هذي اول مرة اكتب مشكلتي هني
لاني تعبت من التفكير ، الحمدالله مشكلتي مب صعبه مثل ما اشوف في القسم مشاكل اكثر تعقيداً
لكن الانسان احيانا يحتاج للارشاد و النصح عشان مايتهور
بقولكم مشكلتي
انا حاليا لي سنة تقريبا اشتغل بشركة خاصة
و الحمدالله الوظيفة مناسبة ، لكن كانت مشكلتي الراتب
في البداية كان المدير وايد يحترمنا ، و يسوي قرارات تناسبنا
لدرجة وثق فيني وقالي ابي اوظف بنات مثلج فلو عندج معارف ييبيهم
ويبت اختي ووحده قريبتي ….المهم بعد 5 شهور بدأت اتضايق من شغله الكل لاحظها
ان المدير مب عند كلمته كل شوي يسوي قرار يديد ويصعب الامور علينا
وكل ماتكلمنا زاد العن والعن يتلسف لدرجة يسكتنا ومايخلينا نقول اللي عندنا
واذا توظفوا ناس يدد يقوم يعطيهم كل الاولويات وحتى الرواتب يرفعها لهم
و هذا اللي رفع ضغطي اكثرر ، الحمدالله انا انسانة مؤمنة انه الله كاتب لنا الرزق من غير مانحتسب
لكن هل لو طلعت من الشغل ، ربي بيغضب علي ؟
لانه سمعت انه الانسان لما يقطع رزقه بنفسه ، مايلاقي له رزق ثاني
يعني ربيعاتي يقولون الافضل هم يطلعونج ولا انتي تطلعين من نفسج
فانتم شو رايكم لاني صدق كارهة المدير بشكل ماتتخيلونه ، و ازيدكم انه انسان مب متعلم فلما
نكلمه بطريقة راقية يفكر انه نحن متعالين عليه لانه كملنا دراستنا عدل وجذي
اتمنى تفيدوني خواتي
ماعرفت شو مشكلتج … الواحد يخدم وطنه اول شي ويريح نفسه انه يداوم بضمير ويستلم راتبه بالحلال خلاص شو تبين من صدعه الراس خليج بشغلج وركزي بنفسج بس
ماعليج هاي ترقت وهاي تفنشت الارزاق بيد الله وكلن ياخذ نصيبه وصدقيني مصيرج ورزقج بتاخذينه لاتترين من حد رب العالمين هو المسهل والله يسهل عليج وبعدين مديركم والمدير طبيعي
كل يوم له قرار يا يغيره او يتفلسف فيه شيه المدرا ء وانتي اهم شي تخلصين شغلج … اما اسلوب المدير او اخلاقه او تناقض بشخصيته هاذي امور اعتقد راجعه له نفسه محد يدخل او يقدر يغير هالشي
وإذا حابه تتفنشين عادي ترى مب حرام يمكن وحده تاخذ مكانج محتاجه وتاخذين اجر ,,, بس نحن بوقت صعب تحصلين وظيفه فصعبه شوي فكري وراجعي نفسج
و تجوفين راحتج بالاستقاله .. استقيلي ..
لان اهم شي راحه النفسيه ..
شرط تضمنين وظيفه ثانية بالاول عقب قدمي استقالتج
لا تضيعين ع نفسج وتستقيلين من غير وظيفه ثانية مضمونه
كملي ف دوامج و حاولي تقدمين على وظيفة ثانية أحسن
الله يسهل أمرج
بس اذا كانت نيته التكبر يعني اي مكان بياخذني يمكن يندم على هذا الشي
بس في ناس كثيره يوم مايرتاحون من الشغل يطلعون منه
خاصه اذا انتي متمكنه وعارفه تقدرين تشتغلين وعندك قدرات عادي مافيها شي تقدمين الاستقاله وترتاحين في البيت لييييييييين ماتحصلين شغل
احسن عادي
يعني ماحد ينجبر على شغل مايريده
او مثل ماقالت وحده من الاخوات دوري شغل ويوم تلاقين قدمي الاستقاله
بس
ام موضوع هم يفتشونك احسن من انك تستقيلين هذا غلط لانه يعتمد على الظروف
يمكن شخص ابدا مب مرتاح وفي عليه مشاكل ليييييييش يظل!!!
بس طبعا كل شغل في مشاكل فلازم تحاولون تحلون المشاكل واذا ماقدرتي ممكن تقدمين الاستقاله وزقك على الله
اما اذا مرتاحه للشغل بس موضوع الراتب صبري وشوفي كيف
وبعد في شي المدير المتعلم مشكله يمكن هو على قده احسن لكم
لو مسؤول من الكبار مابيعطيكم حتى راتب زين عشان هو يشوف عمره اكبر بكثيييييييييييييييير وشغلكم مايسوى له
صدقيني