اغلبكم تعاطف معاي يوم كتبت عن مشاكلي مع حميتي الي هي جارتي
المهم انا مازلت ولازلت اطنش واطنش
لكن بدت تتمادا بزياده
طبعاً هي حامل وها شهرها
وانا حامل الحمدالله
انا بقولكم هالكم شي الي صاروا اخر فتره الي خلاني اقرر ان اليوم لازم ابط الجربه عند ريلي واقول كل شي لان حضرتها تسوي عمرها المسكينه وو يقولي جوفي اختي تغمض وجوفي اختي مسكينه وهي سجينه مو مسكينه
بقولكم شي
من حملت ريلي بدا يرمم ويعدل البيت
كانت تتدخل من وراي
تتصل فريلي لاتحط حجر عالطوفه (عشان طالعه ملوحه مادري رطوبه والطوفه تتقشر من الليوان لين الحوش) (الليوان اقصد المسافه المرتفعه من باب الصاله ل مترين تقريباً)
المهم انا متفقه معاه على كل شي و مختارين الحجر
ياني قالي فلانه غالي طلع الحجر
اختي قالت احط سرميك نفس مال بيتها !!!
قلت فلان انا ماعرف بهالشي بس انت اصريت عالحجر و اتفقنا ! بعدين هذا بيتي وبيتك شو يخصها اختك! وانت ما استغليت الحجر الا عشان اختك!
ف حسيت نفسي زدت على اخته ف قلت بهدي الوضع
قلت يافلان ابوك عنده خبره اكثر عني وعنك شاوره احسن
طبعاً شاوره وقال الحجر احسن و توكلنا على الله
بعدين قررنا نسكر الليوان بالالامنيوم عشان نستغل المساحه ونحطي فيه كبت النعول كرمتو و عشان يصير المطبخ وحمام غسيل الملابس داخل و امان لو طلعت فليل وعالاقل محد بيطل علي نفس سالفه ريلها
ف اقتنع
و قال مره وحده تمي بيت اهلج اسبوع عشان صدعه الهنود ليما نخلص
لان هو هالك عمره بالتمارين فالجم وفالنادي
المهم
رجعت بعد اسبوع بيتي شحلاته اللهم لاحسد هههه رغم ان شي بسيط وبيت جديم لكن ترميمات تخليه حلو
بعد مارجعت ريلي كان متضايق
قلت خير فلان شفيك
قالي اختي غامضتني
قلت ليش
قالي تبا مني اعطيها 3000 الاف عشان تشتري اغراض للبيبي وهي ولادتها قريب!!!!!!!!!
انا تخبلت لكن سكتت تدرون ليش؟
لان من كانت هي بالسادس او الخامس
بروحها قالت انها خسرت على اغراض البيبي فوق ال5الاف لان عطو ريلها زياده لانه داخل الدوره !
انا قلت انزين شو بتسوي!
قال مابعطيها لان ريلها يقهر خل يصرف ع بيته وبناته انا مب متكفل فيهم
عالرغم ان ريلها عدل ابيت وهو مب بيته
و يعطيها بالاف
ويوديها دبي وعيمان
طبعاً تقول هالكلام جدام حريم اخوانها ماتقوله جدام اخوانها
لان محطيه فبالهم ان ريلها مايصرف عليها لكن انا ااجوف العكس!
و الي تقوله صج مب جذب يعني عشان تقهرنا لا صج يوم عنده يصرف عليها لكن هي طماعه ماترضى بالقليل تبا نفس مستوى حريم اخوانها
مع ان اخوانها يهلكون بالشغل
وريلها الي مايبا يغير شغله لمكان احسن
المهم طبعاً انا سكتت
صار موقف ثاني
حميي خذا لحميتي الصغيره بيبي وللعلم اختهم هاي الصغيره كان عندها سوابق !
ف ريلي قايل لها بيبي مافي تبين باخذ لج فيرتو!!!!! متخيلين انا حرمته ماخذلي فيرتو هههه بس هو قال جذي عشان الفيرتو نظامه جديم ف بيكون متطمن وهو قايل بعد الثنويه
ف لما انا عرفت
حميتي الي هي جارتي قالت جدامي لاختها الصغيره اصلاً كل اخواني يعرفون ان عندج بيبي
اصلاً الحين في ناس بيسوون لج مشاكل!! يعني انا لان محد يالس غيرنا نحن الثلاث!
اصلاً مستحيل فلان ماخبر اخواني
وانا طاف و رحت اصلي ف غرفة عمتي يتني حميتي الصغيره
قالت فلانه وصلني هالمسج
كان من اتصالات وبالانجليزي وهي ماتعرف
قلت ان هذا مال الخدمه
دخلت حميتي الكبيره وقالت لاختها بعصبيه
مايحتاي اي شي يوصلج وماتعرفينه تقولينه لفلان وعلان الي ماتعرفينه امسحيه
واذا ياج رقم غريب او شي طنشي ولاتخبرين اخوانج لان بيسوون لج مشاكل!!!!!!!!!!!
انا سكتت
بس الي قسم ظهر البعير
ان هالاخت قالت لريلي يا فلان انت بتيب خدامه انا اباها تساعدني!!!
قال لها يصير خير
المهم انا عقبها مرضت اسبوع حمى وكحه و ترقد بالمستشفى لاني حامل ف الكحه قويه سببت لي نزيف
وكلهم يسالون عني من عمتي من حريم اخوانه حتى خواته الثانيات
الا هي
تخيلو مطرشه مسج فلانه انتي بتيبين خدامه مسلمين ولا مسيحيه لان ابا اسوي حسابي واخبر ريلي اخاف مايرضى! !!
انا صحت وقلت لامي عنها قالت ماعليج منها وطنشيها ولين اتييبين الخدامه يصير خير وكوني احسن عنها ومهما كان هاي اخت ريلج يعني لاتحطين ريلج بموقف خايس انه يا يختارج انتي او اخته عشان خدامه
وسكتت
بس من اسبوع ريلي مضغوط بالنادي ضغط قوي
ويحطي حرته فيني وانا بروحي وحامي كله نفسيه خايسه وصياح ولكن مب جدامه مع انه حاس فيني
ف بيتي ما ايلس فيه وايد ولو يلست مايخليني بروحي لازم حد معاي وانا كيف بشتغل اذا في حد ف بيتي!
واذا راح النادي انا يا فبيت امه ولا بيت امي
واذا رجعت من النادي بيرجع 11 لين يتعشى و نسبح ونرقد صارت2 متى بنش الصبح! ومعروف ان الحامل تحب الرقاد
ف تم يقولي صيري نفس فلانه اختي تغسل الحوش
وتنظف وتخم وتطبخ
وللعلم ان ماتغسل الا ملابس ريلها والباجي خدامه امها تغسلهم فبيت عمتي
و التنظيف تخلي بنتها ام 13سنه تنظف بكلام الام نفسها
والطبخ ريلها يسووي رجيم ياكل تونه مع سلطه !
وحوشها ربع حوشي
اول مره يوم قال سكتت وفكرت هل صح كلامه انا مب كفو؟
بس والله بنات مايخليلي مجال ارتاح فبيتي وانظفه عراحتي ابداً
و طنشت
و رد من يومين قال مره ثانيه صيري نفس فلانه
جان اصيح قهر قلت لاتقارني فيها لاني ما قارنتك باخوي
انا غير وهي غير
انا يادوب 20 وهي 35 انا هال20سنه كنت محطيه ريل على ريل واتآمر
اما اختك معرسه مرتين و صار لها اكثر عن 15 سنه
ف مايباني اكمل قالي خلاص انا اسف
بس انا ما اقدر اسكت ابي انفجر لان ما استحمل اي كلمه منه لانه يقارني فيها
هي تكلمت عني وقالت اني متزاعله مع ريلي لانه هي قنعته يركب سراميك! ماتدري ان نحن متفقين اني ابات بيت اهلي! وانصدمت لما جافت انه مب سرميك
و تقول لعمتي و عمتي روحها قالت لي
قالت فلانه بنتي تقول خلي فلان يشتريلج طقم ذهب عنده فلوس يعدل بيته ماعنده كم الف حق امه!
انا ساكته قلت لها تستاهلين عمو
قالت ولدي راضيه عنه وكفايه انا عايشه بخيره هو واخوانه وماعلي قاصر
و كم مره بعد مايفوز ريلي بالمباراه تقول يتحظج بيعطيج مبلغ محترم
و القى فليل انها مطرشه مسج تبا فلوس!
و ازيدكم اليوم بأذني سمعتها كنت بروح المطبخ اقول لعمتي اني بروح بيت اهلي لان ابوي برع
وانا امشي سمعتها تقول لاختها
فلانه فيها بنت. يعني فلانه(انا) بتشفط اخونا شفاط
اكيد بياخذلها ولبنته ذهب ونحن يوم بنقول عطنا بيقول اسمحولي
كفايه صاير بخيل من حملت حرمته يخش ،،،،،، انا دخلت و كآني هبله ماسمعت قلت عمو وين ؟
ويهها صار ازرق واحمر و قالت تغسل الصحون ورى
هالكلام حرق قلبي
انا اقدر البس اغلى لبس وكلمه ماركه لان ريلي عنده والحمدالله
لكن انا ما احب لان تعودت البس ماركه بس شي خفيف وللمناسبات والمكده وما اتفشخر جدامهم واتخقق واصلاً اغلبه هدايا او من زهبتي
والذهب انا عندي من قبل لا اعرس ابوي وامي يشترولي انا واختي
ونحن مانبيع الذهب ابداً الا بوقت الحايه الله لا اييب هالوقت
ماعرف افكاري متشتته واعصابي متوتره و متنرفزه من كل شي
وكلامها اليوم سم بدني حسيت اني وحده ثانيه
مع ان والله عمري ماقلت شي لريلي عنهم ابداً
ويوم يعطيهم ما اقول لا
لانه هو مومقصر فيني ف عادي لو يحرق معاشه مايهمني دام مو قاصرني شي
بس لين متى استحمل اذاها
انا بنفجر واخاف انفجر عليها وبتصير مشكله
بس لازم افضفض وقررت افضفض لريلي مدام يقارني فيها
عشان يشل هالغشاوه من عينه ويعرف انا كم استحملت وانا ساكته وهو مو مبين ف عينه و يقارني فيها
ابي اطلع الي فخاطري بنات انصحوني
اتهور ولا لا
للعلم انا ابداً ما راح اظلمها والله الشاهد ان مافي كلمه تأليف
بس افكاري متخربطه
انا تعبت وريلي يحط تعبه فيني صح يتاسف بس يرجع يقهرني زياده
انا نويت اقوله
انتو شورايكم
في شي ممكن اسويه بدال المصارحه او انا مكبره الموضوع؟ ترى كل ساعه اتذكر موقف ابي اكتبه بس احس الي كتبته كافي لان صار موضوعي طويل
سامحوني طولت
الحرمة متفيقه فلا تشلي بخاطرج وتذكري الاجر الكبير الي تاخذيه من وراها خليها تقول الي تقوله بالنهاية سوي الي يريحج
والله لو بنتم نحاسب للناس بنتعب
ذكرتيني بنفسي قبل كنت حساسه وما عندي جرئه اقول للي يضايقني اني متضايقه منه وكنت اتعب وايد
بس بالنهاية لمتى الواحد يعور قلبه على كلام فاضي
خليها عنج ولا تحرضي زوجج عليها واذا قارنج فيها اسكتي وقولي له ونعم فيها اختك ان شاء الله يوم اكون بعمرها اكون مثلها بالضبط
ولا تزعلين نفسج الدنيا ما تسوى زعل
بس بقوله باسلوب عشان يعرف ان انا صابره عليها واعاملها بالحسنى
رغم الي تسويه
وانت تقهرني زياده وكلامك يخليني اكرهها هالشي الي ابيه يفهمه ان افضفض له احسن من اني انفجر فويهها لاشعورياً وتصير مشكله
اختي انفجري ع حميتج ولا انج تنفجرين ع ريلج، هاي سوالف حريم وريلج بروحه مضغوط وصدقها امج لا تحطين نفسج ف موقف انه يا يختارج او يختار اخته لانه ريلج فيه خير لأهله مهما سووا .. ف انا من رايي الافضل انج ترمسين حميتج وتوقفينها عند حدها وقوليلها اذا تبا شي من اخوها عندها اياه اما انها تتدخل بينكم وف بيتج هالشي انتي ما بتتقبلينه منها ورمسيها جدام عمتج عشان تستحي ع دمها، الصراحه استغرب من هالحريم 35 عمرها وجي عقليتها لو عمرها 65 شو بتسوي !! .. وعقب الرمسه هاي اذا ما يازت عن حركاتها عندج ريلج وقوليله ي فلان انا رمست اختك لكن الرمسه ما فادت وياها واذا هي تتدخل فيك برايها اما انها تتدخل فيني وف بيتي ما اسمحلها وفهميه شو اللي استوى
هالناس لو تمادوا اكثر عن جي بيخربون علاقتج بريلج بعد ف الافضل انج تبعدينهم عن بيتج قد ما تقدرين
بس انتي ترومين تيبنها مثل السوالف حق ريلج تقوليله انج سمعتيها انها مشتريه 5 الالف للبيبي
وان بنتها هي تنظف والملابس هي ما تغسلهن
يبيها مثل السوالف لا تعصبين
لان انتي ما خبرتيه هو ما بيعرف
وبيتم تفكيره مثل اول ان اخته مظلومه
ردي بس بادب و خليها توقف عند حدها ، عشان تحترمج لازم تحطين إصبعج بعينها ..
واذا ريلج فالج شي ، ردي : هي ما تحشمني و هاي مب اول مره ، بس كلمتها بكل احترام انها ما يخصها فيني ..
و اي شي يستوي بين ريلج و امه و خواته أبدا لا تبدين رايج لانهم إخوان و انتي مهما كان تكونين غريبة ..
كل ما ريلج اي معصب و يقول خل يقول اللي يباه بس اسمعيه و احترميه بعد ما يخلص كلامه هاتيله عصير ليمون بالنعناع و قوليله من عيوني بس ليكون يقارنج بحد ، أهني و خط احمر
بلا كلام مثاليات أنا اقولج الواقع ..