الفضل لله أولا ً و آخرًا على تسهيل ولادتي =) 2024.

وهاي سالفتي ..

الله يسلمكم يوم الأحد 24-1 فالليل ع الساعه 1 كنت أسولف ويا بنات تجمع 1 و 2 و 3 فديتهم

وكان فيني ويع بسيييط فظهري يروح ويرد كل ربع ساعه >>> ماسكة الساعه و أحسب

نفس ألم الدورة

قلت ما بيلس أوسوس لان طول التاسع كان اييني منان و آخر شي يروح ..

بس هالألم استمر حتى ما رمت أرقد

احاول واحاول واحاول .. رقدت ساعه يمكن و نشيت ع الويع وانا أتأوه ( يعني أقول آه )
حتى ريلي نش على صوتي

كانت الساعه 5 إلا ربع الفير ..

و أول ما نشيت وانا ع السرير حسيت شي ينزل جان اقول حق ريلي نزل المااااي يالله ع المستشفى

اتصل فعمتي و حميتي عشان ايوون ويانا لان عمتي مخبرتنا قبل اذا فيني ويع نقولها ..

وسرنا طوارئ الوصل .. وفحصتني الدكتورة قالت 1 و نص ..

دخلوني حجرة مشتركة وتميت فيها لييين الظهر وانا اتويع و اصيح وكل مايفحصوني نفس الشي واذا زاد يفتح نص سانتي زيادة ! هالشي وايد تعب لي نفسيتي

كنت أقول على هالويع لين احين ما فتح !

والدكتورة يوم فحصتني سوت لي تحفيز وانا كنت اصيح قالت لي لا تصيحين هاي البداية توج >> حلو يوم حد يحمسج هههههه

المهم

جهاز التخطيط كان طول الوقت شغّال .. كان شي طلق بس مب منتظم

ريلي كان عندي يقرا علي وانا مستمرة فالقراية و الأذكار ما فارقت لساني طول فترة الحمل الحمدلله

عقب حولوني على غرفة ما قبل الولادة .. كان العصر مادري الظهر والله ما اذكر الله يعلم بحالتي ساعتها ..

والألم يزيد و يزيد وانا اتنفس وقت ما اييني وأحاول ما أصارخ عسب تتسهل ..

عقب يتني امي من العين واختي واخوي
طبعًا اول ما شفت امي ضميتها وصحت صياااااح لاني حسيت فيها

اقولها يماا بمووت

وهي تقولي لا ان شاء الله ربي يسهل عليج و تقومين بالسلامة ..

عقب السستر قالت لي قومي امشي احسن

وانا امشي يوم اييني الويع اوقف ماقدر .. واقرا آيات تسهيل الولادة و أقرا .. وريلي بعيد عني فديته يحاتيني لان ممنوع يدش هالحجرة

عقب السستر قالت لي تبين نعطيج طلق صناعي ؟ لان مب طايع يفتح اكثر عن 3 !!

قلت لها لااااااااء بتريا ولا ان احط طلق صناعي من الي سمعته عنه ان وايد قوي و أضعاف الطلق العادي ..

بس امي وعمتي قالوا لي خذي أحسن عشان تفتكين بدال هالعذاب ..

توكلت على الله وحطولي فالوريد ..

الألم بدا ينتظم و يزيد وقمت اصارخ غصب عني احس مافيني حيل على ويع زيادة .. كم ساعة وانا اتويع

عقب مرت الدكتورة قالت تاخذين ابرة الظهر ؟

قلت لها لاااااااااء

عقب كانت الساعه 10 نقلوني لغرفة الولادة

طبعًا انا وريلي كنا متفقين انه يدش وياي و يشهد هاللحظات الحلوة

بس ريلي من النوع الحساس وما يتحمل يوم شافني جي اتويع تم يدعي ويصيح كسر خاطري وقلت خلاص لا تدخل لانه ما يتحمل

خليت امي تدش وياي بس .. المهم فحصتني السستر وقالت 10 سانتي الحمدلله ..

وانا اتنفس شهيق وزفير شهيق و زفير واقول حق امي خلاص بموت

قالت عيل انتوا ييتوا بالساهل ؟ >> أثر فيني كلامها

المهم من غير ما تقولي السستر تميت اسوي بوش من عندي ههههههه لان احس خلاص الراس تحت و شرف يطلع ..

حطت لي الاوكسجين وايد ساعدني مع التنفس

ما اذكر اني سويت بوش وايد بس ما طولت فالولادة

10 دخلت و 10 وربع شرفت شيخة البنات روضة

اللهم لك الحمد .. اللهم لك الحمد .. اللهم لك الحمد

لحظة ولا أروع يوم طلعت و حطوها على صدري نسييييييييييت كل الآلام

وعقب دش ريلي و اخوي و حمياتي و عمتي عشان يشوفون الكتكووته

لين ألحين أتذكر لحظات الولادة و فبداية أيام نفاسي كنت اصييييح من اتذكر هاللحظات

واقول الحمدلله لك يارب انك سهلتها عليّ .. ما توقعت ولادتي بتكون سهلة جي

بس لاني كنت طول فترة الحمل اقرا و امسح على بطني و أشرب ماي زمزم

ومتوكلة على الله و عندي يقين انه هو الوحيد الي بيسهل لي ولادتي و كنت اطنش الي يقولون الله يعينج الولادة صعبة و بتتعبين ولاحقة ع الشقا و و والخ

نصيحة لكل حامل

أكثري من ذكر الله و سماع القرآن الكريم وشرب ماء زمزم و أكل التمر بنية تسهيل الولادة

وما بتشوفين الا كل خير