ليش اكتبه لان ما عندي حد اخبره و اصارحه بالموضوع ؟
لان اخس شي في المشاكل هي مصارحة الاهل او الاقارب بالمشاكل
https://forum.uaewomen.net/showthread…ظ…-ظ„ظٹ-ظˆ-ظٹظˆظ…-ط¹ظ„ظٹ
و لان وايد بنات راسلوني ان عندهم مشكلة الخيانة وما يعرفون كيف يتصرفون؟
و كيف اني عشت نهاية جميلة؟
ترى نحن نختار النهاية !
المراة تقدر تختار نهايتها مش الرجل ؟
المهم ندخل في تفاصيل اليوم
معظم او كل المتزوجين
يظنون ان يمكنهم الخيانة بكل سهولة
لكنهم نسوا تماماً أن بإمكان المراة الخيانة بصورة اسرع و اسهل من الرجل
بالعكس المرأة المتزوجة تقدر تخون بكل سهولة
و تحدثت بصورة واضحة و مباشرة لزوجي
تعتقد اني لا استطيع خيانتك ؟؟؟؟؟؟
تدري اني اقدر اخذ اجازة من دوامي و اروح اخون ع راحتي ؟
عبالك ما اقدر اخونك ؟
عبالك محد يغازلني في الشارع ولا اسمع غزل
عبالك ما اقدر اغازل ولا اقدر اسوي شي ؟؟
عبالك يعني لاني ام و عندي عيال محد بيشوفني من الشباب
اقدر و نص
و اقدر و اقدر اكثر منك
و اقدر اختار و انقي ع راحتي
لكني مش بس لاني اخاف من رب العالمين
لاني متزوجة خلاص اصلا عيني ما تتجرأ تفكر في الخيانة
و لان كفاية علي رجل واحد ما بتحمل نفرين يصدعون راسي 
كلام يمكن ما كان في وقته؟؟؟
و لكن عشان يعرف أني اقدر اخون بدون لا يحس
بس انا معدني غير و بنت اصول
سألني شو اللي يصلح الموضوع
و رديت عليه : الكوب لما ينكسر صعب تصلحه 
ظنيت بحصل كف محترم او عتب
لكنه اكتفى بالسكوت المطبق 
بعد المحادثة بأيام لاحظت انه تغير للاحسن و بدى يتلزق
كانهم الاسبان يحبون الحرمة المطلوبة ؟ المرغوبة ؟
و بديت اهتم فيه اكثر من السابق
في نفس الفترة
وردني اتصال كالعادة ع مكتبي
و كعادتي ارد على الاتصالات بسرعه بحكم عملي
بدى علي الذهول و الصدمة و السكوت المطلق
الاتصال كان في فترة غير مناسبة في حياتي خاصة الزوجية
و غير وايد اشياء فيني
بالعكس الاتصال كان في وقته
خلاني انسى طعم الخيانة و اشوف الدنيا من منظور ايجابي
بعد سنين طويلة من الفراق
اتصل فيني لأول مرة
كأنه حس ان قلبي تكسر
كلمني بكل احترام و تقدير و سأل عن احوالي
و انا ارد فقط ما قدرت اسأل او اتكلم او اقول شي كأنه الصدمة ما راحت مني
اكد لي انه اتصل باختي الكبيرة و و كان يسأل عني في وقت ولادتي
و خبرته اختي اني ربيت و الله رزقني بالولد
ما اتذكر ان اختي خبرتني بالموضوع لكني لما واجهتها لاحقا ؟؟؟
اعترفت لي بالموضوع و انها مش حابة تذكرني بالماضي عشان جذى ما خبرتني
اللي شغل تفكيري و هو يسرد لي عن نفسه عن مرض زوجته
عندها الخبيث بعيد عنكم و كان في اشد الحزن و الاسى عليها
و انها تتعالج
و معظم الكمالمة كانت عنها !
و لمح لي التقي معاه في السنين اللاحقة لو الله كتب لنا عمر طويل
طبعا نهيت الموضوع بالدعاء لها بالصحة و الشفاء
و اعتذرت عن المكالمة نظرا لتواجدي في مقر عملي و انشغالي
بعد المكالمة نسيت كل شي و تذكرتها و
دعيت لها بالصحة و تكون مع اطفالها ان شاء الله
و كأن المكالمة نستني كل شي زعلني
و دعيت ربي يحفظني و يخلي لي نونوتي الغالي و يحفظ زوجي من الامراض
و يحفظ الجميع من كل شر و مرض
رجعت بيتي و نسيت سالفة خيانة ال …………
لاني تذكرت ان عندي شي اعظم من ها الرجل
هو الصحة و الابناء و الوالدين
——————————————————
و بعد عدة ايام
دق براسي
افتش تلفونه القديم " ما يستخدمه"
لاحظت مسج واحد غريب ما ينفهم قبل 6 شهور
يعني بعد 3 سنوات و نص من زواجنا !!!
و كلمات غريبة بين شابين و انهم حابين يتقابلون في مكان ما ؟؟
كان بينه و بين شاب ثاني بلهجتنا المحلية
و جيكت ع السريع ما لقيت اي شي ثاني
و يوم قررت ابحث في قوقل انصدمت بمعاني الكلمات
هي الكلمات تتعلق بالشواذ
و دخلت في عالمهم الخاص
و توغلت في قوقل في صور و سوالف ما اقدر اتذكرها
لاني كلما اتذكرها احس بلوعة و بستفرغ من القذارة
حاولت افهم الموضوع و افهم المسج
كأن المسج اندونيسية كاتبتنه 
ما ينفهم ابدا
و هني بدت الطامة الكبرى
كانها صفعة يديدة
بديت احلل و استرجع
معقولة ؟
لا مش معقولة
لا مستحيل
طيب يمكن
حاولت اتذكر ها ال 4 سنين شو سويت فيهم ؟
و لاحظت بعض الاعراض اللي ممكن تنطبق عليه ؟
بديت احلل و استخدم كل شي درسته في ها التحليل ؟
لكن خل شي خليته نظري ؟
لين ما القى الدليل القاطع
انا ما بحاسبه ع الماضي لكن بحاسبه ع الحاضر ؟؟؟
سمعت من بنت عمي تقول ان في دوام زوجها تصير ها الامور
معقولة عاد ؟ يعني انا بلحق ع شو ولا شو ؟
قبل المواجهة
قررت اسوي سيرج في القوانين الاماراتية للطلاق
لو طلبت الطلاق للضرر بسبب الشذوذ هل ستنصفني المحكمة؟
كنت افكر الجأ لمستشار اسري و هو خليفة المحرزي
و افضل يكون رجل حتى يعطيني افضل نصيحة
لكني تراجعت مبدئيا حتى اتاكد من صحة الموضوع
لان الموضوع جدا خطير و يمس بسمعة انسان
و ع طول بدت المواجهة الحادة؟
غلطتني اني واجهت ؟؟؟
المفروض ادور و ابحث و اتأكد و يكون لدي ادلة اكبر
لان التلفون قديم و تاريخ المسج قديم جدا
و احتمال كبير كعادته المعتادة
خاصة انه صندوق التسليف ( لانه يعطي و يوزع اغراضه لكل اخوانه و اهله و ربعه )
اعترف بأنه عطى التلفون ل ابن عمه وهو زميله في العمل ايضا
و المسج لا يتعلق به بتاتا ع حسب كلامه
بل لامني كيف تجرات و فكرت انه من ها النوعية وهو متربي تربية عدله ؟
الله و التربية
مرة مع بنت شوارع
و مرة مع شاب و مسج وصخ ( احتمال )
المشكلة انه تربى في اسرة متلزمة 100 % و متدينه
و والده ملتزم و انسان له وزنه و دينه و صيته
ياخي انا ما طلعت من بيت ملتزمين بس ما سويت ها السوايا كلها ؟
المهم انا سكتت عن الموضوع
و بيني بينكم بكون صريحة طبعا ما بصدقه !
وما كلمته نهائيا
وهو صار له عدة ايام يتلزق فيني و يراضيني و يقنعني اني غلطانة بتفكيري ؟
و بعد عدة ايام قررت اغير خطتي
توجهت له و اعتذرت منه رسميا و بصورة واضحة
مع تأسفي و ندمي على شكي
و عزمته ع مطعم
و هو دفع الفاتورة كعادته
و هاي كانت بدايتي !!
لأني قررت اني افتش اكثر و اكثر حول هذا الموضوع فقط
كيف اراقب ما ادري ؟ يمكن كيمرة مسجل
لو كان الموضوع حقيقي
طبعا حياتي بتتصكر للابد بدون رجعة مع اني مب مستوعبة الموضوع بكبره
و لو كان غير حقيقي ف لله الحمد و المنه
الموضوع اكبر من الخيانة مع فتاة او امرأة
الموضوع فيه شذوذ و حتى يمكن يصل للفراش
اكيد ما بسكت عن الموضوع ابدا لانه شي ما يستهان فيه
طيب بنقول طبيعي الرجل يغازل او يعاكس امرأة و الشيطان شاطر و و و
لكن رجل يحب رجل حب ……….. اسمحوا لي عاد
لين هني و بس
لو طلع الموضوع صدقي
بتلقوني ضاربتنه ضرب عسب يصلب عوده و فاره قشه برى البيت
و بتلقون الخبر في الجرايد
و للموضوع بقيـــــــــة ……………
اقول لهم
ابتعدوا عن المواجهة لحين ما تتأكدون من كل شي بنسبة 100 % ومع كامل الادلة و البراهين
مع ان ادله الخيانة تكون واضحة جدا
سواء بمسجات او بفواتير او بمكالمات او بكثرة السهر او بكثرة التلفونات او وجود هدايا نسائية عند الزوج للعشيقة او بشقة مسجلة باسمه …….الخ يعني كذا دليل
لكن سالفة الشذوذ و الشك فيه محتاج ادله واضحة وضوح الشمس و قوية
لانها ممكن تخرب و ادمر حياة انسان
الله يعينج انتي روحج مب مترقعة و مب ناقصة صدعة راس
موضوع صارله سنين ع قولتج ليش تنبشين وادورينه وتواجهينه بعد احس احراج واصلا نظرتج له بتتغير
الله يكون بعونا احنا الحريم
لا تتبعين خطوات الشيطان.. الله نهانا عن التجسس
بالنسبة للموضوع اللي انتي شاكة فيه منتشر بشكل فظيع والعياذ بالله
فأكثر الشباب قبل الزواج اللي عندهم هذا الموضوع بمجرد زواجهم ينتهي والقلة يستمرون
المهم يبتعد عن (ولد عمه) واي حد فيه هذي الصفة عشان لو كان صدق من ماضيه.. مايحن لهذا الماضي الأسود
وقفي تفتيش..
والشيطان الثاني اللي اتصل عليج وانتي على ذمة ريال لاتعطينه مجال حتى لو كلام بس
الله فوق ينظر لج..