بغيت رأيكم ونصايحكم اللي عندها خبرة وطريقة مضمونة 100٪ يا ريت ما تقصر معاي،،،،
تعبت واااايد تعبت مع ريلي،،،،
السالفة مب سالفة بنات ولا صلاة ولا …. 
المهم،،،
بدش فالموضوع دايركت 
ليش كله إحنا الحريم نرضي رياييلنا وهم اللي يعجبهم يسوؤه لنا واللي ما يعجبهم ما يسوؤه 
من تزوجت لليوم وأنا أتمنى من ريلي انه يهتم "ببشرته" اقصد بشرة ويه،،،،
ريلي يشتغل فمكان يطلب منهم قعدة الشمس ومبيت الصحاري وجيه يعني،،،
فصايره بشرته ابدااااا مؤ شئ 
والله انه التجاعيد ظهرت عويهه من غير السمار الفظيع ،،،
حتى شغلهم يطلب منهم لياقة بدنية وهو صاير ما يأكل مثل الناس ،،وهالشي منعكس عوجهه 
والله يا خواتي أحس بضيييييقة وخنقه يوم اسولف معاه ،،،
اشتريت له كريمات وعطيته نصائح عشان تتحسن بشرته،، لكن
يرد علي " شو الفائدة دام أني بظهر فالشمس " 
أنزين أنا مب قادرة أتقبل شكله والله ،،،، مب عارفة شا سوي ؟؟؟؟
أبي نصائح وأساليب أقنعه تعبت من عناده،،،،،
طبعا مب الكل جيه .. الحين فيه رياييل صارو يراجعون عيادات التجميل ويسوون ليزر وفيلر وما اعرف شو.. وبصراحة انا مب مع هالشي.. يعني الريال يتم ريال حلو انه يكون نظيف ومهتم بنفسه وجسمه ولبسه بس ما توصل للعناية بالبشرة بكريمات تفتيح ونضارة وليزر ( احس عيب)
ريلج من هالنوع ومستحيل تغيرينه بيعتبر هالشي مب من ضمن الرجولة.. بس بقولج طريقة ممكن تخفف وتساعدج..
الرياييل يحبون الحرمة تهتم فيهم وتدلعهم.. يعني مثلا كل اسبوع يوم ايي ريلج من الدوام قولي له شو رايك اسوي لك حمام مغربي وادعكي له جسم دعك .. وباليوم الثاني مثلا سوي له بدي كير ومني كير يعني نظفي ريله وايده.. ومرات سوي له فيشال انتي روحج.. ومرات مساج بالزيوت..
والله بيستانس وبيحس براحة ودوم يوم بتسوين هالاشيا سوي معاها مساج.. مثلا مساج للريل وقت البدي كير.. مساج للراس وقت غسل الشعر.. مساج للايد وقت تنظيف وقص الاظافر.. ومساج للويه وقت الفيشال.. صدقيني بيعيبه وكل اسبوع بيسوي لانج انتي تسوين له.. مجربة على فكرة.. وان شاء الله تنفع معاج هالطريقة
انزين انتي اشتريتي الكريمات وعطيتيه بس هو طنش
اوكي ليش ما تسوي له جو خاص
يعني اناره خافته وشموع وريحه فنانه فالمكان وجو بارد وعصير ومكسرات وهاي الحركات
وهالوقت انتي سوي له جلسة مساج او فيشل (تنظيف بشره) او تقشير
وعقب ما يخلص عطيه مرايه وقولي له هاه تحس بفرق او لا طبعا بيقولج هيه في فرق
او ان ملمس ويهه صار احسن وهيك يعني
انتي علميه هاي الاشيا وعوديه عليها
مره ورا مره وكل مره بيحب النتيجه عندها قلبه بيبدا يتعلق في هاي الاشيا
عقب ما عليج الا تحطين الاغراض فالتواليت وتخبرينه مال شو
هو روحه بيبدا يسوي وبين فتره والثانيه خصصوا وقت لكم الاثنين
حق هاي السوالف وبين فتره والثانيه احجزي له جلسه في سبا محترم ومنها يريح اعصابه
انا احب الريال الي يهتم في هاي الاشيا وايد مثل اخوي فديته فنااااان
وكشيخ ووايد يحب هالاشيا عكس حرمته سبحان الله
وعادي عندي لو ريلي سوا ليزر او فلر موب عيب منو قال عيب
شو بيتاثر برجولته اذا سوا هاي الاشيا
العيب الي يحف ويسوي ميكب الا حرام موب عيب وبس
اشتريت كريمات و ريلي منسدح قلت له تعال بسوي لك هاك الماسك الفظيع و سويت له
و عقب سألني تغيرت خرطت عليه قلت له و من هاك اليوم بدى يهتم
هههههههههه جربي ها الطريقة بيني ان الكريمات تغير و جي يمكن يهتم
بس اذا حبتي نصيحة تقبلي زوجك مثل ما هو عليه
لأنه في الاول و الاخير بيتعب من أجل لقمة عيش حلال
و بعدين ما يعيبو شي اذا كان بيهتم بنظافته
و لو كنت انا مكانك اترم كل تجعيدة و كل سمار ناتج عن تعبه و كده و شقاه و احاول اريحه و اسعده بقدر الامكان بدون ما اعقده من شكله
و لا ابين له اني منزعجة من مظهره و الله الراجل بيتعقد يا اختي و يصير يتهرب منك و من ملاحظاته
ربي يوفقك