اليوم بنكمل سلسلة أفضل المنتجات من الماركات وبنتكلم اليوم عن البودرة
بشكل عام البودرة ما تحتاج متطلبات كثيرة عشان تكون قابلة للاستخدام وسهله ومريحة والمهم انج تعرفين تستخدمينها صح
اول شي تصحيح لمعلوماتكم البودرة لا يمكن ان تستخدم على البشرة مباشرة وحاولي كثر ما تقدرين تبتعدين عن هالشي لانه البودرة راح تنشف ويهج واذا عندج جفاف (ومنو الحين ما عنده جفاف بالبشرة) راح تبرز هالمشكلة وتبين ويهج مشقق ومقطع
والاستخدام الانسب للبشرة يكون تثبيتا للاساس
واذا تبينها بشكل يومي جربي تحطين سن بلوك واقي شمس وخليه شوي ينشف على ويهج وعقب بالفرشاه حطي شوية من بدرتج الفضلة عشان تغطي شوي من عيوب البشرة ويكون بشكل يومي
أما أفضل المارككات للبودرات فكانت بالنسبة لي الي بالصورة
1- ماك
احب واحسن وانسب البودرات والي يازت لي هي ماك
عندج الكومباك بودر تغطيتها متوسطة وناعمة
مينيرالايزد سكن فينش هذي روووووعة والمنتج المفضل عندي واااايد ناااااعمة وتغطيتها متوسطة الى خفيفة لكن الفينيشينغ مالها رهيييييييب مخملي بشكل طبيعي ما يبين انج حاطة شي عويهج
و فيكس بلاس فاونديشن بودرة اما هذي فتغطيتها روووعة من متوسطة إلى تغطية كاملة هي عبارة عن فوانديشن على شكل بودرة
2- برستيج
وااايد ناعمة وخفيفة على الويه هي عبارة عن فاونديشن على شكل بودرة تغطيتها متوسطة ممكن تستخدم مائي وجاف وانا افضل جاف
3- بن ناي
وهاي مشهورة تغطيتها وااااو متوسطة إلى كاملة وممكن تستخدم مائي وجاف وانا افضل الجاف المائي يبرز مشاكل البشرة الجافة وانا بشرتي جافة وما ايوز لي وايد اما اذا بشرتج دهنية فوايد بترتاحين على هذي
4- لوريال
ناعمة وخفيفة تغطية خفيفة الى متوسطة
من انعم البودرات الي جربتها
5- فورايفر 52 واوفيس البودرات القديمة الي بعلبة سودا
من افضل الماركات عندي
تغطيتها متوسطة إلى ثقيلة ناعمة بس مب شرات ماك والا لوريال
شي البودرة اليديدة من فورايفر 52 الي بعلبة فضية مول مول مول مب شي لاحد ياخذها سم
6- ايلف
وافضل شي من بودرات ايلف الي كومبليكس كوريكتر
وهي عبارة عن بودرة ناااعمة جدا من غير اي تغطية لها الوان خفييييييييييييفة جدا تمسحين الفرشاه فيها كلها وتثبتين الفاونديشن بهالبودرة
تناسب جميل الوان البشرة وتضبط تصبغات البشرة
واايد حبيتها وناسبت استخدامي لاني لما احط المكياج اركز على الفاونديشن والكونسيلر والبودرة بالنسبة لي هي تثبيت للفاونديشن والكونتور
أما الماركات الأخرى الي حبيتها بس مابجودة الماركات المذكورة اعلاه فكانت الي بالصورة
ديبورا وبرجواه وايلف (البودرات الكومباكت والترازلوسينت) وميبيلين وريميل
تقريبا نفس ككواليتي التغطية والنعومة
ريميل ناعمة اكثر وميبيلين بعد ناعمة بس ما ناسبتني الدرجة من جذا ما استخدمهم وما حبيتهم وايد
اما الماركات الي كرهتهم وانصح الكل يبتعد عنهم هم
كيريولاين المائية واضحة بالصورة
وفيروتشي
واوفيس الي بعلبة فضية
كيريولاين تغطية زفته مول مالها تغطية استخدامها فقط مائي لكن شتان بينها وبين بن ناي أو فورايفر 52 المائية
وبهذا نكون خلصنا البودرات المضغوطة والحين دور اللوز بودر
أفضل المنتجات الي جربتها هي
ماك
جيفنشي
بن ناي (مميز وينفع للأجواء الحارة مصنوع مخصص ليمتص الرطوبة فوايد يفيدنا بجونا ويحفظ لج الفاونديشن من انه يسيح)
ايلف حلو الترانسلوسنت سيتينغ باودر
ولوريال
ومثل ما قلت لكم الباودر ينحط بكميات قليلة جدا بتثبيت الفاونديشن وحاولوا تبتعدون عن استخدامه المباشر على البشرة عشان ما ينشف ويهج أو يبرز مشكلة البشرة الجافة
للي حابة مزيد من اللوكات وكل ما يخص الموضة والجمال وأورع الوصفات تتابعني على الانستغرام beautyandfood11
وسلامتكم
اعتقد اغلب البنات يفضلون بودرة ماك
طبعا عندي ماك بالدرجه الاولى ولاحظت بودره ميبيلين اليديده تغطيتها نفس ماك تقريبا
المشاركة الأصلية كتبت بواسطة m3andah 
اعتقد اغلب البنات يفضلون بودرة ماك
صح لانها حلووة
المشاركة الأصلية كتبت بواسطة ماحد شراتي طبعا عندي ماك بالدرجه الاولى ولاحظت بودره ميبيلين اليديده تغطيتها نفس ماك تقريبا
ميبيلين حلوة بس بعده فينيشنغ ماك افضل
وشكرا على مشاركتج حبيبيتي والله يعافيج ^_^
