بكتب لكم قصتي وتجاربي والنتيجة اللي توصلت لها…
انا تزوجت زواج تقليدي بحت يعني لا اعرف ريلي ولا اعرف عنه اي شي
عقب الزواج ب كم شهر عمتي ام ريلي قالت لي روحي اكشفي على عمرج ليش ما حملتي للحين
رحت عند الدكتورة هديل ف مستشفى زليخه فرع دبي
تعاملها رهيب قسم بالله
حبيتها
ويوم رحت اكشف عندها طلع عندي تكيسات
والحمدلله تعالجت وعطتني حبوب كلوكوفاج
وعقب كمن شهر ولله الحمد رراحن التكيسات بس قالت عندي ضعف فالمبايض
ومن اول يوم فالدورة رحت لها وعطتني حبوب وابرة
بس ما اذكر اسم الحبوب
المهم لين 14 يوم من الدورة رحت وقالت المبايض عندج نشيطة جدا
واحتمال على طول تحملين
وجي لين الشهر اللي عقبه يتني الدورة واحبطتني
المهم رديت عند الدكتورة
قالت غريبة
انتي ما عندج شي
المهم تميت جي كمن شهر ما رديت للدكتورة
ياني وسواس قلت يمكن ريلي فيه شي
قلت كيف اقوله
فكرت وجي
والحمدلله طرينا سالفة الحمل
ويبت له سالفة انه نروح كلنا نفحص ويا بعض
رحت عند عيادة العائلة الطبي
وفحصنا وجي
وطلع عنده ضعف شديد فالحيوانات المنوية
نصحتنا نروح عند الدكتور حسن ف العياده اللي عدال عيادة العائلة
هو تخصصه جلدية وعقم
رحنا وشاف التقرير
وعطى ريلي علاج لمدة 3 اشهر وقاله تعال
ونصحني بالاكل البحري والعسل
بس ريلي للاسف ويا العسل عدواه
المهم عقب 3 اشهر رحنا
والنتيجة نفسها ما تغيرت للاسف
والحمدلله على كل حال
نصحنا نروح ممستشفى دبي للاخصاب
رحنا ودخلت عند الدكتورة سعاد
ما شاء الله تعاملها روعه
كشفت علي وقالت عندي تكيسات خفيفه
شكلها ردت لاني ودرت علاج كم شهر
المهم خبرتها عن ريلي وراويتها التقاررير
قالت لي لازم ريلي يشوف الدكتور اول شي
وراح دخل عنده ورد يسويله تحاليل من البداية
قاله انه لازم يودر تدخين
وانه باذن الله بيسويله خزعه عشان نسوي اما اطفال انابيب او حقن مجهري
هالكلام من 4 شهور تقريبا
المهم نحنا قلنا بناجل الموضوع شوي لين نرتب وضعنا المالي وجي
من يومين شفت انه الحجامة زينه لهالمواضيع ويا القسط طبعا
خبرته وقال بيروح يسوي حجامه
وان شاء الله خير
والحجامة اذا ما فادت تراها ما بتضر
والحمدلله على كل حال
عاد الحين اترياه يعزم يروح الحجامه
ودعواتكم سيدات المنتدى
الله يرزقني الذرية الصالحه
والحمدلله احسن اني متفائلة
وهاي قصتي ولين الحين كملت سنة ونص من زواجنا
وايضا ويا زوجي بسوي حجامة عشان التكيسات وعشان التنشيط
بس بغيت اسالكم اذا ادلون مكان يسوي حجامة في الفجيره
انا ما أثق الا في دكتور واحد للحجامة .. الدكتور علي الحمادي .. رئيس المركز الوطني للطب الحديث بالشارقه وعندهم عيادة خاصة للنساء