فالبدايه أتمنى هذا القسم المناسب في طرح الموضوع..
ندخل فالموضوع , خواتي الغاليات عندي استفسارات و أسئله حول بيت الطاعه وأتمنى تجاوبوني بالذات اللي عندها تجربه او خلفيه ^_^
1. شو يعني بيت الطاعه ؟ هل القصد منه إذلال الزوجه ؟
2. هل ممكن يكون الزوج ناوي نيه سيئه في استرجاع زوجته كي يذلها ؟ يسكن معاها بنفس البيت او لا ؟
3. اللي عندها تجربه لما رجعت لزوجها كيف كان الوضع ؟ هل تصلحت الأمور ورجعت المياه لمجاريها؟ في أمل لهذا الشي؟
4. هل وجود الأبناء له دور في تصليح الأمور بين الأم و الأب ؟
5. كيف ممكن بناء حياه جديده من بعد المشاكل فالمحاكم ؟ كيف ممكن التعامل مع الرجوع من جديد كون الزوج والزوجه شالين وكارهين بعض؟
6. كيف ممكن كسب الزوج شو الطرق ؟
هذي الأسئله تدور فبالي 24 ساعه ماخذه كل التفكير واسمحولي اذا سألت بالتفصيل لأني أريد الجواب بالتفصيل بعد
كوني ف الموقف نفسه أنتظركم تفهموني الموضوع أكثر وتقدمون لي نصايحكم عن تجربه واللي فيها مصلحة لحياة الزوجه والطفل
شاكره لكم ^^
" أسأل ربي الذي قال وقوله الحق:
{ ادعوني أستجب لكم }
أن ينظر إليكم نظرة رضا لايعقبها سخط أبدا ويلبسكم ثياب العافية لاينزعها عنكم مددا آمين "
بس من الي اسمعه ان الريال يطلب الحرمه لبيت الطاعه لما تكون ناشز
وفالغالب يعاملها معامله موب اوكي ويقدر يسكنها في بيت متواضع جدا وجذيه
الاحسن اختي انج تصبرين وتتحملين معاملته لج اذا كانت سيئه وتحاولين تكسبينه
بالصبر والمعامله الطيبه والكلام الطيب وتحاولين تبتعدين عن النقاشات الحاده والجدال
والعناد يعني بشكل عام حاولي ما تسوين مشكله او ما يسحبج لمشكله
قابلي الاساءه باحسان منه لين ما يحس انج فعلا تغيرتي
وان شاء الله ربي بيحنن قلبه عليج
اختي احنا نتحمل كل شي عشان عيالنا لانهم اغلى ما عندنا
انا وايد صبرت على بعض التصرفات الي ما كنت احبها في ريلي
وسبحان الله موقف بسيط غيره ورجعه لزوجي الي عرفته اول شي وبنسخه معدله
والله يعينج ويوفقج
اذا وصلت الامور للمحاكم وبيت الطاعة معناته اكيد الموضوع مب سهل وبتواجه فيه الحرمة مشاكل كثيرة.. ولازم تكون صابرة ومتوكله على الله.. وبصراحة مب دوم بنظلم الرياييل.. فيه حريم يتحرون اذا سارو بيت اهلهم وطلعو عن شور ازواجهم وعاندو بيكسبون الزوج وبيلوون ذراعه.. ما يعرفون انهم اول الخسرانين وانه الزوج ممكن يتحمل اي شي الا انج تفشين اسراره واسرار بيته لاهلج وربعج وتخلين مشكلتج الزوجية على كل لسان..
اتمنى بعد ما تردين لزوجج تكونين اعقل منه وما تعاندين وتمشين على شوره دام شوره فيه رضا الله سبحانه وتعالى.. حاولي تكسبين رضاه والله يهدي بالكم..
والله كلنا متحملين وصابرين عشان عيالنا.اللي لاحول لهم ولاقوه.محتسبين الاجر من الله-كله بأجره.الحمدلله
بس اتوقع فالبداية لازم الوضع يكون "مكهرب" وسيء بين الزوجين
لكن لو في نية للإصلاح … ممكن ترد المياه لمجاريها ويتصالحون ليش لا … بس لازم مجهود من الاثنين الزوج + الزوجة