الحبه الحمرا 2024.

مرحبا الغاليات بغيت منكن طريقة الحبه الحمرا الي سونها حق المربي

لان حرمه أخويه ربت وجابت احلى بنوته فبغيت اسويلها

يلا بغيت فزعتكن

السلام عليكم
اول شي حطي 3 فناجين حبة حمرا في مااااي وخليه علىصووب
وحمري كوبين طحين على النار لين يصير لونه احمر
بعدين انخليه ورجعيه فالجدر وحطي علي سكر (حلى حسب الحلا اللي تبينه)
و4 ملاعق بهارات عربيه(يفضل بهارات اللي يسونها خاصه للمربيات)

وحركيه يوم بتحسين انه قام يلصق فالجدر حطي علية الحبة الحمرا اللي محطايه ويا الماي (بتحسين انها شربت كل الماي) وغرشتين ماي وحركيه لين يذوب

وحطي عليه سمن البلاد

وشوفي كثافته اذا وايد غليض زيديه ماي

وهني وعافيه وصحه على قلبكم

ااغسلي فنجان من الحبة الحمراء .. وحطيها في اربع اكواب ماي مع البهارات( فلفل اسود .. جرفة.. سنود (كمون) ) في ناس تحط اي بهارات ثانية مثلا مسمار .. الخ) وخليها تغلي … يوم بتنتفخ الحبة حطي الكمية اللي تبغينها من السكر ويفضل السكر الاحمر ( شرات الكسر او القطع الكبار) او السكر العادي…. اللين ما يذوب السكر وحطي السمن وخلية اشويه على النار وبندي عنه وحطية في الدلة
ملاحظه… يفضل زيادة كمية الجرفة لانها مساعد في التنظيف

اغلي ماء تقريبا اربع اكواب ثم اضيفي ملعقتين من الحلبه وقليل من الزعفران والهيل والقرفه والفلفل الاسود والكركم وخليه يغلي ثم اضيفي فنجان من الحبه الحمرا والسكر وخليه يغلي ثم غلضي قوامه باضافه قليل من النشا المذاب في الماء

مشكورات خواتي

الله شهيتوني الصراحة بالحبة الحمرا .. جني باجر إلا بتصل وبخلي عمتي أم ريلي اتسويلي.. فديتها كل ما أربي اتسويلي جدر اشكبره ..

الحين انا يالسه اشربهاااا

بس الصراحه انا غير اسويهاا

اول مره اعرف انهم يحطون طحين

انا الصراحه احد قياس كوبين ماي وقوطي بو قوس
وخليهم الين يفورون ويا بعض
وبعدين احط زنجبيل مطحون وحلبه وحبه حمرا وقرفه ومسمار وفلفل اسود وعسل وسمن
كله ورا بعض وخليه يفور مره ثانيه

وخلاص