السلام عليكم خواتي الغاليات
الموقف اللي بذكره أكيد ان الكثير من البنات مرو بنفسه
الموضوع صار له فترة طويلة
لكني للحين أحس بقهر وغصة
ودي أنسى لكن……………. ما اقدر!!!!
تعالو أسمعو السالفة واحكمو بنفسكم
هي صديقتي، معاي في سنوات الدراسة وما بعد التخرج
كنا في الجامعة ونطلع ونستانس على طول مع بعض
وتقول لي كل أسرارها
في يوم من الأيام اتصلت فيني
قالت لي/ فلانة فيه شخص متقدم لي وانا مترددة و……. الخ
قلت لها/ استخيري ولو بغيتي اخواني يسألون عنه عطيني أسمه الكامل ومكان شغله
قال/ لالا لما أقرر بعطيج أسمه
قلت لها/ على راحتج
مرت الأيام
وانا اتصل فيها
ما ترد
ادز لها مسجات
ما ترد
استغربت من الوضع
وأخيراً سألتها في مسج/ وينج فلانة عسى ما شر ما تردين علي؟ وشخبار الموضوع؟
ردت عليّ أخيراً / انا بخير والحمد لله، وماقدرت أرد عليج لأن ما صار شي
رديت عليها/ الله كريم ( من المسج واضح انها تقصد ان الموضوع ما تم، وان الخطبة تفركشت)
بعدها بكم يوم
كنت مع أمي وأختي وزوجات اخواني في زيارة لناس معرفة، وتلاقيت مع حرمة تعرفني وتعرف صديقتي فلانة، وهي تسلم علي، تقول لي/ شلون فلانة شخبارها مع تجهيزات الخطوبة؟
انا/ انصدمت، أحمر وجهي
قلت لها/ فلانة انخطبت بس موضوعها ما تم، ورفضت الخاطب
الا تقول لي الحرمة/ لا يا حبيبتي فلانة تستعد للملكة، وشايفتهم هي وابوها وخطيبها في المستشفى يسوون فحوصات ما قبل الزواج
يا بنات بالله عليكم وش تتخيلون موقفي وانا مع امي واخواتي؟؟؟؟
هم يضنون اني انا القريبة المقربة منها واللي ما تخبي عني سر
معقولة تنخطب وانا آخر من يعلم؟
ولما اسألها بالمسج تقول لي (ماصار شي)
ولما اتصل بها ما ترد علي؟؟؟؟؟
حسيت اني بموت من القهر
بلعت القهر وتركتها ولا كلمتها ولالالالالالالالالالا كأني سمعت شي
بعدها بكم يوم
دزت لي مسج تقول لي فيه/ فلانة بقولج شي ولا تزعلين مني، ملكتي بعد بكرة، وسامحيني لاني ما قلت لج، لأن أبوي اتفق مع الرجال من غير لا يقول لي وتفاجأت بالموعد.!!!!!!!!!!!!!!!!!!
والله يا بنات حسيت اني بنفجر من القهر، ما توقعت منها هالموقف الحقير، وتكذب علي تقول انها تفاجأت بموعد الملكة اللي ابوها حدده مع الرجال، والكل يعرف ان قبل الملكة لازم يكون فيه فحص ما قبل الزواج (وهذا شرط ضروري عند العقد)
ذيك الليلة ما نمت من القهر
تبادلت معاها مسجات عتاب كثيرة
وهي ولا كلفت على نفسها تتصل فيني وتكلمني
اكتفت بس بالمسجااااااااااااات
طاحت من عين أهلي وصارو يكرهونها من بعد ما شافو حالتي، وشافوني مكسورة، تخيلو يا بنات ولا كلفت على نفسها بأأأأأأأأأأأأأأأأي شي، والموضوع عادي عندها وانا مت من القهر
المهم
خليتها
وقلت بكون أحسن منها وبتصل أبارك لها بالملكة
اتصلت
واتصلت
واتصلت
ودزيت مسجات
ولالالالالالالالالالالالا من مجيب
معقولة
لهذي الدرجة هنت عليها؟
لهذي الدرجة زعلي ما همها؟
لهذي الدرجة باعتني؟
وانا اللي كنت اتوقع انه في يوم ملكتها بكون معاها لحظة بلحظة
المهم
بعدها بأسبوعين اتصلت (أمها) تعزم أمي على الخطوبة (في صالة أفراح)
ومن طيب أصلي وتربيتي (الحمد لله) قلت بروح علشان خاطر أمها اللي تـعنت واتصلت بأمي
أمي رفضت تروح لانها خلاص كرهتها
رحت انا وزوجة أخوي
ولما شفت صديقاتنا (صديقات الجامعة) شفتهم في حفلة الخطوبة، كلهم يسألوني عن العروس؟ وعن تفاصيل الخطوبة والزواج وووووالخ؟
وانا اقول لهم/ تراني مادري بشي، انا حالي حالكم، معزومة مثلكم، وهم مستغربين لانهم يعرفون ان فلانة + فلانة = تؤام!!!!!!!!!!
ولما دخلت العروس بصعوبة قدرت امسك دموعي، ما توقعت اني ما اكون معاها في هذي اللحظة وانا صديقة عمرها
ولما رحت اسلم عليها وهي على الكوشة
سلمت عليها ببرود
وهي تسلم بحرارة
وتبيني أصور معاها على الكوشة
اعتذرت منها بحركة من يدي معاناها / ما بيني وبينج شي خلاص
وبعدها بكم شهر تزوجت من غير حفلة، واتصلت فيني تسلم علي قبل لا تسافر شهر العسل، كلمتها برسمية وكأنها غريبة
وبعد الزواج رحت ابارك لها زواجها بشكل رسمي جداً
وبعدها بكم شهر
ارسلت لي مسج تقول لي انها نايمة في المستشفى
اتصلت اسألها / عسى ما شر؟
قالت لي/ انفلونزا شديدة (تكذب)
وبعدها بفترة سمعت من ناس قريبين منها انها لما كانت في المستشفى كانت جاهظة (حامل وسقط الجنين) استغربت انها تكذب وتقول لي انها (انفلونزا) مع انها هي اللي دازة المسج تقول لي/ انا في المستشفى
الحين هي اللي تتصل وترسل مسجات عن الصداقة والشوق !!!!!!!!!!!!!!!
وتقول لي لما تتصل/ من زمان ما شفتج ولا طلعنا مع بعض ووو الخ
وانا اكلمها برسمية حالها حال أي وحدة غريبة واتعذر لها بالدوام ومشاغل الدنيا !!!!!!!!!!!!!!!!
بعد مرور كل هذا الوقت على هالحادثة اللي أثرت فيني بشكل كبير وانا للحين مقهورة عليها وعلى طريقة تعاملها معاي
بكل بساطة تبي ترجع صداقتنا مثل ما كانت
بعد كل الألم اللي سببته لي تبي ترجع عادي؟؟؟
اللي قاهرني انه لو كانت هناك ظروف أجبرتها ان تكون ملكتها بشكل سريع جداً وانها تتكتم على خبر ملكتها، ليش قالت لي في البداية ان في شخص متقدم لي؟
ولو انا مهمة عندها ولو هي حريصة على مشاعري وعلى صداقتنا، ليش ما كلفت على نفسها اول ما ملكت وخلصت ليش ما اتصلت فيني تاخذ ما في خاطري؟؟؟
والله يا بنات انها لو جابرة بخاطري ومكلمتني والله اني برجع لها وبعذرها
لكنها تعاملني بالمسجات فقط + تطنيشها لاتصالاتي لها وكأنها تخاف مني، معقولة تظن اني بحسدها لأنها انخطبت وتزوجت قبلي؟ هذا الشي يقهر كل انسانة عندها كرامة
تخيلو حتى خدامتنا تسألني تقول لي/ الحين ليش ما تطلعين وتزورين فلانة مثل أول؟!!!!!! لانها تخبر اني معاها مثل الأخوات!!!!!!!!!!!!!!
اللي مريحني شوي، اني انا الحمد لله عمري ما قصرت معاها في حق من حقوقها، كل واجب لها أحضره، والحمد لله اني ما خسرت ولالالالالالا شي من بعدها، بالعكس هي اللي خسرتني خصوصاً ان هي ما لها صديقات ابداً غيري، حتى بنات الجامعة علاقتها معاهم علاقة مجاملات فقط….
اللي مضايقني اني مب قادرة انسى الموقف اللي سوته فيني
صرت اكرهها وأكره اسمها واكره طاريها وطاري أهلها
وأكره وجود رقم جوالها عندي
وأكره مسجاتها واتصالاتها
واتجنب أحضر حفلات زواج أو زيارات أعرف انها (احتمال) تكون هي أو حتى أحد من أهلها موجود فيها
ابي اقطع علاقتي معاها نهائياً
ما ابي اي شي من صوبها
مابي اتصالاتها ولا مسجاتها
لكني مب قاااادرة اتخلص من ذكراها
شرايكم يا بنات في مثل هذي الإنسانة؟
صباح الخير
اول شي اذكري الله واستغفري عسى ربي يفرج همج
الانسان معرض للخطأ يا عيوني وماحد معصوم من الخطء
وكل انسان مثل مافيه خير فيه شر ولو قليل وربي اعلم بهالشي
انا لو مكانج بنقهر وبمووووووت بس مستحيل ايلس احرق في عمري سنين
تعرفين شو الي مخلنج جيه تعبانه انج ماواجهتيها
وحده من الثنتين يا انج تجاهلينها وبدون الم نفسي وهذا الحل حق الي ما يعانون مثلج
يا انج تتصلين فيها وتيلسين معاها وتقوليها الي قلتيه كله النا وتقوليلها ابا اسمع منج الصدق
ماحد منى ما يخطء بس انا مااقدر ارجع صداقتنا لاني شاله في قلبي منج وااااااااااااايد
يوم خطبج ووافقتي ليش جذبتي
يوم الملجه ليش جذبتي
يوم المستشفى ليش جذبتي
والله له المثال الاعلى يا عيوني يعفوا عن الناس ويسامحهم ويجزيهم
جنات عرضها السماوات والارض ولا تنسين الكاضمين الغيض والعافين عن الناس
شو بتستفينين بالمواجه هذي ان الحره الي تحسين فيها بتروووووح
وبيكون يا انج تخلين علاقتج فيها رمسيه وبتكون بدون الم او تقطع فقط بالسلام
او ان تعود المياه لمجريها وقبل لا تتصلين فيها صلي الاستخاره
عشان ماتندمين مخاب من استشرا وانتي استشرتينا وما ندم من استخر وباذن الله
مابتندمين وربي يوفقج ويسعدج
اقول لها عن الخطبة كيف الموضوع تم بسرعه و انتي تعرفين ان لازم فحص و غيره و عن الاجهاض كنت تقولين لها انج عرفني وما يحتاي تخبين و تخبين علي منو على توأمج
بيني لها ان حبل الجذب قصير وانها لما تجذب على طول انتي تعرفين الموضوع الصح من ناس ثانية
و الله احس جي هي بنفتشل منج و حق شو هاي تسوي افلام هندية
بس والله البنت اذا يت واعتذرت مني بسامحها
حتي صديقاتي يقولون لي ليش انتي جذه طيبة
تري الطيبة الزايدة ما تنفع
والله الدنيا ما تسوى
كوني احسن منها وع فكره هي بتستحي
ع ويهها ع الامعامله اللى كانت اتعاملج
اول شي لا تزعلين لانه ماشي يستاهل احد يزعل عليه وبتمين انتي وربيعتج خوات على طول وان شالله تكون رفيقتج بالجنة أختي عذريها وعطيها فرصة ومافي داعي تكرهينها وانا متأكدة انتي ابد ماكرهتيها على العكس بعدج تحبينها وتتولهين عليها وتحتاجينها معاج بس مقهوره منها سيريها بالمسجات لين هي تتصل فيج وانا اقولج انها راح تتصل وتتطلب تسامحينها لانها تحتاجج ولا تخلين عنها ابدا وهذه نصيحة انا اعذرج انج تزعلين بس انتي قلبج كبير وكلج احساس وتفهمين اكثر عنها والله والله لاتكدرين خاطرج وريحي عمرج ولاتخلين امج تكرهها وعذري لامج انها كانت مشغولة وعذرها معاها والله مب حلوه امج وخواتج يكرهون ربيعتج ترى راح يكون لهاعواقب عقب اذا رديتو وانا متادكة انكم راح تردون لبعض واحسن عن قبل وصديقني البنت ماتبي تتعبج في امور مثل الاجهاظ وتحاتينها ولاتبي تزعجج يمكن ملجتها استوت غصبن عنها او صار مشكلة في فترة الخطوبة من اهلها واستحت تخبرج عطيها عذرها بس لاتخلين عنها لانها محتاج لج وان شالله تحصلين اللي يبرد خاطرج واي خدمة انا حاضرة وبتوفيق اختي
المشاركة الأصلية كتبت بواسطة الثريــا 
:: لـكِـ يامـن كنـتِ صديقتـي ::
حبك سحابه عابره في حياتي
مرت سمايه وانجلى الغيم وانزاح
..
.
حبيت اضيفه في موضوعج
واقول لج ترى الحقران يقطع المصراااااان
وعني انا .. اشوف ان اللي يبيعني والله لابيعه وبارخص الاثمان
ترى والله صعب ان الشي ينجبر بعد الكسر
وفيه اشيا وايده ماتنجبر .. وانا اعتبر الصداقه مثل الزجاج
أي شرخ يتبعه شرخ ثاني يسبب الكسر