شحالكم حوامل وامهات ومربيات
طبعا حبيت ابشركم اني ربيت من 26 يوم ادري بتقولون متاخرة بس لان ولادتي كانت فجأة وربيت وانا 28 اسبوع 
اكيد تبون تعرفون ليش وكيف ربيت صح يالله الحين بقولكم
كان ايني ويع في بطني قبل لا ادخل المستشفى بيوم تقريبا نفس ويع الدورة بس اقوى شوي وانا كت اتحرى ويع عادي يعني مال الحمل
المهم ثاني يوم الصبح وعاني ريلي قالي قومي انتي فيج حمى جسمي كان وايد حار سرت الحوادث على طول وكانت فيي لوعة سوولي تحاليل قالولي عندج التهاب بالدم و تكرمون في البول ولازم يرقدوني قبل لا تظهر النتايج قالتلي الدكتورة خليني افحصج فحص داخلي عشان اسوف اذا الرحم مفتوح عندج والا لا عشان الويع اللي فيني والدكتورة ما تعرف تفحص عدل لانها حاطه الليت ورى راسها وتقول ظلام ما اشوف شي لين يت السستر وسوت الليت وقال الحمدالله مب مفتوح وسوولي تخطيط وما في تقلصات الحمدلله والبيبي زين 
المهم دخلوني لين الليل الويع قام يزيد علي لدرجة انتي قمت ما اتحمل خلاص قمت اصرخ عصبن عني رمست الدكتورة الفجر الساعه 3 قالت تبين اييي افحصج بايدي قلتلها تعالي وفحصتني صح انه يعور ويذبح بس مب اقوى من الويع اللي كان فيني وقالت الرحم مفوح 8 تخيلو وهاذيج تقول لا وقالت حالة ولادة بسرعه بس المشكله ان الراس فوق ولازم يولدوني لان خايفين ماي الراس ينزل وسوو كل شي بسرعه ما تريوو ريلي ايي يوقع على الورقة انا وقعت وبسرعه بصمت على الورقة مالت الحضانة حق البيبي
وودوني غرفة العمليات قبل لا يدخلوني اشوف ريلي وعمتي وصلو قعد يقولي لا تخافين وهو مسكين كان وايد خايف ودخلوني غرفة العمليات وسوولي ابرة الظهر وبدوو العملية وعقب فترة طلعو حبيب قلبي حمودي بس ما حطوه على صدري لانه صغير وعشان يتنفس بس كنت اشوف لانه حذالي وكنت وايد خايفة و ما ارتحت الا يوم سمعت صوته يوم صاح فديته الله يحفظه وعلى طول ودوه الحضانة
والحمدالله البيبي لين الحي عندهم لين يزيد وزنه دعواتكم لولدي يطلع بالسلامة وافرح فيه يا رب العالمين
كل وحدة تدخل تدعيله 
ومبروك يالغالية
آمين