اخواتي انا صار لي متزووجه ما شاء الله من سبع سنوات وعندي ولله الحمد 3 بنات ما شاء الله الكبيرة صف اول والثانيه كجي ون والصغيرة عمرها سنه بتقولون عندج عيال وحاسه بملل هيه نعم حاسه بملل وفراغ وروتين يومي ساكنه عند اهل ريلي يعني لا مطبخ ولا بيت احاتيه ريلي يداوم بعيد وانا عللا وتيره وحده حتى غديت اسهر طول الليل وانام الفجر عشان اخطف الوقت فشو الحل حتى نفسيتي تعبانه لانه ريلي يداوم بعيد عنا وانا عندي فراغ في حياتي كبير اخواتي ابا نصيحتكم ريلي وكيف ارتب حياتي
امممممممم والله انا مستغربة ماشاءالله عندج 3 واتحسين بملل الله يخليهم لج
الغالية حاولي تشغلين وقتج مثلا إذا إنتي من النوع لي يحب يقرا إشتري كتب وحاولي تشغلين وقتج فيهم …..و ترى مثل مانقال نفسك إن لم تشغلها بالحق شغلتك بالباطل ……..حولي تنوعين عبادتج مثلا قومي الليل أو صومي أثنين و خميس وفيهم إدخلي المطبخ و سويلج فطور من إيدج تعلمي أكلات يديدة ….حاولي بين فترة وفترة تتزاورين وياربيعاتج مب لازم يكون في مناسبة للزيارة ……..دشي دورات إنتي تحبيها مثل دورة مكياج ,دورة كمبيوتر,دورة تزين الطعام ……..الغالية دوري حواليج أكيد بتحصلين شيء تكسريبه روتين حياتج
اقنعي زوجج انج تشتغلين يالغلا
ياقلبي…
هالحاله مرت علي واكيد مرت على غيرنا…
لاتستسلمين لها..
بيدج تقتلين الفراغ وتقضين على الملل
دوريلج على شي تستفيدين منه وتقضين وقتج به
انا كان عندي الوقت يمر علي وانا نفسيتي دمار والسبب الروتين اللي كنت اعيشه
اكسري الروتين وجددي شي بحياتج
فكري اي شي تسوينه يكسر روتينج ويقضي على الفراغ
عمل يدوي تتعلمينه
العصر دشي المطبخ وسوي حلويات
كتاب تقرينه ويفيدج
شي بغرفتج ركن زاويه اي شي فكري تستغليه بعمل يدوي منج
فكري ودوري اكيد هناك اشيا وايد تستحق نلتفت لها
أنا كنت مثلج عزيزتي،، سبع سنوات بالضبط و أنا على هالحال بصراحة كنت دايما ع الشات و المسنجر ويا خواتي و ربعي و مليت من هالحال.. طبعا حاولت اشتغل لكن ما كان يرضى اني اشتغل و حاولت ادخل اطبخ و عمتي ما تحب حد يساعدها فكنت دايما اتكلم في التيلفون ويا ربعي و اخواتي و امي و مليت مليت مليت.. لكن بعد ما تحولنا صار ظرف جبره يوافق اتعلم السواقة و الحمدلله قنعته احضر دورات.. و الحين محطيه جدول الحمدلله العب رياضة ساعة و اقرا قرآن و حضرت فوق العشر دورات في المهرجان و في مدارس العيال و عندي يمكن فوق ال 10 او 15 شهادة و صارت عندي خبرة اكبر في تربية الابناء و معاملة الزوج و الحين الحمدلله خلصت ال ICDL و درست دبلوم ارشاد أسري عن طريق مجلة الفرحة و تخرجت الحمدلله بتقدير حلو.. و الحين متعاقدة ويا أختي نراجع جزء عم مع التجويد و ختمناه و لله الحمد.. و الحين بنبدأ سورة النور أو البقرة.. و ناويه إن شالله التحق بدورة في المسجد اللي في الفريج احفظ سورة البقرة.. انتهزي الفرصة حبيبتي و لا تضيعين وقتج عزيزتي و إذا حابه اساعدج أنا في الخدمة..
أنا عندي عيال اكثر عنج واكبر عن عيالج .. واحس بالملل .. واستنجت الملل نابع من عدم تمكني من القيام بالأشياء اللي احبها،، فكل الأعمال اللي اقوم بها مجرد واجب اقوم به .. واعتقد هذا هو سبب الملل عندج..
المهم بعد مااكتشفت سر الملل في حياتي توصلت ان لازم اسوي شي انا احبه وأبغيه ومايكون واجب علي..
شوفي انت شو الأشياء اللي خاطرك تنجزينها في حياتك وشو الأشياء اللي وايد تحبين تسوينها وخصصي اوقات لهذي الأمور.. وان شاء الله بيطير الملل عنج.