شحالكن خواتي ؟
اليوم حبيت اتكلم عن مشكلة او موضوع معظمنا مقصرين فيه بدون ما نحس !
موضوعي عن البر بالوالدين .. قال تعالى : «وَاخْفِضْ لَهُمَا جَنَاحَ الذُّلِّ مِنَ الرَّحْمَة وَقُل رَّبِّ ارْحَمْهُمَا كَمَا رَبَّيَانِي صَغِيرًا» صدق الله العظيم
اللي ياب الموضوع على بالي اني كنت اسولف مع وحده من العيايز الله يحفظها و يطول بعمرها يارب ..
و بعد لني مفتقده اميه و ابويه واايد و متولهه عليهم و ما حسيت بقيمتهم الا بعد ما ابتعدوا عنا 
المهم كنا نسولف و من بين المواضيع كانت ترمس عن ولدها الوحيد و احس خنقتها العبره و صحت وياها !
تقول تعبت عليه و ربيته أحسن تربية و كبّرته و علمته ..
و يوم سوى حادث وطاح في المستشفى عابلته بالسنين و دافعت عنه
و يوم دخل الشرطة كنت فرحانة وايد و اتعنى اسير عنده في الدورة آخر الدنيا و اعطيه مصروفي كله من ورى الشبج و اقصر على عمري عشانه !
و يوم اتزوج بدون شوري و بدون ما احضر اعرسه ولا افرح فيه و بعد رضيت و وافقت و حطيت حرمته في عيوني ..
و الحين بعد ما كبر و استوى عنده خير واايد و ماسك منصب كبير و استوى بو عيال نساني و ما يسئل عني بالأسابيع و ما يذكرني حتى بهدية بسيطة ولا اتصال
والله تقول انا ما ابغي شي منه و بعدنيه احبه و راضيه عنه لين ما أموت بس فخاطريه يسئل عني و يطمني عليه و على عياله و أفرح بشوفتهم =(
لين هنيه انتهى حديثنا .. !
بس كلامها تم يرن في بالي و فكرت فيه واايد ..
يا ترى نحن شكثر مقصرين في حق أهالينا بدون ما نحس ؟! معقولة زعلانين علينا و حاطين بخواطرهم و نحن ما ندري ؟!
والله لو نعطيهم كنوز الدنيا ما بنوفيهم حقهم و ما نطلع من جزاهم .. كفايه انهم سبب وجودنا في هالدنيا ^_^
لازم نشكر الله سبحانه وتعالى على نعمة الوالدين لان وايد ناس يتمون أهاليهم يرجعون يوم واحد بس للدنيا عشان يعوضونهم عن القصور و يبرون فيهم !
يا ليت كل وحده تراجع فينا تراجع نفسها و تشوف عمرها في شو مقصره و تتقرب من أمها و أبوها أكثر و تستغل كل لحظة في طاعتهم و رضاهم ..
و في الختام اهديكن هذا المقطع المعبّر و اتمنى ينال على اعجابكن :
https://www.youtube.com/watch?v=Ph-3FYxVbng
اتمنى كل وحده تشوف المقطع لأنه رائع جداً و يترك أثر كبير في النفس بالرغم من بساطته .. !
:
:
دمتم في طاعة الرحمن و رضا الوالدين ^_^
بل النسبه لي انا وايد اوكي ويا اهلي وامي بالذات فديتها وايد طيبه بس ابوي دوم اتحشاه وماشوف وايد
سبحان الله الدنيا وفيها العجايب
هذا الله مباركله علشان امه راضيه عنه
وصدق انا ما نحس بقيمتهم الى بعد ما نفقدهم
اتوقعت احصل تفاعل أكبر .. !
وارزق ابناءنا برنا
الحمدلله ع تواصل دائم مع اهلي جتى لو يضايقوني بأي شيء لكني احتسب الاجر في كل اللي اسويه
مهما شو سوينا وقدمنا مابنوفيهم حقهم
اللهم اغفر لي ولوالدي وللمؤمينين والمؤمنات والمسلمين والمسلمات الأحياء منهم والأموات
ربي ارحمهما كما ربياني صغيرا
اللهم ولا تتوفاهما الا وهما راضيان عنا تمام الرضا
اللهم ألبسهم ثوب الصحة والعافيه وأعنا على برهما وطاعتهما
الله يحفظهم اجمعين
والله يهدي اخواني ويهدينا ويهدي بنات وشباب المسلمين اجمعين ويعينا على بر وطاعة الوالدين