الناس تحسب تواريخها بما قبل الميلاد وبعده ونحن نحسب تواريخنا بما بعد الطرده وقبله 2024.

خواتي اليوم بكتبلكم قصتيه سوري بس ما قدرت امسك نفسي بس احس اني اريد ابرد الي في فادي وارتاح لو يمكن يشل شي من الهم الي في قلبي..

انا امي انسانه مطلقه والحمد لله وبحكم انه الحظانه عندها فنحن عايشين في بيت ابونا من 20 سنه..
ما قولكم البيت كان قصر..بس كان علبه جبريت ..بس الحمد لله على كل حال نحن راظين ومرتاحين دام عندنا بيت يظمنا والي حولنا اهلنا الي هم اهل ابويه ..يعني هو حوش بس فيه كم بيت والحمد لله حياتنا ما قول انها كانت بيرفكت بس كانت الامور طيبه..لكن يا اليوم الي ما توقعنا انه في اقربلك يصير عقربلك وما ظنينا انه مع الزمن الناس تتغير والقلوب تتغير..
المهم يا اليوم الي خواني كبروا وصاروا في سن المراهقه وامي مسكينه كانت طول اليوم النهار تشتغل والليل تدرس عشان توفر فلوس حق خواني ..ونا لاني كنت ذيج الايام معرسه والحمد لله في بيت اهل ريلي الي ما يقصرون معايه في شي وكنت مرتاحه ..فياني ابويه يشكيلي ويشكي لاختي الصغيره ..وابويه انسان متزوج ومتقاعد ..قاللنا انا اريد اربي خوانكم اريد اعتني فيهم وانا انسان متقاعد وماعندي شغل بقدر اعتني فيهم وحاظيهم لانه امكم مهملتنهم (وامي ذيج الايام كان طول يومها يعني شي غصبا عنها اذا هي ما صرفت على البيت وعلى خواني منو بيصرف!)..وطبعا ابويه الله يسامحه وايد وايد اثر فينا وانه هو يحب خواني وقعد يصيح عند اختي على خواني واختي الصغيره بعد تأثرت وايد ومن هذا الكلام تموا اهل ابويه يزيدون فينا ويشحنون وانه هذا احسن حل حق مصلحه خوانكم علشان ما يظيعون وهم في سن المراهقه ..طبعا اهل ابويه ذيج الايام كانوا لنا مثل الملائكه اي كلمه على طول نصدقهم في نظرنا هم اعقل الناس الي سكنت الفريج وهم اهل الدين الي لازم نسمع رمستهم!!..المهم يا اليوم الي اختي وافقت فيه ووافقنا انه نروح المحكمه مع ابويه عشان اختي اطالب بالحظانه له ..وراحت وتم كل شي بسررررررعه ..وصارت الحظانه لبويه ..المهم رجعنا البيت الليل انا كنت قاعده مع يدتيه الي هي ام ابويه وابويه ..المهم ابويه قعد يتطنز معاها قاللها شو رايج العيال ايعيشون عندج..!!!!!!!!..انا استغربت بس تميت ساكته يمكن انا مافهمت ..ردت عليه وقالتله انا مافيني على حد وهذيل عيالكم ..المهم انها عطته شي من هالكلام بس ما اذكر بظبط ..انا طنشت السالفه ولا تدخلت فالموضوع..

المهم خواتي ما ادري اذا كلامي مخبص شوي بس تحملوني خخخخخخخخخخخخخ..انزين ومع الايام كل شي تغيـــــــــــــــــر كل شي ..خواني مساكين بيوون يعزمون ربعهم فالبيت بيلعبون معاهم اتندوا..يروغون ربعهم اونه ما ادخلون اولاد البيت!!!!!!!!!!..مع انه البيت مش بيتهم ولا لهم حق منوه دخل ولا منو طلع..!..وهم ما راغوا الناس من بيتهم عشان يروغونهم من بيتنا اصلا!!..المهم ونظرا لانه بيتهم حلو ونحن بيتنا اجدم بيت واصغر بيت فما ينفع يعلقون مهبات الثياب على بيتهم لانه برستيجهم بيخترب ومنظر البيت بيتشوه واحسن مكان يعلقون فيه المهبات هي درايش بيتنا نحن ..!!..ولكن وكذلك مع هذا كله نحن كان عادي عندنا لانهم اهلنا حتى لو سووا مهباتهم على بيتنا ..حتى لو خلوا بيتنا ستور حق سمانهم وصناديقهم الي تيمع الفيران والصراصير..!!..بس كنا ساكتين ..!!..مع انه بيتهم عود وشرح ..!!..بس سبحان الله ما يرتاحون اذا جافوا بيتنا عدل !!..

المهم مرت الايام وبدا مافي القلب يطلع ..كلام غريب وكنا نقول ماعليه ..وهم ما شاء الله كل سنه يبنون ويزيدون طابق فوق طابق ..ويبنون بيوت وميالس ..ووالله العظيـــــــــم انه نحن كنا نفرحلهم وناخذلهم الهدايا ونباركلهم على بيوتهم وعلى كل شي يديد يحطونه ..كنا نفرحلهم لأنهم اهلنا ..كنا نفرحلهم لانه بيتهم نحسه بيتنا..

المهم كنا ذيج الايام نخطط نسكر نص الصاله ونسويها غرفه زياده لانه خواني كل واحد يبا غرفه ومب حلوه يرقدون فالصاله ..لازم كل واحد يحس انه مستقل ويحس انه له شي يخصه ..فكانت امي ذيج الايام مفكره تسوي من بدل السكن حمام زياده فالممر وتقسم الصاله الصغيره نصين ..صح خواني كانوا يتطنزون على صغر الغرفه ويقولون شو ها بتصير حجره صرصور ..بس كانوا مع هذا فرحانين وانتوا تعرفون الرياييل مستحيل يعبرون عن فرحتهم ..بس من ابتسامتهن نعرف الفرحه اكيد يعني منو ما بيفرح يوم بتكون له غرفه تخصه..المهم انا بما اني معرسه واختي الصغيره هي الي عايشه مع امي فهي الي كانت تشل كل شي وتخطط في ترتيبات الحمام وكل شي يعني حتى من صغر الحمام ما فكرت تحط فيه بانيو عشان ما يصغر زياده ..المهم حست اختي انه قوم اهل ابويه مب عايبنهم الي هم بيسوونه ..!! ..يوم خبرتهم بالسالفه.. تخيلوا تطنزوا عليها وقالولها ليش تسوون حجره وانتم ابوكم اصلا بيهد البيت..!!!!!!!!!!!!..ليش خير منوه قال انه ابويه بيهد البيت..!!..ونحن وين بنروح مثلا..!!
بعدين وللأسف ابويه صـــــــــــــــارحنا انه هو يبا يهد البيت الي نحن ساكنين فيه ..الي نحن عايشين فيه وصابرين عليه 20 سنه..!!..لأنه هو يريد يبنيله بيت حلو وكبير وفيه لفت .!!..فما حصل ارض فالامارات كلها غير الارض الي عياله عايشين عليها..!!..مع انه بيته الي ساكن فيه يديد والحمد لله ما صارله سنـــــــــــــــــــــه وحده ساكننه..!!..وعنده غير هالبيت بيوت للآجار يعني الحمد لله انا اعرف ناه خير ابوي وايد فليش يستكثر علينا هالصندقه!!..

المهم لحظتها عرفنـــــــــا للأسف ليش ابويه كان يريد الحظانه ..للأسف هو ما كان يريد يحاظي عياله ..بس كان يريد يقص مصروف خواني الشهري الي كان ملزوم يدفعه حق امي وكان يريد يروغ امي من البيت لأنه مش ملزوم يسكانها في بيــــــــــــــــــــت..

اختي قالتله وحاولت معاه بالطيب وقالتله انته ما قلت انك تبا تحاظي خواني..!!..قاللها شوه تبيني احاظيهم يوم صاروا كبار وما روم عليهم؟؟..قالتله عيل ليش كنت تقوللنا انا ابا اربيهم ونا ابا احاظيهم ..

المهم بعدها قلنا خلاص خلهم يقولون الي يقولونه ونحن عرفنا لو يبنا بتان يشتغلون فالبيت وحطون طوفه فنص الصاله اكيد قوم اهل ابويه بيسوولنا سالفه وكلهم رياييل ما نقدر عليهم لو خواني كبار بنقول بس خواني عيال مدارس ما يرومون على حد ..ألمهم انتظرنا لين الصيف لانه فالصيف يقيظون فليوا ..وقلنا يوم الحوش بيفظا بنيب الهنود وبنعدل فالبيت ..عشان ما يسوولنا فظيييييييحه ع الهنود ومشاكل..ويا ذاك اليوم والبيوت خلت واتفقنا مع الهنود وعطيناهم تاريخ اخر يوم يشتغلون فيه عشان يخلصون قبل لا يردون اهل ابويه من ليوا وانكون نحن خلصنا شغلنا في سلام..

المهم يو الهنود وسوولنا حمااااااااااام يدي يجنن وطبعا كله من فلوس امي. وسووا حجره زياده وفرحنا والله فرحنـــــا..فرحت حق خواني..ما تتخيلون كيف فرحتهم .. من فرحتهم كل واحد يدخل حجرته وما يطلع ههههههههههههههه ..المهم حد من عمومي رجع من ليوا وانصدم جاف اشياء ما توقعها واتصل على اختي يواجعها ..أختي حليلها تكلمه بكل احترام وقالتله نحن سوينا غرفه زياده حق خواني وجيه..قاللها منوووووووه قالج نحن اصلا نبا خواااااااااانج..اختي انصدمت ..وطبعا رجعوا قوم يدتيه من ليوا ..ونحن عااااااااااادي رحنا وسلمنا عليهم وكل شي تمام ما كأنه شي صاير وهم ميتيييييييييين محلهم على غرفه سويناها..!! غرفه متر في متر ونص!!..
تمت يدتيه تتحرطم عليه ونا تميت ساكته قالت انتوا ليش تسوون وابوكم اصلا بيهد البيـــــــــــــت ..قلتلها ابويه اصلا ما عنده فلوس يبني ..قالت هو لو ماااااااااهده انــــــــــــــــــــــا بهده وببنيه اجــــــــــــار!!..ترا الارظ اصلا كلها بأسم يدي لكن بحكم انه يدي مريظ فيدتيه خذت التوكيل ..
المهم انا سكت عنها وعيوني حمراااااااا ..احتراما لها ..وسويت عمري رايحه المطبخ وفي باب يطلع من البيت عن طريق المطبخ فطلعت منه بدون محد يدري ..وكنت اصيح وحلفت اني ما اطب بيتهم..
المهم نحن طنشنا ورحن نتشرا اثاث يديد حق خواني عشان تكمل الفرحه طبعا..وهم طبعا بقهرهم لا جافو سياره ايكيا ولا هوم سنتر هههههههههههههههههههههههههههههههههههههههههههههه ..
المهم مرت الايام ويا يوم الصدمه ..امي المسكينه كعادتها اتنش الصبح وتروح تتريق وتطلع الدوام..

ولكن هاليوم كان غير عن كل يوم..لما طلعت من الباب حصلت ورقه شلتها وبطلتها وللأسف الشديد صارت من ناس ما توقعنا منهم تصــــــير..ورقه طرد مستعجل من المحكمه وبأسم يدتيه ..امي مسكينه انهارت نفسيتها..!!..وكلنا عرفنا بالصدمه وكل وحده فينا راحت ومسكت الورقه وتمت تتأملها مب عارفين يمكن مب صدق..!!..يمكن شي غلط مكتوب فيها ونحن قرينا شي ثاني..!!..يمكن ورقه قطع الكهربا ليوم بسبب اعمال الصيانه..!!..يمكن ويمكن ..يمكن امي ما قرت عدل .,,,,!

المهم نحن تمينا فالبيت..!!..يعني شو يرومون يسوون ..!!..بيتنا ..!!..20 سنه..
المهم تناقشت مع اختي فالموضوع وقلنا مهما كان جوفي ..هم يجوفون انه نحن حريم فما بنقدر انسوي شي..!!..بس هم ماعرفوا يلعبون مع منوه..!!..بس خلينا اول شي نحل المساله سلميا ..
خلينا انحاول مع ابويه بالطيب مهما كان هذا ابونا ..خلينا نبدأ بالكلام الطيب..وقالت اوكيه..حاولت معاه قعد يواجعني وطبعا صار انسان ثاني لانه خلاص كل شي بأيده والحظانه عنده..!!!!!!!!!!!!!!1
اختي حاولت وكلمته رد عليه للأسف وقاللها اصلا احمدووووووووووووا ربكم اني ما اخليكم تدفعون فلوووس اجار البيت الي ساكنين فيه..!!يعني انته احين تبا ادفعنا فلوس الاجار,,!!,,تبا ادفع عيالك الي يدرسون فالمدارس فلوس اجار..!!..عيالك الي من لحمك ودمك عيالك الي انته من الاساس ملزوم تصرف عليهم..

وقاللها انا ما يخصني فالساااااااااالفه والارظ مب ارظي(تراها كلها اتفاقيه ولا هي ارظه لو ما كانت فالاوراق بس هي ارظه وهم قسموا الاراظي ما بينهم وكل واحد خذ نصيبه)

المهم مرت الايام ونحن صامدون ومب طالعين مب طالعين!!..
مرت الايام وقوم يدتيه كل عصر يقعدون فالحوش وويسولفون ويظاحكون ما كأنه شي صاير ما كأنه رايغين عيالهم ما كأنهم عايشين وهم ظالمين حد..ونحن بس نجوفهم من ورا الدرايش..نبا نجوف عليهم علامه حزن ..نبا نقول يمكن احين حسوا ..يمكن احين تولهوا علينا..يمكن احين يغيرون رمستهم..يمكن ويمكن يومكن..!!!!!!!!!!!!!!!!!!!!!!!..المهم..خواني نفسيتهم صارت صفر.. كل ما يجوفونهم اهل يدتيه ولا يدتيه يشيشونهم عشان يروحون يعيشون عند ابويه ويخلون امي فالبيت روحها عشان يفترسون فيها ويطردونهم..اختي تكلم ابويه تصيح تقوله انا اريد امي قاللها شووووه انتي ياهل تقولين اريد امي..!!
خواني يحاولون اهل ابويه يخلونهم يطلعون من البيت لكن خواني قاعدين قاعدين ..ما تتخيلووووون كيف كانت حياتنا ذيج الايام حسينا بأهل فلسطيــــــــــــــــــــــــــــــــــن..ما كنا نقدر نخلي امي بروووووووحها فالبيت..لانه نخاف يسوون شي ويستغلون الفرصه كان اذا حد فينا طلع لازم حد فينا يكون موجووووووووووود..امي تروح الدوام انا اروح الظهر البيت اقعد ..نخاف فجأه نرجع نحصل سمانا مفرفره برع ولا البيت مفجرينه..

المهم مرت الايام وصدمه تلت صدمه..يا اليوم الي يدتيه راحت صوب الديلمه وقطعت الماي عن بيتنا..
وصاروا خواني وامي واختي عايشين بدون ماي فالبيت..!!..ويدتيه تقوللهم انا قدمت طلب بقطع الماي..بس هي اصلا كانت مبنده الديلمه لانها اصلا لو قطعت الماي عن بيتنا بينقطع الماي عن باقي البيوت لانه كله مع بعظ..
المهم اخويه راح بالدس وتم يدور على سويج الديلمه وهو مب عارف وين ماحصلاه اخر شي اكتشف انه يدتيه حاطه سحاح التمر فوق بعظ والسويج وراهن علشان ما اندله ..واخوايه تم يشل السحاح وشغل الديلمه ..وطبعا يدتيه عرفت ورجعت راحت وبندتها ومن يومها ما صرنا نقدر نشغل الديلمه لانه ما شاء الله حراسه ويدتيه تشكيلهم انا ابند الديلمه وفلان يشغلها!!!!!!!!!!!!!!1

المهم امي قالتلهم اصبروا عليه خلوني ادور على شقه انا الين اليوم ما حصلت ومسكينه اتحوص وهي ادور على شقق والله لا يراويكم الي جفناه من نصب واحتيال على سالفه الشقق وكله في جريده الوسيييييييييييييييييط خريط..
المهم هم ناس كانوا فرحانين ومرتاااااااحين وكل شي عندهم تمااااااااام خواني ودروا المدارس الله يعزكم ماشي ماي فالبيت وماشي سبوح حتى البيت صارت ريحته وصخه الله يعزكم مافي جرارات فالحماما وعايشين على طرمبات مسافي اسبوع كامل..ومع ذلك وما ودروا امي ولا خلووووووه وقوم اهل ابويه ميتييييييييييين قهر يبون خواني يطلعون من البيت بأي طريقه ..وتم ابويه يهددهم ويقوللهم تعالوا عيشوا عندي ..واحد من خواني ماعاد يرمس ابويه ابدا وصار طول يوم فالغرفه ما يطلع ولا نقدر نجوفه والثاني ابويه يحاول يقنعه وما طاع يخلي امي جان يقوله لو ماييت بخلي الشرطه اتي تشلك..طبعا اخويه فديته ما سوا حق حد سالفه وتم عند امي وقطعوا المدرسه ..
المهم ومرت الايام وامي ادور على شقه بس ما تلقى شي.. وماشاء الله ذيج الايام كان الدكان ماشي سوقه ورابح من ورانا وااااااااايد. كنا في حال طول الوقت ندعي عليهم وكنت اقول يالله يعله من قطع الماي عن امي يالله يارب اقطع الخير عنه..
امي مسكينه والله مش مفتكره في عمرها بس هامنها خواني كله تقول نفسيتهم ونفسيتهم تعقدوا وتعقدوا..والله حتى الغرفه اليديده ما تهنوا فيها ولا حتى الحمام اليديد وكل التعب طاااااااااار..
المهم يا اليوم الي يدتيه يت وتمت ادق باب البيت لانها ما قدرت تتحمل تصبر ويايبه معاها هندي واخويه مسكين فتح الباب جان شو تبين قالت انا يايبه الهندي معايه افتح الباب بدخل بقطع الكهربااااااااااااااااااااااااااااااا!!..راح اخويه خبر امي راحت امي قالتله قوللها اصببري نحن بعدنا ما حصلنا شقه..والله العظيم ما كملوا امي شلت خواني وكلمت الشغل مالها ويزاااااهم الله الف خير الشغل حطاها في شقق فندقيه لين ما امي تحصللها شقه..

المهم امي راحت الشقه الفندقيه مسكينه والله العظيم حتى ثيابها وثياب خواني فالبيت حتى نظارتها مسكينه نستها من الربشه وبالزور اتجوف ..انا اروح عندها الشقه تقولي روحي هاتي سمانا من البيت كل شي هناك وخوانج قاعدين هناك عشان يحرسونه لانها ما قدرت تشل شي وتخاف اتروح..كل شي حتى الثلاجه والمكيفات والاثاث والثياب والمواعين
المهم يا اليوم الي انا واختي الصغيره انروح البيت وخبرت اخويه عشان ايكون معانا ريال ..وقلنا مستحيل نخليلهم شي مستحيل كل شي بنشله وبنبيعه على الاقل اييبلنا سعر وبسعر المكيفات بنشتري اثاث او شي نستفيد منه ..
المهم يبنا الهنود وقوم يدتيه يجوفون لستوت ونحن نباهم يفجون المكيفات المهم الهنود راحوا السطح ونحن ميتين رووووووع ومن القهر الي في قلوبنا كنا براااااااااااااااااااااااكين وقوم يدتيه يالسين فالحوش..نسمع عمي يزاعق على الهنود يقوللهم انزلوووووووووو ولا بييبلكم الشرطـــــــه..ويدتيه يوم جافت الهنود بادين بيشتغلون اتصلت على اختي الثانيه وتمت اتسبها وقالتلها قوولي حق امج تطلع من البيت ولا تشيل منه ولااااااااااااااااااااا برغي..
اختي قالتلها امي اصلا مش فالبيت هذيل خواتي الثانيات..المهم يدتيه ما تحملت ويت عندنا ونحنه كنا في غرفه امي انحط الثياب فالكراتين نسمعها اتصارخ على الهنود وتروغهم انا واختي ربعنا قلنالها الهنود هب طالعي من بيتنا هب طالعين المهم رجعت هي طلعت ونحن فرحنا قلنا خلاص شطلنا انتصرنا وابسرعه ما شاء الله ..ورحنا انكمل لم الاغراظ المهم ما نسمع غير صوت ربيع وصوت زعيج ونحن مب فاهمين ونترابع واخر شي طلعت يدتيه يايبه ورقة الطرد واتصارخ واتروي الهنود والهنود زاغوا وقعدوا يترابعون اااااااااااااااااخ المهم وبعد ما ربعوا الهنود كلهم كان في هندي يشتغل فالسطح وتم منخش خايف ما طلع هههههههههههههههههههههههههههههه نحن ما ندري ويدتيه تروغنا ونحن كل وحده فينا ماسكه الثانيه بقوه عشان كل وحده فينا تأزر الثاني ونحن من تحت لتحت ميتات روووووووووووع هههههههههههههههه قلنا احين يدتيه بتستدعي الجنود وما شاء الله نحن ثنتين ما نقدر على حد عادي ننداس ..المهم يدتيه تمت اتواجع ونحن معاها عالخط واتروغنا ونحن نقوللها هب طالعين وتمت تقول اطلعن ولا بييبلكن الشرطـــــــه نحن نعرف انه يدتيه تخاف من الفظيحه وما تبا حد يجوف كل الي يصير فما خفنامن سالفه الشرطه وحتى لو يابتهم عادي عندنا المهم قلنلها عادي هاتي الشرطه هاتي الشرطه حق عيالج ..وتمت فرحانه وتفتخر واتروينا ورقه الطرد واتروغنا ونحن قعدنا انصيح وانصارخ وكان وقت صاله المهم هي جافت الرياييل الي رايحين المسيد يجوفون فروحت ما قدرت عشان ماحد يعرف بالي يصير..

المهم راحت هي وقعدت تصيح عند عمومتيه وقالتله انا جفت حريقه فوق البيت ورحت اتطمن على البنات ويوم دلخت راغني من البيت وتمت تصيح ..وواحد من عموم الابطال يا ودخل البيت وقال ايه انتن تسمعن والله لو قربتن صوب امي ياويلكن وتم يصارخ ورفع ايده انا صارخت وقتله والله العظيم لو مديت يدك لا استكي على فالشرطه ونا كنت ساعتها عاااااادي بسوي اي شو لو احرق البيت بالنار عادي.. وتمينا يمكن نص ساعه صراخ ووجاع لين ماشرد من البيت المهم ها الهندي ونحن في نص ظرابتنا ومندمجين نجوفه نازل ويربع هههههههههههههههههههههههههههههههههه كان توقيته غلط صراحه ..المهم انه بعدين عمي شرد خخخخخخخخخخخخخخخخخخ لانه نحن وصلنا مرحله الله اعلم فيها ..وبعدين على طول من طلع انسدحنا من شده التعب على الرظ ما نعرف تمينا انصيح ونظحك كل ما نذكر اشكالنا ونذكر الهندي الي كان يربع خخخخخخخخخخخ المهم حسينا براحه وانه ردينا شي من حق امي لوه قليل وطبعا كملنا شغلنا فاليوم الثاني بس ما قدرنا نشل الغساله او الثلاجه او المكيفات بس من القهر الي في قلوبنا انا وخواتي وخواني حاولنا نخرب الي نقدر عليه واتصدقنا بكل المواعين الي ما نباها المهم انه ما نبا شي من اغراظنا يتم حقهم ..

المهم خخخخخخخخخخ احس اني وايد خبصت بس مشوووووووووها..

بعد ما طلعنا وشلينا قشنا ..ونا بحكم اني ساكنه للأسف في نفس الفريج..كل ما امر عدال البيت اتذكر اخر يوم وكيف كنا قاعدين عند باب البيت نفكر فيه ونفكر في الامنا في هذا البيت وافراحنا ..كنا نفكر في كل شي..كان كل شي عندنا مختبص وصارت نظرتنا للناس غير..مالقينا حد يوقف معانا..مالقينا حد يساندنا..وحينه كل ما امر عداله وجاوفه واجوف شو مسوين فيه ..لافين دروازه بيتنا بالشيله ورابطينها من الخااااااااطر,..!! ما ادري هل هم خايفي انه نرجع البيت مره ثانيه..
كل ما اخط يكون خاطري اصور الدروازه المسكينه الي ما سلمت منهم ..وماخلوا شي ما ربطوا فيها..!!..صراحه خاطري اوديلهم صنقل يربطوبه الباب لانه ما ادري شو فايده الشيله..!!..
بس الي اعرفه انها ما بتغير شي سواء ربطوه بشيله ولا بحبل بس الي فالقلب من بعد الي صار تغير ونظرتيه لكل من حولي صارت غير..