الله يسلمكن من شهر سافرت عني شغالتي وتميت بدون شغاله ..وسويت من المكتب شغاله اندونيسية وقالولي بتتأخر شهر..والمشكلة اني انا اشتغل يعني لازم حد يشوف عيالي الصبح لين ما اوديهم بيت اهلي..
وخذت من المكتب شغالة مؤقته فلبينية وطلعت وااااايد زينه حتى عيالي تعلقوا فيها…وخبرت ربيعتي عنها وقلتلها ليش ماتكفلونها الشغاله وايد زينه وانا مسويه اندونيسية وبتتأخر…وسارت ربيعتي وكفلت الفلبينيه وقالتلي والله يزاها الله خير قالتلي خليها عندج لين ما تي شغالتج..وقلتلها اوكيه ومشكورة وما راح انسالج هالخدمة…
وبعد فترة وصلت شغالتي اليديدة والله لا يرايكم شكلها موول ما يخصه بالصورة وطلعت حوله بعد، وشكلها أكبر من سنها وعيالي ما خذوا عليها واختبرتها بكذا شغله وعرفت انها تكذب في شغلات..واهم شي مارتحتلها مووووول واحس فيها تمثل انها تكرف عكس الفلبينيه اللي احسبها لطيفه ومو دفشه وطبيعيه..
والحين السالفة كلها اني ندمت اني ما كفلت الفلبينيه قبل بديت صديقتي علي..وتمنيت لو اني كنسلت طلب الاندونيسية وكفلت الفلبينيه ..والحين استحي اقول حق ربيعتي ابغي آخذ الفلبينيه عنج وبرجعلج فلوسج كامله وبرجع الاندونيسة المكتب ..
والله محتاره ومستحية من ربيعتي…في نفس الوقت اخاف اخلي عيالي عند الاندونيسية وانا سايره الدوام ..الفلبينيه كنت اامن فيها وشغوله وسريعه وتلاعب عيالي ,,وهيه روحها الشغاله مثل ياهل تحب تلعب ويا العيال..
والله ردوا علي قبل ما تنتهي الفترة ..محتاااااره عيالي أو ربيعتي؟؟
والله مفتشله …
ردوا
ردوا
حطوا نفسكم في مكاني؟؟وشو كنتوا بتسوون؟؟
كوني صريحه مع ربيعتج قولي لها انا خذت مقلب في بشكارتي وافكر ارجعها وخاطري فالفلبينيه ترومين ترجعينها لي ولا فيها مشكله؟
شوفي ردها
لو طاعت اوكي لو لا غيري بشكارتج
او سوي وحده ثانيه وخلي الفلبينيه عندج لين اتيي الثانيه
بورش كايين
شكرا ع مروركم
ربيعتي من النوع المتفهم بس انا من النوع الخجول اللي استحي في الناس مثل انا اعطيتها هديه واقولها رجعيها لي…والله لومه اتمنى حد يعطيني راي بعد وباخذ براي الاغلبيه
المشاركة الأصلية كتبت بواسطة نااعمه 
كوني صريحه مع ربيعتج قولي لها انا خذت مقلب في بشكارتي وافكر ارجعها وخاطري فالفلبينيه ترومين ترجعينها لي ولا فيها مشكله؟
شوفي ردها
لو طاعت اوكي لو لا غيري بشكارتج
الغالية قوليلها انه اعيالج ارتاحوا للفلبينية وخذوا عليها اكثر من الاندنوسية والحين بسفر الاندنوسية وابغي الفلبينية علشان اعيالي ارتاحوا لها وانا ادور راحة اعيالي واسمحيلي يا الغالية وفلوسج بترجعلج
بس تقدرين اترمسينها بطريقه اتبينين لها انج تبين الفلبينيه و هي راح تفهم
والله ايعينج