شو الاغراض إلي تاخذينها للمستشفى اغراض تنفعج انت و البيبي
ملابس لج يعني قمصان النوم مال النفاس واندروير في اندروير تقدرين تعقينه على طول بعد الاستخدام بتحصلينه في مذركير
فوطتج وشامبوا وصابون الفوط الصحية
مشط سشوار مكياج وعطر خفيف عشان النفسيه وريحة المستشفى اللي ما احبها 
اما البيبي
قماط البيبي الخشاشه مالت البيبي
ملابسه الداخليه البجايم ماله
بامبرز واويل وشامبو بس اتوقع هم اللي يسبحون البيبي في المستشفى
ادري اني ماعرف وايد في هالامور بس بعد البنات بيفيدونج ان شاء الله
للرفع – عدد 2 قمصان نوم قطنية اكمام طويلة (لأن المربية تحس ببرودة بسبب هبوط ضغط الجسم حتى لو ربت فالصيف) والأفضل تكون من النوع الي فيها ازرار عالصدر عسب تاخذين راحتج فالرضاعة الطبيعية،
– عالأقل 4 سراويل داخلية قطنية،
– منشفة صغيرة حقج،
– صابون وشامبو وفرشاة اسنان ويا المعجون (انا آخذ وياي الحجم الصغير الي يسدون الوحدة حتى لو مربية قيصري وبتقعد فالمستشفى اسبوع).
– مشط، توكات للشعر، ومرطب شفايف ( انا آخذ وياي فازلين) وقلم كحل عسب لو يو اهلج وربيعاتج يزورونج،
– شيلة عريضة مال الصلاة، سبحان الله يمكن حد رياييل من اهلج ييونج، ابو زوجج او اخوج او اخو ريلج ويا حرمته،
– شاحن الموبايل ( وايد مهم لأن الموبايل يفضى بسرعة بسبب كثرة المكالمات من الأهل)،
– زنوبة او شبشب لو احتجتي تدخلين الحمام وانتي بكرامة، وطبعا دايما ارضيات الحمام تكون باردة وهالشي يضر الي توها مربية،
– عباة وشيلة نظيفين تلبسينهم يوم تطلعين من المستشفى وتردين بيتكم،
– فوط صحية حجم كبير ويفضل تكون قطنية نوع " فــام " مثلا لأنها ماتسبب حساسية،
– مجلة تقرينها و تتسلين فيها ف حال نشيتي من الرقاد الفجر ومتمللة، وهالشي دوم يصير فيني وحتى النونو يكون راقد ومب فاضي لأحد..!
– كيس فاضي مال السوبرماركت حطيه فالشنطة، ينفعج يوم تحطين اغراضج المستعملة مثل السراويل الداخلية الي بتردين تغسلينهم فالبيت، هدومج الي لبستيهم، والزنوبة الي استخدمتيها…
– حاولي تاخذين لبان او علكة ، انا آخذ وياي الي بنكهة المستكة او الهيل، لأن الوحدة عقب ماتربي تقل شهيتها عن الأكل وهالشي يأثر ف ريحة الحلج، والأفضل تكون الريحة طيبة لو حد من الأهل يايين يزورونج ويسلمون عليج،
– وطبعا لاتنسين الأوراق الثبوتية الي عادة يطلبونها فالمستشفى يوم الوحدة تربي، يعني صورة من جواز سفرج وجواز سفر الزوج وصورة من عقد الزواج…
– دفتر ملاحظات صغير وقلم، سبحان الله يمكن تتذكرين شي مهم تسوينه او اغراض ناوية تشترينها عقب ماتطلعين من المستشفى والأفضل تكتبينها عسب ماتنسينها…
أغراض النونو:
– قبعة للراس،
– قماط ولحاف خارجي،
2- اوفرول، النوع الي يكون قطعة وحدة وتكون ريول النونو مسكرة،وترومين تاخذين النوعية الي فيها كم قصير او طويل حسب الشهر الي رح تربين فيه سواء كان صيف او شتا او ربيع،
-2 فنايل داخلية لون ابيض،
– قفازات صغيرة لحفظ ايدين النونو عسب مايخدش ويهه وهو يتحرك،
– مدس او شنطة مخصصة لحفظ النونو عسب تحطينه داخلها يوم تطلعين من المستشفى، وهالشنطة تحميه من البرد والغبار والجو الحار ومكيف السيارة يوم تدخلين فيها وتردين بيتكم، وطبعا لازم تكونين ملبسة النونو قبعة او قحفية عسب تحافظين على راسه الي بعده غض، وعلى اذنيه …
– كريم مرطب للأطفال، تدهنين فيها رقبته وايدينه عسب تكون ريحة النونو حلوة لأن ف اول ايامه صعب نستخدم العطور على ثيابه تجنبا للحساسية ف صدره..
وطبعا ف المستشفى يسبحون الياهل ويلبسونه حفاظات ويجهزون له المرضعة لو تأخر الحليب ف صدرج، يعني ماتحتاجين تاخذين لاصابون، ولا شامبو، ولا حفاظات ولا مراضع ولا حليب…
هذي من تجربتي الخاصة واتمنى اكون افدتج وافدت خواتي الحوامل وخاصة البجريات وربي يهون عليكم وعلي ويسهل ولاداتنا،،، آمين…