انا متضايقة من حركة اتسويها بشكارتي و هي تسويها وقت الصلاة. اول ما ياذن اتفر عياللي علي و اتوقف شغلها و اتقوللي انا بسير اصلي و تيلس تقريبا نص ساعة على السجادة و تدعي و تسبح و انا اترياها اتخلص عشان انا اسير اصلي ..
و هالشي يضايقني لأني انا المفروض اصلي قلبها و هي اتيوود عياللي عشان اخلص .. و هي جالبه الموضوع و تأخذ راحتها. مابا اضاربها لأنه هاي صلاة بس صدق وايد متنرفزة من هالحركة. اتقوللي ماما انا بسير اصلي و اتروح .. انزين صلت و خلصت .. ليش اتسبح و هي يالسة ؟ قلتلها كذا مرة سبحي و انتي تكوّيين و لا و انتي تغسلين .. مب شرط هاليلسه على السجادة و انا اتم اترياج ..
و مثلا مرات انا ابا اطلع مع ريلي و اكون وايد مستعيلة .. اتقوللي بسير اصلي .. و اضطر انا البس عياللي و اسكتهم و احاول البس انا و في نفس الوقت اعطي ريلي اي شي يباه (يدور على نعال و لا على قلم ..)
ما تتروم تتريا لين ما نطلع عشان اتسير تصلي و تأخذ راحتها ؟ مرات يني احساس انها تتهرب مني و تتحجج بالصلاة!
شو اسوي وياها .. على الاقل كيف اقدر اقولها انه انا المفروض اصلي قبل و هي اتيود عياللي حقي..
لكن الصلاة صلاة
مافي شي اسمها المفروض انتي تصلين قبلها و الا هي قبلج
توضي و من ياذن صلي و خلاص
اما سالفة انشغالها وقت اللي عندج شغل قولي لها تعالي لبسي اليهال او اهتمي فيهم
عموما الخدامات اغلبهم جي
ياخذون وقت طويل على سيادة الصلاة
وراها … مايصيير هيه تاخر صلاتها عشانج وعشان عيالج… ولا انتي تاخرين صلاتج عشانها … ونص ساعه
الغاليه مب وايد !
جان على الكوي والغسيل .. الكوي والغسيل بيخلص … بس صلاتها لين فاتتها عن وقتها …منوبيردلها الوقت ؟؟؟
واليهال الغاليه يوم تصلين حطيهم حذالج …وصكي باب الحجره وصلي
والله يثبتها بصراحه شيء جميل انها محافظه …
ومبدا خاطى ان هيه لازم تاخر صلاتها و انتي المفروض تصلين قبل
والسموحه منج
اشوف ان فكرتك غريبه شوي (((( متي استعبتم الناس وقد ولدتهم اماهتهم احرارا)))
خدامتي كانت تحاااول معاي بس اقنعتها بان يوم هي تروح قبل
ويوم انا اروح قبل_________ انتي اش رايك
فهميها ان لما انتي موجوده انتي تدفعين راتب علشان تساااعدك
ة شكلها مستغله طيبتك –
وليش يعني مفروض انتي تصلين قبل؟؟؟؟
الله يهديها لج ان شالله..وتكون سبب في دخولج الجنة عشان تركتيلها الوقت الكافي للصلاة ولذكر ربها…بس اختي حاولي ترتبين أمورج وياها انه لما تحتاجينها اتيج على طوول وتخدمج..وفي نفس الوقت لما تبين تصلين اتخلينها عندهم لين ما تخلصين بشرط ما يطوف وقت صلاتها…وإذا قالت لج بروح أصلي قوليلها صبري شوي 10 دقايق لين ما أخلص وضوئي وصلاتي وعقب خليها تسير واشكريها لأنها يلست عندهم وبهذا الشي بتفهمج وبتعرف انج ما بتحرمينها من الصلاة والعباده..لأنه مرات معتقداتهم غيرعنا..
والله يسخرها لج يارب