تجمع الزوجات الثانيات تفضلو شاركونا وخلونا نستفيد من تجارب بعض 2024.

السلام عليكم و عرحمة الله وبركاته

أدري اني بحصل هجوم على هالموضوع ويمكن أحصل تأييد , بس هذا واااقع ما نقدر نهرب منه
الكل يعرف انه تعدد الزوجات لاهو عيب ولا منكر ولا حرام ومعضمكم شاف في حياته تجارب ناجحه وتجارب فاشله ,بس ما سألنا نفسنا شو سبب نجاح هاي الحاله ؟ وشو سبب فشل هاي الحاله؟ يمكن مرينا ما بغي اقول كلنا لكن معضمنا بهالتجربه بطريقه مباشره او غير مباشره ممكن وحده ابوها يكون معدد واتكون امها زوجه اولى او زوجه ثانيه , ممكن عمها ممكن خالها وممكن اقرب من هذيل كلهم ريلها
خواتي هذا الموضوع يهمني وايد ويهم فئه من الحريم اللي هم في مثل حالتي , أنا حبيت اعرض تجربتي لنه واايد اللي ما خذين فكره عن انه الزوجه الثانيه يا تكون ظالمه و عايشه سعيده على حساب غيرها وانها هي اصبحت الكل فالكل ومثل ما يقولون اليديد حبه شديد أو مظلومه وحقوقها مهضومه ومحصله نص ريال هذا اذا ما كان اقل لأن الأولويه للأوليه (ما الحب إلا للحبيب الأولي)…
ما بطول عليكم في المقدمه وبخبركم عن تجربتي
بتسألوني انتي من اي فئه الظالم أو المظلوم بجاوبكم لا هذي ولا هذي انا الحمدلله ما خذه حقي كااااامل وعاطيه غيري حقه كاااااامل, بتسألوني كيف أنا يا خواتي قبل ما أعرف حق الناس أعرف حق الله وأعرف إن الظلم ظلمات يوم القيام صح إني أنا زوجه ثانيه لكن هذا نصيبي هذا اللي الله كاتبنه لي ياخواتي في امور الانسان فيها مخير وفي امور يكون فيها مسير ومن الامور اللي الانسان يكون فيها مسير أمر الزواج ومنو يكون الزوج؟ والنصيب شو بيكون في هالزواج ؟والامور اللي هو فيها مخير هي كيفية التعامل ويا الناس اللي حوله أنا الحمدلله كسبتهم بحب و طيب وحسن تعامل وهم والله صارو أحسن عني عاملوني بالمثل وأحسن
ألحين بخبركم بقصة زواجي…. بعد ما كملت درا ستي حسيت بفراغ لني أنا أصغر وحده في اخواني وكلهم اولاد ومتزوجين وظاهرين من البيت محد غير انا والوالده والوالد الله يطول بعمارهم حسيت بملل مع انه مب قاصرني شي قلت ليش ما اشتغل واظهر للدنيا واشوف الناس والشغل تجربه حلوه وأنا مب خسرانه شي على الاقل علشان الشهاده اللي خذيتها , المهم الحمدلله توفقت وحصلت شغل في دائره حكوميه في البدايه شفت الشغل صعب قلت في نفسي مع الاستمرار بتتلاشى هالصعوبه ,صح إني قدرت أغلب على صعوبة الشغل لكن ما قدرت اتغلب على صعوبة التعامل ويا الموظفين لأن أغلبهم رياييل وأنا بحكم تربيتي ما احتكيت أبد مع الرياييل وهذا غير على إني ملتزمه ومتنقبه فحسيت بصعوبه شوي المهم يا دوب كملت ثلاث شهور ونص في الشغل وقدمت إستقالتي الكل إتفاجئ علشان أنا كنت موظفه نشيطه و أثبت وجودي في الشغل وشاله شغلي وشغل غيري استنكرو هالشيئ وحاولوا يقنعوني بس أنا كنت ملزمه على الاستقاله المهم وصل الخبر للمدير وطلب مقابلتي سرت للمقابله سألني عن سبب الاستقاله خبرته السبب إني مب مرتاحه في الشغل مب عشان شي بس لني أحصل صعوبه في التعامل ويا الرياييل سألني اذا حد ضايجني جاوبته لا , المهم وقع على الاستقاله وأنا ظهرت من الشغل , وبعد اسبوع من يلستيه في البيت رن تيلفوني منو تتوقعون؟ مديري سألني نفس أسألت المقابله وانا جاوبت نفس الاجوبه بس حسيت انه مرتبك شوي المهم المكالمه ما ستمرت دقايق , بعد يومن من المكالمة الاوليه رن التيلفون مره ثانيه منو تتوقعون؟ ههههههه صح بعد المدير وهالمره الاسأله الاوليه نفسها لكن زاد عليها السؤال عن شهادتي اونه ما يعرف تراها عندكم في الملفي كامل هههههههه , واتكررت اتصالات المدير وفي كل مره يزيد سؤال ويزيد وقت المكالمه , بعدين صارحني بأعجابه وانه بيغي يدش البيت من الباب وانه بالعربي يبغي يخطبني انا فرحت بس كتمت فرحتيه لني كنت أعرف انه متزوج وعنده عيال لكن هو بين لي انه هو بحاجه لحرمه ثانيه و ما بيقصر في شي وا هو متفاهم ويا حرمته الاولى على امر الزواج من ثانيه , ما اخفي عليكم انا كنت متردده في البدايه لكن استخرت أكثر من مره وشاورت مرة اخويه اللي هي في الاصل قرب صديقاتي قلتلها انا ما اقدر ارتبط بانسان متزوج اخاف اظلم نفسي والا ظلم مرته وعياله قالت لي انتي شو رايج فيه قلتلها الصراحه كل بنت تتمناه لكن عيبه انه متزوج,سألتني اتحبينه استحيت و سكت (أنا صدق حبيته) قالت شوفي دام هو حاط في مخه فكرت الزواج بيتزوج اذا مب انتي غيرج وانتي أعرفج زين مستحيل تظلمين حد وشدراج انها اللي بيتزوجها ما تنكد حياته وحياة عياله المهم تميت يمكن فوق العشر ايام اصلي الاستخاره بعد كل فرض وهو يتصل ويسألني أقوله اصبر بعدني افكر , المهم اتصل مره و سألني لين وين وصلت في تفكيري و يبغي يعرف ردي الحين قلت في نفسي لا خاب من ستخار الله انا بقوله اتوكل على الله وتعال كلم اهلي وبترك الامر لربي هو كفيل بكل شي , اتقدم ابو الشباب والاهل رحبو فيه وظهرو يعرفونه زين وان في صلة قرابه بينا من بعيد المهم تيسر الامر و عرسنا , واجر لي بيت وانا حاولت اتقرب من زوجته واولاده واكسبهم شفت مرته حذره في التعامل ويايه وايد وهذا من حقها بس لعيال وايد حبوني فديتهم وانا حبيتهم , المهم اتعبت مرته لأنها تعاني من مرض السكر ودشت المستشفى وانا نسيت انها عديلتيه بالعكس وقفت وياها وقفت الاخت و حطيت عيالها في عيني طول فترت وجودها في المستشفى اوصلهم المدرسه اذاكرلهم صح انه الفتره قصيره اسبوع بس غيرت وايد من ظرتها لي وكنت احس في عين ريلي نظرت الفخر وهو يشوفني واقفه وياها وانا كنت في بداية حملي الاول في هذيج الفتره, وبعد ما ظهرت من المستشفى كنت كل يوم ازورها أطمن عليها او هي تزورني واذا ما زرتها تتصل اوانا اتصل كنا نتسابق منو اللي تسأل عن الثانيه اول , تبغون الصدق حبيتها والله من كل قلبي المهم بعد فتره يمكن اربع شهور توفت امها الله يرحمها وانا كررت وقفتيه وياها وهيه دايما تشكرني وانا اقولها هذا واجب وما عندي اغلا منج انا مالي خوات والله رزقني باخت مثلج و هي كانت اتقولي انا احمد ربي الف مره في اليوم لنه عطاني عديله مثلج , وبعد ما ربيت يبت بنوته حلوه سميتها على اسم امها واااايد فرحت المسكينه وتعلقت بنتي وصارت ما تصبر عنها واصرت على ريلي انه ينقلنا عندهم في البيت بس انا رفضت الا ذا بنالي بيت في الحوش عندهم , انا ما كنت بكلفه فوق طاقته بس ادري انه هو ما عليه قاصر ويقدر يبني بدال البيت عشره وكان حاط في باله يبنيلي او يشتريلي بيت بروحي المهم هو فرح وايد من هالقرار وما صدق وانتقلنا عندهم في البيت وانا الحين عندي ولد وبنتين الله يحفظهم وحامل في الشهر السادس, ربو عيالي مع اخوانهم وما أنكر انها شاركتني في تربية عيالي كنا نتسابق انا وهي منو اللي تقدم خدمه للثانيه قبل, كل هذا وانا احس انه ريلي فديته طاير من الفرحه فينا و انا الحمدلله مرتاحه وما احس باي تقصير من ناحية ريلي اذا كان عندي ينسيني اني مرته الثانيه وانه عنده مسؤوليه غيري ومن ناحية الحب انا لين الحين ما دري منو يحب اكثر المهم يوم يكون ويايه يحسسني اني انا الوحيده اللي في حياته الله يخليه لي يا رب ويطولي في عمره ويمكن هي يعاملها نفس المعامله وهذا سبب من اسباب النجاح في حياتنا, أنا أحمد ربي انه رزقني عديله مثلها واحمد ربي ألف مره انه رزقني ريلي فديته اللي يعامل الكل بحب وحنان دون تفرقه …….

قولوا:

((ما شاء الله تبارك الله لا قوة إلا بالله ))

يمكن طولت عليكم شوي بس ما عليه اتحملوني لأن ادري وايدين بيستفيدون من تجربتي
هناك بعض النقاط لازم ننظرلها بعين الاعتبار قبل ما توافق الوحده اتكون زوجه ثانيه وهي :
1- هل هذا الريال قد المسؤوليه؟ وهل هيه نفسها قد المسؤولية (الزوجه الثانيه) ؟
2- توزن الأمور بعقلها مب بقلبها ومشاعرها
3- تكون صادقه مع نفسها
4- تاخذ بحكمة (لو كان بيني وبين الناس شعره ما انقطعت لو شدوها ارخيتها ولو أرخوها شددتها)
5- تحط جدام عينا عدة اهداف أهمها راحة زوجها وبعدين راحة زوجته وعياله واذا ارتاحو هم أكيد بتتحقق راحتها وسعادتها
6- واهم من هذا كله تحط هدفها الاول والاخير رضى ربها .
7- نصيحه لا ترتبطين بالانسان اللي حالته الماديه تعبانه لأن الريال يمكن ما يقدر يعدل في قلبه وهذا شي غير ملموس لكن الناحية الماديه شي ملموس والريال اللي حالته الماديه تعبانه مستحيل يقدر يفتح بيتين واذا فتح بيتين لازم بيكون فيه قصور ويا ترا منو اللي بينوبه القصور من الطرفين؟

خواتي ترا انا حاله من حالات الزواج الناجح ولله الحمد لكن هذا ما يمنع من وجود حالات فاشله , اتمنى اتشاركوني بتجاربكم وخاصه من الزوجه الثانيه هل هي سعده في حياتها ؟ شو سبب سعادتها ؟ واذا كنت مب سعيده شو السبب؟ ولا مانع الزوجه الاولى بعد اتشاركنا وتخبرنا عن كيف تتعامل ويا عديلتها وخلونا نستفيد من تجارب بعض يزاكم الله خير

((((((( لاتنسون انه في البدايه وفي النهايه كل شي قسمة ونصيب , وكله بأمر الله الذي يقول للشيئ كن فيكن )))))))
وادعولي بالتوفيق والحياة السعيده الله يسعد كم جميعا ويسعد كل من يشارك أو يمر على الموضوع