تمت الخطوبه ويتريون الرد 2024.

السلام عليكن يا أحلى بنات

وصلتني رسايل خاصه من بنات والله اني وايد اشكرهن وكلهن حبن يطمنن شو صار على

موضوع خطوبتيه ف اشكر غاليه82 وفساتيني و روحي وقطرة ألم وجفابوظبي

والحين بخبركن ياسيدات الامارات شوه صار بالضبط يوم الجمعه 19/12/2008

طبعآ يوم الخميس فالليل ما ياني رقاد ف رقدت بالغصب الساعه 5وشي عقب الصلاه ونشيت

من الساعه 9 الصبح والكل مستغرب اخوي العود (بوحمد) غمز حق ماماه شفته جان يقولي :

شمسووه شو موعنج انتي ماتنشين قبل الساعه1 الظهر

قتله : شبعانه رقاد

قالي : علييييييييييييينا بس لاتخافينين طال عمرج مسنوده واخوانج ذيابه

وقلد صوت الذيب والله كلهم ماتوا م الضحك خخخخ

المهم تريقوا وانا من الخوف مالي نفس ع الريوق

المهم صلوا اليمعه وحطوا الغدا ونفس الشي مالي نفس ع الغدا

بعدين جيه ع العصر بدت الترتيبات ووصلت ام ريل اختي فديتها اعتبرها شرات امي يتنا لانه

ماماه فديتها تباه تكون حاضره

المهم سلمت على ماماتي الثانيه وقالت لي : ان شاء الله تتوفقين يارب وياه نحن بعد تخبرنا عن الريال وطلع والنعم ف اكتفيت بأبتسامه

وسرت اتزهب لبست جلابيه لونها ذهبي ومن تحت شرات التايقر ومطرزه من الصدر خذتها من راجو بلازا ماقصر خخخ 1300 ع جلابيه بسيطه

وماحطيت ميك اب بس جحال وغلوس وماماه تقوليه بس مكياج

فجأه واسمع صوت اخوي الثاني(بوغاليه) واقول في خاطريه هذا عاااد شووو ايفكني من لسانه

وكالعاده يباب وضحك واصل اخر الشارع

كلللللللللللللللللوش وهذي عادته اذا صارت مناسبه كله جيه خباال

((الله يعين حرمتك))

عقب ياني : (الغرشوب شو تسوين) هو كله يوم وحده فينا اتلبس يزقرها غرشووب

قتله والله شوفت عينك عقب قالي جحليني جحلته<< قالي سامت ولاااااه ؟؟

واقوله والله انك متفيج انا في شووه وانت ف شوه

قالي هذا ويهي لو يببت لج قبل الملجه اندوج جحالج>> هاته ماعندي غيره اصلي

اممم عقب حطيت بودي لوشن وعطر اختي يايبتنه لي اسمه أحبك من (الظبيانيه للعود )

ولبست شيله بعد تايقر وشعريه فليته وهذي خطة ماماه الله قالت اكيد يبن يشوفن شعرج

قتلها بعد تعرفين تتخططين هاه ؟؟

المهم ع المغرب جيه وصلوا العرب يااااااي قلبي وقف

سلموا عليهم

وانا بعدني عقب يت اختي قالت يدة المعرس طول الوقت تسأل وين

العروس ماجفناها وانا تعذرت بولدي قلت برضعه وطلعت عسب اتيين

المهم سرت عقب ماخلصت من ولدها اممم و الحريم الكبار اللي هن يدته وامه وعمته حبيتهن بوسه سبيشال ع الراس

والباجيات ,.وزعت عليهن بوستين بوستين يكفيهن

عقب يدة المعرس قالت : تعالي بنتي ايلسي حذالي ويلست عدالها وام المعرس تطالعني

وعمته وخواته

المهم طافت جي ربع ساعه ف استأذنت وظهرت كانت ام ريل اختي تطالعني حسيت انه قصدهاخلاص سيري

المهم سرت داخل يتني ضحكه ماعرف ليش تميت اضححححححححححك ضحك ماعرف م

الخوف ولا م الفرح ولا شو مادري

المهم اذن العشا واختي يابت خوات المعرس الغرفه اللي انا فيها عسب يصلن ويتوضن
انا كنت اصلي ويوم خلصت

جان تقولي اخت المعرس الكبيره : كبرتي عن قبل يوم نشوفج فالشارع عند البيت كله حافيه ويايه من الدكان

قلتلها : ذكريات الحاره الجديمه بس الاول اتحول

قالت اخته الثانيه : صارت عروس جم عمرج قتلها : 19

قالت لي هو اكبر عنج ب7سنين

مارديت بس ابتسمت

المهم عطيت كل وحده سيادة صلاه وصلن ويلسن وياي سوالف هني ارتحت حسيتهن وايد ok

لين يت ماماه زقرتني لان المعرس بيشوفني وسرت المهم وتمن خواتي وياهن

وظهرت عنهن

المهم النظره الشرعيه وما ادراك ما النظره الشرعيه <<تحجبت دخلت شعري طالعته نظره ونزلت راسي , ومتأكده انه مبحلق فيني

ف قالي : (طالعيني طالعيني مب غلط مب غلط) بس رفعت راسي جفته بعد نظره والا هوه شاق الحلج

ونزلت راسي زين شفته عدل

عقب خلاص روحوا وسرت يلست داخل والغرفه فضت الحمدلله واقول فخاطري امم شراتي ضعيف وطوله مناسب مب عملاق ok وافقي يابنت الناس خخخ

وعقب ماشي حطوا لهم العشا وجيه يعني ضيفوهم و بخروهم

ف قالوا بيسيرون طلعت مره ثانيه سلمت عليهم

وام المعرس تقول لامي : عاد ردوا علينا لانه ولدنا مستعيل على الملجه وجان وافقتوا ترانا

بنحددها فأقرب وقت

امايه تقولها كله من الله خير والزواج قسمه ونصيب والمكتوب ان شاء الله بيصير بس عطونا

فرصه ان شاء لله وبنرد عليكم

قالت ع خير ان شاء الله

وراحوا

عقب روحت ام ريل اختي وريلها لانه وراهم درب وهم من بوظبي حليلهم

واخوي قالنا انه ابو ريل اختي قايم بدور الاب يقول حسيت بالضبط جنه ابو العروس

(الله يرحم ابوي) بس الحمدلله الاهل كفوا ووفوا بوقفتهم

المهم تموا يسولفون عن الريال وين دوامه وجيه وشو رتبته الخ و اللي عرفته من هلى انهم

بياخذون هالسبوع وبيردون عليهم عقبه

واختي وريلها اليوم طيارتهم الساعه1 الظهر سايرين العمره انشالله ترد هي ريلها بالسلامه

قلتلها ادعيليه

(الحمدلله الذي بنعمته تتم الصالحات)

قولن ماشاء الله