" بنـــت"عمي " هـــي مشكلتي 2024.

السلام عليكم ورحمة الله وبركــاته,,,
هــلا حبيـباتـي فديـكن // شــلونــكم ,,
عــساكــن بخيــر وســهــالـ’’ـه

يـا بنات انا مشكلتني محيرنتي ,, لا مخليتني أنام الليل ولا أركز بالنهار,,
(بنت عمي) عسى ربي يهديها وينور طريجها ,,بنت عمي اهيا مشكلتي ,,انا راح اجولكم القصة كلها من "طقطق لسلاام عليكم " عأساس تفهمون وتنصحون لاني بجد واايد محتارة ولا عارفة شاسوي وياها,,
أنا وبنت عمي متقاربات بالسن يفرق بيننا تقريبا شهرين أو ثلاث,, وانا أكبر منها,,
كنـا أول "من زمان" واايد مع بعض بس الايام والظروف فرقتنا,,بس بعد سنين تلاقينا,,
وقررنا انه نعيد ذكريات أول ,,فقررت انه نطلع نسوي شبنج بالمول ونتغذا فيه,,
"وللمعلومية :عائلتنا من النوع اللي ملتزم واايد,, وأنا واهيامنتقبات,,بي بنت عمي منقبة "على ستايل " على جوولتها,,يعني نقابها واايد مختل ميزانه ,,أحس الايام واايد غيرتها حولتها غيرر البنية اللي كنت اعرفها,,",, وهني بدأت تفاصيل القصة
المهم رحنا المول ويا الدريول خذينا لفة واشترينا اللي خاطرنا فيه وبعد جذي دخلنا احد المحلات ,, وكان هل محل ع أساس آخر محطة نروح لها بالشوبنج وبعد جذي نروح نتغدى,,
فجأة ياهـا اتصال,,حسيتها توترت بس طنشت ,,اشترينا وطلعنا من المحل,,وطلعنا للفود زون ,, جالت لي ثواني وبرد,, انا استغربت!! جلت يا فلانة وين رايحة؟؟ردت علي بنرة فيها توتر وخوف: ثواني ,, الحينه برد,, انا جلت يمكن شافت رفيجتها وراحت تسلم عليها او راح تروح بيت الراحة أعزكم الله أو راحت تشتري شي كان خاطرها فيه واستحت تشتريه جدامي,,,
مرت تقريبا ربع ساعة ولا ردت,, انا نيتي كانت صافية ما فكرت أشك فيها,,فاتصلت للدريول ع أساس ييصف السيارة عدال الباب ونحط الأغراض لان مو حلوة شكلنا محملين فيها طوول الوقت هههه,,نزلت وانا معي الاغراض ,, وحطيتهن بالسيارة وجلت للدريول يجي بعد نصف ساعة ونكون مخلصين,,قال طيب,, راح الدريول ,, وياتني الصدمة الكبرررىىىى
إلا وأشوف بنت عمي نازلة من سيارة مع شااب!! بروحهم جاتني صدمة والله العظيم لدرجة كنت بفقد وعيي لكن الحمدالله ربي ستر وياي,, واحترت حسيت بروحي تجدمت من جادرة اتحرك من مكاني,, جامت تدور في بالي اشياء واااااايد حسيت الدنيا والعالم يدوور حواليني,, دخلت المول,, وتميت وراها ابي أتأكد اهيا بنت عمي!! او انا مشبها,, وجاتني الصدمة الكبرى اهيا بنت عمي,,!! وصلت للطاولة وما لقتني ,, وكانفي ناس ثانيين جعدوا عليها,,وانا كنت متوجهة لها والتفتت وشافتني وملا جالت ولا كلمة,, كانت فيني حرة كنت ابي اصفقها,, بس المكان ووضعي وما سمح لي,, من نظراتي الصامتة لها عرفت اني شفتها,, جعدنا على طاولة مجاورة,,سألتها : يا فلانة وين كنتي؟ ردت علي بنرة كلها وقااحة: وانتي شكو,,جلتلها:جلتي لي راح تغيبين ثواني اشوف الثواني صارت نص ساعة ردت: انتي لا امي ولا ابوي تحاسبيني ,,دام امي وابوي عايشين انتي مالج خص,,لحظة صمت مرررت ,,صحيت لنفسي وجلتلها: انتي ما تستحين,,ردت بوقاحة: لا,,
جلتلها : صج طحتي من عيني هذا وانا اكبر منج المفروض تحترميني! ردت: الله والكبيرة عااد ..جلتلها :انا لازم اعلم عليج امج وابوج,"مع اني عارفة ان جلت لامها وابوها راح يذبحوونها "ردت: حبيبتي اللي ما توصلينه بايدج وصليه بريولج!!
جلتلها يلا نمشي,, ردت :والغدا,,::؟ جلت لها: وانتي لج نفس تتغدين؟ سدت نفسي عن الكل وتسأل يا بنات انا لي الحين مو عارفة شأسوي خايفة اشكي خايفة اجوول لاحد,,مالي غيركم ,,انا خايفة علىبنت عمي ,, نصحتها ودوومها ترد على بوقاحة,, اعلم عليها ولا شأسوي,,

والسموحة على الاطالة,,,

موقف وايد صعب بصراحه

شاوري امج في الموضوع وهيه اخبر عنج باحوال عيالتكم وهيه اكيد بتفيدج

لكن الافضل اتميين ويا بنت عمج ما تفارقينها وتتقربين منها اكثر عشان تكسب ثقتج

وتقولج منوه هالشخص واشوه سالفتها //

لو تمالكتي اعصابج وما ضاربتيها وتغديتو وخذتو بالسوالف ممكن ترتاح لج وتخبرج

لكن الحين بتتحذر منج

ردي اكسيبها عشان تعرفين الخفايا وتحاولين اصلحين امورها

والله يهدي بنت عمج

لا تسكتين ………… ورووحي عند أمهاا وقوليلهاا ……..هاي بنت عمج من لحمج ودمج ولازم تسوين شي ولا تسكتين

هلا اختي تسلمين ع الرد,, اللي صار كل كان لا إرادي يعني مو بيدي كل اللي صار من صدمتي ما عرفت شأسوي ,,

بس ما اعتقد الحينه تثق فيني بعد كل اللي صار,,
المهم يا الغلا تسلمين ع المرور,, نورتي

انا ودي اجول لأمي,, بس متأكدة امي من دون تفاهم راح تجول لعمتي اللي هل ام بنت عمي,,
وهذا اللي خافة منه,,المسكينة اكيد راح تحقد علي وتكرهني بزود,,
المهم يا الغلا فديتج تسلمين ع الرد

الموقف صعب
والله لو منج جان صورتها على الأقل لو تكلمتي او قلتي شيء ، يصدقون كلامج
شوفي من الأخر ابتعدي عنها ، باين من كلامها انها ما تستحي ، يعني على الأقل كان كلمتج و قالت لج انا احبه او جية
هاي عينها قوية واااايد و مب خايفة
لذلك لا تتدخلي عمرج في مشاكل معاها ، ممكن تتبلى عليج ، فانسي موضوعها و طنشيها و كل واحد يتحمل مسؤولية اعماله

لا حول ولا قوة الا بالله