بسم الله الرحمن الرحيم
مثل ما قريتوا في العنوان خواتي ربيعتي زلقت ريلها أمس وهي تشوف تلفونها البلاك بيري وياية بتنزل في بيتهم من الدور الثاني وما انتبهت لاول درجة
وزلقت ريلها وطاحت , الحمدلله ما اتضررت وايد , جروح بسيطة وخارجية بس بغيت اكتب لكم في المنتدى خاصة للاخوات الي يسوون مثلها
وبعد سالفة ثانية الي يمشون في المول وفجاة يوقفون في نص الطريق وتيلس تشوف وتشيك تلفونها وبرودكاست او سوالف ………… الخ
وعقب تدش في الي جدامها ما يصير هالشي هالحركة منتشرة الحين وايد , كل شي لاحقين عليه بس أهم شي نعمة الصحة
شو رايكم بهذه الظاهرة خواتي ؟
اتمنى نراعي في ردودنا ان الكلام بيكون موجه لاخواتنا يعني ما نبا اسلوب تجريح فيه
قال تعالى : ما يلفظ من قول إلا لديه رقيب عتيد
وأيضا النصيحة تكون بالحسنى والكلمة الطيبة وتاخذ مفعولها أسرع من ان نعايرهم ونعزز عندهم سالفة العناد بالغلط
وشكرا لكم 
حتى مرات في ناس يسوقون السيارة ويردون على التلفون او يقرون المسج ويفقدون السيطرة على السيارة ويستوي حادث يضررون منه الناس وحتى نفوسهم
فلازم الواحد ينتبه لهذي الاشياء
كل شي قضاء وقدر مهما الانسان خذ حذره بس بعد الانسان محاسب وفي اشياء ماترجع
وسلامات لربيعتك
ذكرتيني ف موقف ،، مره كنت سايره مول ومستعيله ابا اتشرى واطلع بسرعه وما اشوفلج الا واحد فاضي جدامنا يمشي شوي شوي والدنيا زحمه وهو عيونه ف البلاك بيري ( ناس فاضيه الصراحه ) يعني عدم مبالاه بالغير بدرجه فظيعه 
يعني لو سمحت خوز نبا نخلص اشغالنا مب ف البيت انته (تحسينهم معاريس والناس تزفهم) 
نصيحتي لهم ،، لاحقين ع سوالف البلاك بيري دام الواحد طالع عشان يخلص اشغاله يخلصهن من غير انه ياخذله ساعه ف نفس المكان بس عشان يرد ع فلان وغيره ولا انه يقرا البرودكاستس وف نفس الوقت يعرقل امور غيره سواء ف الشارع ولا السوق اذا زحمه .. كل شي له وقته 
والله يرحم ايام نوكيا
كوني تاجرة اغلب الوقت على بلاك بيري ماسنجر بس مب اي وقت ارد الا لو تاكدت انه ما وراي شيء