كلما اربي نطرش الدريول يشتري من كافتيريا المحارة دبات عصير وكوكتيل ( من رمان وكوكتيل وافوكادو وبرتقال) ونقدمه للضيوف في الكاسات الطويلة هذا غير السحلب والحبة الحمرا
أما الأكل عبارة عن فطاير( من فطاير الخليج) مع كبه وورق عنب( صناعة منزلية) ومرات كيكات صغيرة تنباع جاهزة في محلات الحلويات.
هالمرة قلت بغير .. شفت بعض الحريم يقدمن العصير في كاسات صغيرة ( لأن اغلب الحريم ما يكملن العصير) و الأكل في صحون صغيرة تنباع في ايكيا ويقدمون فيه المكسرات اليابانية مع باتشي
هالمرة قلت بما إني من اللي بيربن في الصيف( شهر سبعة) إن شاء الله فبخلي السالفة تروبيكال أو هاواي
يعني بقدم عصير اناناس( بدرب الشغالة تسوي عصير فرش وبدور في النت على خلطات لعصير الأناناس)
وعصير الأفوكادو بسويه على شكل طبقات .. كل طبقة بينها وبين اختها برش فستق مبروش مع نص ملعقة عسل.. وبخلي الضيوف ياكلونه بالقفشة( الملعقة)
اما الحلويات فرحت باسكن روبنز وطلبت اكل تشيز كيك الفراولة من عندهم وشفت ان الفكرة سهله وناوية اطبقها هالأسبوع علشان اشوفها بتنجح ولا لأ
الطريقة هي: شرائح وسط من كيك امريكانا بالفراولة( ينباع في الجمعية) في صحن التقديم وفوقه خطوط من صلصة الفراولة وبعدها مغرفة او ثنتين من ايس كريم الفراولة والتزيين بجوز ولوز مبشور وشوي صلصة فراولة.. شفته حلو وسهل وما يباله وقت
السويت الثاني هو ايس كريم بطبقات مع البسكويت والنسكافيه
وطريقته خذيتها من النت( ويزاها الله الف خير صاحبة الموضوع اسمها هند)
2 ظرف دريم ويب+2 ظرف كريم كراميل + 2 علبة قشطة باردة( مطلعتنها من الثلاجة) + 3 ملاعق حليب بودرة + علبة حليب مبخر( نستله) ويكون بارد .. وينضرب في الخلاط وتاخذين منه ثلث الكمية وتزيدين عليها ملعقة نسكافية مع ملعقتين كاكاو بودرة وتخلطينهم… يعني الحين صار عندنا صحنين ( لون اصفر ولون بني)
واتبين بسكويت الشاي وتغمسينه في ( ماي مخلوط فيه شوي نسكافيه وشوي كاكاو بودرة) وتصفيه في صحن التقديم طبقة وبعدين طبقة من الكريمة الصفرا وبعدها طبقة بسكويت ثم طبقة من الكريمة البنية ثم البسكويت وهكذا حتى توصلين الى الكريمة الصفرا في وجه الصحن وتزينين بصلصة شوكولاته مع لوز مبشور( وتقدرين بين الطبقات تحطين لوز مبشور بيطلع حلو بعد)
اللي بسويه بحاول اصوره لكم إن شاء الله
وبجمع صور الأغراض اللي اشتريتها للبيبي ولي ومن اي مكان بعون الله
والسموحة
ملحوظة: اللي عندها افكار ثانية يا ليت تخبرنا
انت اهتمي بنفسج وشكلج وصحتج هاذي الامور السطحية او الشكليه خلي اهلج او اهل ريلج يتعبلون منه
ماشاء الله عليج الغالية…
يالله نتريا الصور
نتريا الصور وبالتوفيج
واتربين يالسلامة يارب