شحالكم خواتي عضوات المنتدى عساكم مرتاحين
أنا الطبخ من هواياتي المفضلة وأحب أقضي وقتي فالمطبخ واختراع اليديد
من فترة كان يوم ميلاد أختي الصغيرة وحنت علي عسب أسويلها كيكه
ولحسن حظها إني كنت فاضية فسويت لها الكيكة وعدلتها من اختراعي إن شاء الله تعيبكم..
الكيكة الاسفنجية للمناسبات
مقادير الكيكة:
1 كاس دقيق
6 بيضات
1ملعقة بكنج باودر
فانيليا أي نوع بس بودرة ولا سائلة
1 كاس سكر مطحون
مقادير التزيين:
– علبة فواكه مشكلة أو اللي يريحكم أناناس أو خوخ معلب
– كريمة جاهزة أنا دوم أستخدم في تزيين الكيك والحلويات
الكريمة الجاهزة اللي اسمها (ماكتوب) بصراحة طعمها ولا أروع
– وللتزيين من فوق على كيفكم مكسرات فواكه كاكاو أو أي شي يعيبكم
طريقة الكيكة:
يخلط البيض يخلاط الكيك حتى يهش ويبيض
ثم نضيف الفانيليا ثم السكر تدريجياً
وبعدين الدقيق تدريجياً بعد وآخر شي البكنج بودر…
أنا أخبز الكيكة على حسب الحجم اللي أباه
فسويت مقدراين عسب تطلع مرتبة أكثر وما يحتاي أقصها من النص
في ملاحظات عندي عن الكيكة:
لما تصبونها في الصينية لا تضربون الصينية عالطاولة عسب
لا يدخلها هوا بس قلبوها يمين ويسار عشان تستوي سيدة
ولما ادخلونها الفرن لا تفتحونه تقريباً خمس إلى عشر دقايق
عسب نتتفخ عراحتها وما تخترب
حرارة الفرن تكون معتدلة نفس ما تسوون أي كيك
أول تشغلون تحت لين تستوي الأطراف ذهبية زعقب تشغلون فوق
وهي سريعة ما تاخذ وقت
وبعد ما تجهز الكيكة نخليها تبرد عقب نسقيها شراب الفواكه المشكلة
أو شراب الأناناس أو الخوخ مب وايد بس عشان تلين شوي
وعقب نحط الكريمة وإذا تبون فالنص فواكه مشكله حطوا وهذا حسب الذوق
وبعدين الطبقة الثانية وعقب ندهنها كلها بالكريمة ونبدا التزيين
وهاي الصور اسمحولي طبعاً ما صورت لكم بالتفصيل ما كنت متفيجة بس المرة الياية أكيد بصور لكم بالتفصيل
وهاي الكيكة سويتها يوم فاز منتخب الإمارات لكرة القدم
واسمحولي عالتقصير
وإذا عندكم أي استفسار حاضرين
وطبعاً ما أوصيكم عالردود الحلوة والتشجيع الطيب عسب أحط أشياء يديدة..
ودمتم سالمين
خويتكم
أم الغلا زايد
تسلم ايدج هالطبخه..
والله يوفقج
وكثر الله من أمثالكم..
بس عندي سؤال
الكيكه هذا تتفتت بسرعه؟؟؟؟؟؟
لاني دوم اسوي كيك بس كلماابي اقصها من النص علشان احشيها كريمه ما اقدر احس انها تتفتت بسرعه ومااقدر اتحكم فيها
المشاركة الأصلية كتبت بواسطة شمس الامارااات 
بس عندي سؤال
الكيكه هذا تتفتت بسرعه؟؟؟؟؟؟
لاني دوم اسوي كيك بس كلماابي اقصها من النص علشان احشيها كريمه ما اقدر احس انها تتفتت بسرعه ومااقدر اتحكم فيها
مشكورة فالبداية على دخولج موضوعي وعلى ردج الطيب..
بالنسبة للكيكة لازم ما تقصينها وهي حارة لازم لازم تكون باردة
بصراحة أنا وياج ساعات أعاني نفس المشكلة بس يوم أقصها أستخدم سكين كبيرة
وأشلها باحتياط شوي شوي عشان ما تخترب ونادر ما تخترب
وكلما كانت الصينية صغيرة كلما كانت الكيكة سهل تقصيها وتشليها
عسب جيه فالمناسبات نفس الأعياد أسوي كل طبقة بروحها وساعات
أسوي طبقة فانيليا وطبقة كاكاو وبعد يطلع حلو فن عشان نرضي كل الأذواق
وبيني وبينج هالكيكة أحسن عن كيك العلالي وغيره
لأنه كيك الكراتين يكون اسفنجي أكثر ويتفتت بسرعة
وإن شاء الله أكون فدتج عدل جربي وخبريني وبالتوفيق..