحضانه اللي كان فيها 3 وجبات … وجبة ريوق لانه اليهال يوصلون 6 و 6 ونص و الريوق يكون 7 ونص .. وجبه سناك يكون الساعه 10 و نص … وجبه الغدا يكون الساعه 1 ونص … و كل طفل له أدواته الخاصه اتم في الحضانه مثل كوب و صحن و خاشوقه وفرشاه ومشط و فوطه و صدريه و لبس احتياطي …
الريوق .. بيض مسلوق أو مقلي أو عيون .. الميني كورن فليكس مع علبه حليب صغيره .. لوبيا أو دنجو أو باجيلا .. نقانق مسلوقه او مقلايه .. براتا جبن .. فطاير ميني جبن أو زعتر أو لبنه أو دياي بالذره .. توست مغمص بالبيض أو توست مع جبن وطماط .. + حليب ضروووري للطفل
السناك .. بوب كورن .. بسكويت وانوع له بأشكال البسكويتات كل مره شكل والحين الاشكال على قفى من يشيل بشخصيات كرتونيه تشجع الطفل انه ياكلها .. سلطه فواكه أو اي نوع فاكهه مثل فراوله هو يحبها اقطعها واحطها بعلبه أو اناناس أو يح أو بطيخ أو عنب أو أي نوع يحبه أقطعه واحط معاه شوكه بس لو تفاح أو برتقال أو موز ما أقطعه هم يقطعونها حقه .. مكسرات .. شرايح جبن .. ذره مشوحه بالزبده و اشويه ملح و ليمون .. دانييت .. روب عادي او بنكهات فواكه .. + عصير
الغدا .. عيش بالخضروات مع ستيك دياي أو لحم .. نجتس دياي مع كتشاب و جبن … نقانق .. مكرونه أنوع له بالاشكال و مره بخضروات ومره بالقشطه ومره بجبن ومره بربيان ومره بنقانق .. سباجيتي .. فطاير .. + لبن
للعلم … أول ما أوصل ولدي للحضانه يستلموا مني الشنطه وياخذوا اللانج بوكس ويحطون الوجبات اللي تخرب في الثلاجه باللانج ماله علشان ما يخربطون بينهم وطبعا عليه اسمه .. و وقت الاكل يسخنون له الاكل بالمايكرويف و يعطونه اياه ..