وحشتوووووووني بعد انقطاع عنكم دام اكثر عن سنة والحين رادين لكم بكل يديد ومفيد في عالمنا الجميل المكياااااج
وايد عندي اشياء حابة اشاركم فيها اول شي حبيت اسوي سلسلة اجزاء بكل ماركات المكياج اليديدة او الجديمة الي تمتاز بجودتها العالية المقارنة بالماركات العالمية واسعارها الي تخليج تحبين الي صنعهم
طبعا انا عندي نوع من الهوس اني احب اجرب كل شي واي شي في عالم المكياج والتجميل وادرس عنهم واشوف شو عيوبهم ومميزاتهم وطبعا دايم شعارنا نفيدكم ونستفيد منكم ومن خبراتكم
اتمنى محد يعتبر الموضوع نوع من اادعاية لاني صدق حابة افيدكم يابنات ولاحد يسالني لو اعرف حد يبيعها لاني ما اعرف ولا اتاجر بالمكياج الي اجربه ويعيبني اشارك رايي فيه وياكم وحتى لو اشياء ماعيبتني بعد بشارككم رايي فيهم فبليز مابا موضوعي ينحدف لاني تعبت عليه وسلسة المواضيع الي بسويها عباؤة عن نوع من الريفيو او تقييم للماركة من ناحية سلبياتها وايجابياتها
ادري طولت بالرمسة بس اول جزء لازم شوي قرقر فيه
.gif "12 (75)")
نبدا بالمهم باسم الله
ماركة اليوم هي
ماركة ديبورا ميلاني هالماركة صناعة ايطالية حصلتها في محلات لايف ستايل ضامينها لهم هالفترة بس
بعد ماشريت البلاشر دورت عنها بالنت وباليوتيوب كله بنات ايطاليات مسوين عنها ريفيو طبعا مافهمت شي للحين ماصارت ثقافتي ايطالية ^_^
جربت البلاشرات من هالماركة وعيبتني وااااايد الصراحة الكوالتي مالهم راااائع
مركز رفع الملفات
طريقتي بالحكم على المنتج (احكم على قوة اللون في اني امسح مسحة وحدة فقط على اللون ثم امسحه مرة وحدة على ايدي من غير بيس او اساس او اي نوع منتج يساعد انه يقوي او يزيد من كثافة اللون اما بالنسبة لنعومة المنتج وسهولة الدمج استخدم اصابعي لو اندمج بسهولة مع الضغط بالصبع معناته بيريحج بالدمج بالفرشاة وبيكون اسهل
قوة اللون : قوي جدا بالنسبة للون بلاشر (انا حبيت هالشي لاني متمكنة من المكياج الحمدلله لكن لو كنتي للحين مب متمكنة من المكياج يمكن تتلعوزين بها وتحطين لون وايد على ويهج ويطلع اوفر وطبعا الادواق تختلف بين الاشخاص انا دايما ويهي شاحب ومافيه لون فواااايد احب البلاشر واحب ابرزه وما استغنى عنه وفيه بنات ما يحبون الا لون خفيف للبلاشر فكل وحده تشوف وتجرب الي يناسبها ودايم اقول الي ناسبني وحبيته ماشرط يناسبج او يعجبج استفيدي من خبرات الغير ولكن جربي قبل لاتشترين واعرفي شو الي يناسبج وشو الي تحبينه)
نوع اللون: مات من غير لمعه
ثبات اللون: ثابت جدا
دمج اللون: سهل متوسط
انسيابية اللون: ناااعم
بشتري المنتج مرة ثانية لو خلص عني: نعم واتمنى ينزلون الوان اكثر
تنوع الالوان: قليل بس من هالنوع متوفر 6 الوان من 01 لين 06 انا اشتريت 5 كان متوفر ورقم واحد مب موجود فعطوني بلاشر نفس الماركة لكن مب مات فيه لمعه برونزر تقول انه نفس درجة رقم واحد
البلاشر اييج داخله فراشي اول شي تسوينه انج تعقينهم بالزباله ولاحتى تفكرين انج تجربينهم 
وهني صور للالوان انا ماسحتنهم (سواتش) على ورقة بيضا مع مقارنة ببلاشرات ماك شي الوان قريبة من الوان ماك مكتوبة اسامي البلاشرات على الورقة الالوان الي بالنص قريبة من بعض بس طبعا شي فروق بدرجة اللون يعني الي تبا تشتري بلاشرات من ماك وما تبي تخسر وايد بيزات تشتري ماركات ثانية قريبة من ماك بالكواليتي ودرجة اللون
مركز رفع الملفات
مركز رفع الملفات
شو الي ماحبيته بهالبلاشرات
1- الفرشاه على طول عقيهن المفروض مايحطون فراشي بالبلاشر لانها ماتنفع لانها تكون صغار وهالشي بيركز لج اللون وما بيساعدج بالدمج وتوزيع اللون بطريقة صح
2- البوكس ماله ما عيبني احسه يبين الماركة مال بوعبود مثلا ان واي اكس صح ماركة اسعارها معقولة لكن بوكساتها الباكيجينج اقصد راقي ويبين انها ماركة حق الاستخدام البروفيشنال والصحيح (مثلا مايحطون فراشي ولون الباكيج اسود رسمي) ادري هالنقطة سخيفة لكن مهمه يعني لو الي تشتغل هناك ما قالت لي جربي هيول البلاشرات ماكنت بتطالع الماركة اصلا فهالاشياء تشد الانتباه يوم يكون شكل البوكس كوالتي عالاقل بتجربين المنتج ويوم يكون شكله مال بوعبود ماراح اتعبين روحج واتجربينه
بالنسبة للايشادوات من هالماركة ماعرف كم اسعارهم لكن يوم جربت التيستر الكوالتي كانت اوك والالوان بعد قوية لكن مب ثابته يعني يوم امسحها بايدي اكثر عن 50% من اللون يخوز وهالشي بالنسبة لي ما يعتبر ثابت وايد يشبه اي شادوات بريستيج يمكن اشتري كمن اي شادو وبستخدمه كدروس جدامكم اما الاساس فماجربته فما اقدر احكم عليه
خلصنا ان شاءالله تستفادون من الموضوع ودعوة بالغيب تكفيني
والي عندها استفسار او سؤال عن ماركة معينة تخبرني بسوي موضوع عنها
حلــو شــرحج وواضــح
انـا للحيــن جـربــت كــم لــون مــن الارواج الثابتــة اللــي فــي هالمــاركــة
وصــدق الالــوان حلــوة و اتــم ثابتــه
موضـوعــج روعــه و يستــاهـل التميــز ^_^
يعطيج الف عافيه وان شاء الله بكون متابعة لموااضيعج
*وينج من زمان تولهت على مواضيعج
فعلا الماركه هاي فيها أشيا حلوه واشيا نص نص
البلاشرات عيبتني بس فعلا الباكينج مب لين هناك واقل ضربه او طيحه على طول ينكسر
بعض الارواج اللي جربتها ألوانها حلوه وثابته
شوقتيني الا جرب هلمــاركه ^^
الى الامام اختي جزاج الله خير ^^