الأمور اللي اتبعهـا يوم اتصيبني هالأعراض :.: :.: 2024.

:.:

أولا الكحـه ..
أدري إن الاغلبيـه فجأه اتصيبهم الكحـه من دون سـابق انذار ..
وخاصه الصغاريـه ،، وهالشـي ايسبب لهم التعب وخاصـه حزة الرقاد ،، طول الليل كحـه وماشي ارقاد ..
بس من اليوم ورايح ،، بإذن الله الكحـه ما بتأثر على ارقادكم ولا ارقـاد كتاكيتكم الحلوين

الاغراض المطلوبـه ..

زيت السمسم
الفكس (اختياري)

تاخذون كميه بسيطه من زيت السمسم في كف اليد ،، وتمسحونها على صدركم أو صدر الشخص اللي يعاني من الكحه ..
والفكس اختياري مش ضروري ،، بس أكيد معاه المفعول بيكون أقوى واحسن واريح للمريض ..
تاخذون الفكس وتمسحونه بقاع اريولكم وتلبسون ازلاغ ..

ونوم العوافي ان شاء الله ..
صدقوني عن تجربـه ،، بترقدون عدل والكحه بتوقف وما بتخرب عليكم ارقادكم ..

:.:

ثانيا الغازات ..
أووف شو معاناة هالغازات ،، وخص الحريم عقب الربى اتصيبهن غازات واتسبب الهن آلام فظيييعه فالبطن ..
بس ان شاء الله مع اتباع هالوصفه والاستمرار عليها بإذن الله بتخف وبتخوز عنكم ..

النعناع

تاخذون كمية من ورق النعناع ،، وتنقعونه في الماي ع النار اليين ايفور ويغلي عدل ..
وتتريونه يبرد وتشربونه ،، سواء اروحه ولا مع اضافة ملعقة اصغيره عسل طبيعي عسب ايحلي الطعم ..
أو تاكلون ورق النعناع خالي وتمضغونه في أي وقت ..
النعناع يمنع حدوث الغازات فالبطن ،، وهو اقوى علاج للغازات ..

:.:

ثالثا المغص ..
أدري كل وحده مسكت بطنها الحين لوول
ما بتكلم عن آلام المغص كيف تذبح ،، بس الله ايعافيكم يارب ..

المطلوب :

الزعتر المجفف المطحون

اتحطونه في ماي ع النار ،، الين يغلي وايفور ،، واتصفون الماي ماله وتقدرون اتضيفون عسل أو سكر للتحليـه وتشربونه ..

وفي طريقة ثانيـه بعد تنفع ،، بس الطريقه الاولى احسن ..

زعتر مع زبادي ..

طبعا اتكونون غاسلين الزعتر عدل ومنظفينه ،، تخلطونه مع الزبادي وتاكلونه ..
وما من شر ان شاء الله ..

:.:

رابعا الزكام (الانفلونزا) ..
الحمدلله الحمدلله احمد ربي إن من زمان ما زكمت ،، الا جان ع الخفيف بس لأني من البدايه اسيطر ع الموضوع ..

المطلوب :

حبة البركه (الحبه السوده) ..
انا استخدم الفرش الطازه ،، ماخذينها من السعوديه طعمها وريحتها غييير عن اللي تنباع عدنا ..
حتى اشوي لينه هب يابسـه ..

تاخذين كميـة بسيطه من حبة البركـه ،، وتطحنينها بالهاون (المنحاس) ،، اشوي بس تتفتت ..
واتحطينها ابكف ايدج ،، واتمين اتشمينها وبتدخل في خشمج ،، وبتعطسين كمن عطسـه هالشي مفيد ترى ،، وكرري كمن مره وإن شاء الله مامن شر ..

وبعد عندي طريقه ثانيه اتخفف اشوي الزكام عليج خص اذا كان حاد وخشمج مسدود ..

المطلوب :

فكس

أول شي اتفورين اشوية ماي ع النار ..
واتحطينه في ملـة (طاسة) ،، واتذوبين ملعقتين فكس فالماي ،، واتغطين عمرج وتستنشقين البخار اللي ظاهر من الماي ،، تقريبا 5 دقايق الى 10 دقايق ،، وإن شاء الله بيخف عليج الزكام ،، والانسداد بيخف عليج ..

:.:

بس هذا اللي اذكره الحين ..
على فكره بنات كل الكلام اللي ذكرته عن تجربـه شخصيـه وتجربـة من حولي ..
والحمدلله النتايج حلوه وفعاله ،، والله يعطيكن الصحـه والعافيه ..

احمد ربي إني مادخلت المستشفى من سنين ومنين << عاد صاكه الميتين سنه الاخت
لأني معتمده على هالامور البيتوتيه ،، وخص اني اسيطر ع المرض من بدايته وماخليه يتفاقم عليه والجأ للدختر ،، الحمدلله ربي ..

الموضوع متعوب عليه طشونه ..
وحلال عليكن النقل ،، للإفاده ..

بس استاهل دعوة صادقـه لي في ظهر الغيـب ..
إن الله ايسر أموري وايوفقني ويحقق لي اللي اتمناه واطمح له إذا كان فيه خير لي ..
والله ايوفق الجميع يارب ..