حبيباتي الامهات .. الي اول مرة يحملن والي حملوا قبل ..
الف مبروك عليكم مجهودكم في التعب والسهر لبداية اول خطوات المسؤولية
نزلتلكم قبل موضوع عن ( كيف نعيش لحظات الحمل بكل حب ونجمع اكبر قدر ممكن من الذكريات)
واليوم في هالباب ( باب الحمل والولادة)
لقيت وايد بنات يجهلون كيف يرتبون شنطة الحمل ومتى يرتبونها .
بنبدأ بنبذة صغيرة عن الشهور الثلاثة الاخيرة من الحمل اول شي
عشان نعرف الي لنا واللي علينا ..
يالله نبدأ
بسم الله الرحمن الرحيم
فترة الحمل 9 شهور لكن طبيا تحسب 40 اسبوع
و9 شهور من 40 يعني 36 اسبوع فقط
لكن الدكتورة تعطينا ما بين اسبوعين الى ثلاث اسابيع فوق 36 كتاريخ نهائي للولادة
يعني مثلا اذا كان موعد ولادتج 8-5-2012
انتي تاريخ 16-4-2012 تكونين مخلصة التاسع بالكامل
لكن ما يكون عندج طلق وبتالي يضيفون لج اسبوعين كحد نهائي للولادة.
ليش كل هالكلام يا ( غالية) عشان نعرف متى نستعد لأول مخاض للولادة
يعني لا تعتمدين اعتماد كلي على تاريخ الولادة .
يا تحسبين حسابج قبلها باسبوع او اسبوعين او بعدها باسبوع او اسبوعين.
الحين نبدأ بموضوعنا .
اول ما ادشين الثامن ابدي اشربي ماي وايد وايد وايد قد ما تقدرين
واذا كنتي من النوع الي ما تشرب الماي وايد ضيفيله نكهه انتي تحبينها
مثل ملعقة ماي ورد او اشربي ماي زمزم وخلي غرشة الماي دايما جدامج عشان تذكرين
حاجتج الها .
ثانيا كلي قد ما تقدرين سلطة
وعشان تحبينها ضيفيلها صلصات مثل سيزر وخل وليمون
او نوعي بسلطات يعني مرة تبولة ومرة فتوش ومرة سلطة سيزر ومرة كوكتيل ربيان
ثالثافي الشهر الثامن يبدأ نمو الجنين بسرعه اكثر عن قبل
كيف تعرفين هاشي .. اكثر شي بتحسين فيه اسفل الرحم عند النوم بثقل الى جانب ملاحظتج
لنمو بطنج كل اسبوع بسرعه اكبر .. ومن اهنية في هاي الفترة بذات تبدأ عندج حكة البطن
ابدا لا تحكين بطنج وعلى طول ادهنية بزيت زيتون
او فتامين E متوفر في جميع الصيدليات
عشان ما تندمين بعد الولادة من العلامات الي سببتيها لنفسج من الحك وتمدد البطن.
ابدي تفطرين الصبح يوميا بسبع تمرات لتسهيل الولادة
وطبعا تاكلين فطورج
بالاضافة للحديد والفوليك اسيد.
عشان تنجنبين الامساك وتعسر الولادة وصعوبتها سوي الخطوات الثلاث هاي من الحين لين موعد الولادة
حتى لو كنتي مخلصة الثامن او ماباقي شي على ولادتج.
الحين خطوة جدا مهمة .
عند الولادة للي مجربة الولادة والي ماجربت
مع الزفير والدفع وحسب حجم رأس الطفل يتم اهني بذات شق الرحم لتوسعة
والشق هذا اما ان يكون داخلي او خارجي..
عشان تجنبين الشق والخياطة ..
وحتى لو كان فيه شق يكون بحجم جدا بسيط
استعملي هذا الكريم الخاص لمنطقة الشرج + تستعملين زيت زيتون لرحم من الخارج .
وهالخطوة تسوينها حتى لو كنتي سايرة تولدين.
ليش؟؟
لانها تساعد على ترخية هالمنطقة وبتالي ما بتحسين بألم وقت الولادة او بعدها
لان المنطقتين بيكونون في حالة مسترخية ولينة.
خلصنا من ماقبل الولادة.
وحطي فيها :
عدد 3 بجامات قطنية ( خذيتهم من لاسينزا)
ملابس داخلية استعمال واحد ( خذيتهم من مذركير)
حمالات صدر لرضاعة( خذيتهم من مذركير)
محارم قطنية لتسرب حليب الصدر( خذيتهم من مذركير)
محارم خاصة بالخياطة تساعد على تلطيف مكان الخياطة وسرعة سقوطها( خذيتهم من مذركير)
وممكن تاخذين هالمحارم لانها كبيرة نفس الى يعطونج اياها في المستشفى
انا خذيتها للأربعين ( من مذركير)
جوارب قطنية انا خذت 3 (من اوشو)
روب يا بنات ضروري ويكون ثقيل شوي عشان تجنبين حمى الحمل ( من اوشو)
مزيل للعرق من كلينك ( خذته من باريس غاليري)
عدة تنضيف الوجه الي متعودة عليها انتي وانا استعمل كلينك ( خذته من باريس غاليري)
كريم لترطيب الجسم( من بودي شوب) خذيها بزبدة الشيا
عطرج ويفضل يكون بريحة خفيفه انا خذت ارماني لان ريحته وايد بارده نفس الاطفال
غطاء لرضاعة لوقت وجود الزوار
شيلة سادة ( من امايه .gif "12 (64)")
)
فوطه للوجه( دبنهامز)
فوطه للجسم ( من دبنهامز)
عباة وشيلة حق يوم بتطلعين من المستشفى
+++++++++++++++++++++++++++++++++++++
قبل ما تاخذين البامبرز
عند اخر اسبوع لج زيارة لدكتورة اسألي عن وزن البيبي
وبناءا عليه اشتري البامبرز عن تجربة طبعا..
خذي طقم الي يكون كامل مثل هذا ( خذته من مذركير)
يكون من ثمان قطع
( بعض المستشفيات ما يخلونج اتلبسين البيبي الا يوم بتطلعين من المستشفى)
والبعض يسالونج اذا تبين تلبسين البيبي من الملابس الي انتي يايبتنها)
عشان جي خذا احتياط من هاطقم 2 ليش؟؟
لان اللي تييب ولد تيلس اكثر واحيانا البيبي ينولد وفيه بوصفار او او او فلازم يكون لج احتياط من الملابس لج وله .
غطاء له حق يوم بتطلعين ( مذركير)
سلة حق يوم بتطلعين ( مذركير)
خلصنا من الشنطة .
واتمنى تكونون استفدتوا من موضوعي
وجميع هالاغراض نفسها الي انا خذيتها وحطيتلكم الاماكن اذا حابين تشترون.
ملاحظة( مب شرط تاخذين نفس الماركات هاي .. انتي حرة بختيارج )وفي الاخير اتمنى ان الله يسهل علي وعلى كل حامل ولادتها ويقر عينها وعن زوجها بمولودها امين
ويرزق كل من انحرمت يارب بالحمل عاجلا غير اجر
وصلاة والسلام على سيدنا محمد صلى الله عليه وسلم .
بليز لا تنسوني من الدعاء ادعولي باقيلي شهر ونص عالولادة ..
وترقبوا موضوعي اليديد
توزيعاتي لبنتي من صنع ايدي للمستشفى