السلام عليكم يا بنات
انا كتبت الموضوع عشاني تعبت من مواضيع بعض البنات ……
و اعتبروا موضوعي نصيحه لكم يا بنات خصوصا بنات دبي
هال فتره انا تعبانه من الوحام فعذروني بس ان شاء الله اول ما يخف عني بكتبلكم مواضيع و خبرتي في الحمل …..
نرجع لموضوعنا يا حلوات …..
طبعا كل واحد منا حر في اختيار المستشفى الي يتعالج فيه ….بس انا بقولكم نظامي
بالنسبه حق اليهال يوم يمرضون مرض عادي يعني زكام و هال اشياء اوديهم العياده الحكومه التابعه لدائرة الصحه
ويم يكونون وايد مرضى يعني (اربو و الحمى و هال اشياء)اوديهم على طول مستشفى الوصل
و بالنسبه حقي و حق ريلي نفس الشيء الامراض العاديه (زكام و كحه …..الخ) انسير العيادة
اما حالات الطواريء انسير يا ويلكير او الامريكي او nmc …..
الحين نرجع لمستشفى الوصل
انا انصح كل بنت حامل اتحس اب الم و افرازات او خوف على الجنين اتروح هناك بتقولون ليش يعني اتسوين دعايه ؟؟؟؟
هيه نعم يا بنات انا اسوي دعايه ….اسوي دعايه حق مستشفيات الدوله …. الي شيوخنا ما قصروا فيها ابدا و يوم عن يوم تتحسن خدماتهم و يتحسن مستواهم
و انا هني اتكلم عن خبره شخصيه …
شوفو في حملي الاول …. نزل ماي البيبي و انا في الثامن (من الشطانه و النقيز ) و ما كنت فاتحه ملف في الوصل كنت شاله الموضوع من بالي و كنت اراجع في مستشفى خاص بس يوم سرت المستشفى عشان الماي نزل قالولي و الله الجنين صغير و حالته خطيره و رئته مب مكتمله و لازم انوقع على اوراق انه المستشفى غير مسؤول عن الجنين و الأم اذا لاسمح الله استوا اي شيء فينا
هني انا مت من الزياغ وريلي مات من الزياغ … لا و قالولنا لازم ندفع 50 الف مقدم حق الحضانه عشان التامين ما يغطي الحضانه …….. الموهم بعد اتصالات سريعه ريلي قرر ينقلني الوصل و فعلان دقايق و الاسعاف واصل و وداني الوصل و على طول دخلوني و ركبو الاجهزه و عطوني ابرة الرئه و خلال ثلاث ايام ربيت طبيعي و يبن بيبي بوي ايجنن ماشاءالله عليه وزنه كيلوين تقريبا و لا دخل حضانه ولا شيء كنت ارضعه و تمينا اسبوع في المستشفى و طهروه و طلع بالسلامه … و الخياطه كانت اوكي بس ما عطوني مراجعه فاضتريت ايهم عقبها اب اسبوعين و كل شيء تمام الحمد الله
و البيبي الثاني على طول فتحت ملف و كنت اراجع عندهم من البدايه و اذا استوى اي شيء كنت اروح الطواريء و على طول تخطيط و يطمنوني على البيبي و حتى يوم عديت التاسع عطوني البطاقه الصفرا و لازم كل 24 ساعه اسير و يصورون البيبي في الطواريء ويسون تخطيط و اخر شيء سولي طلق و ربيت بالسلامه
و الحمدالله الله رزقني الحمل بعد فتره طويله و عندي شوست مشاكل فاول ما عرفت اني حامل سرت الوصل و عطوني موعد في متابعة الحمل المبكر و سرت الموعد ….. اهتمام و عنايه و لا اروع
و الحين كل مواعيدي عندهم و يوم اتعب اسير الطوارىء و على طول يباشروني
الحين بقولكم الاجابيات و السلبيات
الاجابيات :
المستشفى حكومي يعني مجاني للمواطنين 100%
الطوارىء عندهم 24 ساعة للحمل وو الولاده و الاطفال
بالنسبه حق الحوامل في جهاز سونار في غرفة طبيب الطواريء يعني يصورون البيبي و يطمنونج على طول
جهاز التخطيط 24 ساعه يعني يوم تحتاجين على طول تخطيط
المختبر 24 ساعه و الصيدليه بعد
اذا شكو اب اي شيء على طول ينومونج … ما يحتاي موافقه من التامين او اي شيء ثاني
سوو صيانه حق غرف الvip زادو عددها
عنايتهم ممتازه للام و الجنين
الممرضات وايد حنونات و يصبرون عليج
البيبي يوم ينولد يطعمونه و يعطونج الدفتر و المواعيد و اتمين اتكملين التطعيمات لين مايكبر في العياده
و بعد ايسون فحص البيبي الشامل ويسوله فحص السمع (وايد مهم )…بعد كم يوم اتودينه العياده عشان فحص الامراض الوراثيه
و وااااااايد اشياء
اما بالنسبه حق السلبيات
المستشفى قديم شوي بس يلسين اسون صيانه فيه
و في النهايه يا حلوات لازم انشجع وطنا و مستشفياتنا و نعتمد عليها و انحاول انطورها بقتراحاتنا
الموضوع للفائده و النقاش
ما في داعي حق التعليقات الي مب اوك
الوصل ولا بديل
و ان شاء الله اذا حملت مرة ثانية
في وصل
من 4 شهور بالضبط ربيت في وصل
من دخلت المستشفى
لين طلعت
ماشفت غير اروع معاملة منهم
الدكتورة و النيرس وقت الولاده وايد حبيتهم
و اللي سوتلي الخياطه كانت فنانة بصراحه
و تميت عندهم 5 ايام
كل النيرسات كانوا طيبات معاي ومع ولدي
المشاركة الأصلية كتبت بواسطة ميثانووبس 
الوصل ولا بديل
لازم انشجع الوطن
المشاركة الأصلية كتبت بواسطة *أم فارس* و ان شاء الله اذا حملت مرة ثانية
في وصل
من 4 شهور بالضبط ربيت في وصل
من دخلت المستشفى
لين طلعت
ماشفت غير اروع معاملة منهم
الدكتورة و النيرس وقت الولاده وايد حبيتهم
و اللي سوتلي الخياطه كانت فنانة بصراحه
و تميت عندهم 5 ايام
كل النيرسات كانوا طيبات معاي ومع ولدي
صح ….. تعاملهم ممتاز
بسالج حبيبتي هال الخياطه فعلا اتغيرو وكانو استوت اوك ؟
لكن عقب للولاده من يودونج الغرفه قالولي الرعايه مب لين هناك ومايخلونج اكثر من يوم
احس الوحده يبالها عنايه اقل شي ثلاث ايام
أنا عشان جيه ماتشجع اربي فتوام
المشاركة الأصلية كتبت بواسطة كسرتيم77 لكن عقب للولاده من يودونج الغرفه قالولي الرعايه مب لين هناك ومايخلونج اكثر من يوم
احس الوحده يبالها عنايه اقل شي ثلاث ايام
أنا عشان جيه ماتشجع اربي فتوام
شوفي حبيبتي كل مستشفى فيه علاقات عامه … لازم اتسيرون و اتكلمونهم …قولولهم رايكم و ان شاء الله يغيرون و يحسنون من مستواهم