أساس مشكلتي ان حميتي تعتبر البنت الوحيده من بين 6 أولاد والبنت تخرجت من الجامعه من سنتين تقريباً والفرق اللي بيني وبينها بالعمر بحدود السنتين أو أكثر شوي …
الموووووووهيم أنا في بداية زواجي عاملتها كأخت غاليه وعزيزه واعتبرتها مثل وحده من خواتي وكانت السوالف من بينا ما تخلص ودايم الدوم أروح أقعد في غرفتها أو العكس كانت تييني عندي البيت وتقعد بالساعتين والثلاث ..
في يوم من الأيام دقوا باب بيتهم ناس عسب يخطبونها وكل شي مشى اوكي حتى كان يوم الملجه والله اني فرحت لها من كل قلبي وركضت لها بايدي وريلي عسب تكون ولا أحلى في يوم ملجتها مع العلم ان أهل ريلي اللي هم بعد أهلها ما يحبوني وما أدري شو السبب ودايماً يوصلني كلام عن طريق ناس انهم يقولوا لي اني متكبره وشايفه عمري عليهم وكل السالفه اني ما أحب أقعد معاهم يعني أسلم وأمشي عشاني لو قلت كلمه وحده راح يمسكونها لي وعادي يسوون لي مشاكل كبيره من أبسط الأمور …
ما صار نصيب بين الاثنين وصارت مشاكل بينهم وادخلوا الأهل بالموضوع وفي النهاية حصل الطلاق ومش حابه أقول أسباب الطلاق لأنه في النهايه هذي أسرار عوايل مش المفروض اعرضها للكل بس المشكله مش هني المشكله في حميتي اللي تغيرت حالتها 180 درجه يعني صارت مكشره على طول حتى ان دمها صاير ثجيل بشكل ما تتصورونه وكانت بعد الطلاق تطلع حرتها في الأسواق يعني تسير السوق بشكل يومي تقريباً وفي النهاية ترجع وايدها فاضيه واذا بتاخذ تاخذ لها قمصان نوم اتصوروا مع انها مش بحاجتها ولما أسألها ليش شرتهم تقول لي : عجبتني موديلاتهم وألوانهم ….
على الأكل تحاول تفرض كلامها بأي طريقه يعني تطبخوون لي اللي بخاطري أو اني أزعل وأمها المسكينه تحاول ترضيها بأي طريقه ولا تقولولي ان هذا من الدلع بالعكس هي أصلاً ما تعرف تدلع ودايماً يسوولها طاف في البيت بس من عقب اللي صار الكل ياخذ بخاطرها ويحاولوون انهم ما يزعلونها..
هذا الشي أثر فيني وايد لأن الأسلوب هذا ينرفزني وما أتحمله وصارت بيني وبينها بعض المشادات والنغزات في الكلام وريلي يحاول يهدي الوضع كالعاده بس أنا أقوله (هذي مناكر بنات وانت ما تعرفها كثري )
أنا طابتنها من عيد الأضحى يعني سلمت فيها هذاك اليوم ومن عقبها ما صار بيني وبينها اي كلام لأني لو كلمتها بطلع الأولي والتالي وانا أدرى بطبعي ومش حابه المشاكل تزيد …
والله اللي يشوفنا ألحين ما يصدق انا نحن نفسنا اللي كنا قبل مع بعض أكثر من الخوات …الله المستعان واللي زاد الطين بله انها اتعرفت على بنات في الشات الله يستر عليهن ويشجعونها انها تسوق سياره وتظهر من البيت عشاتها قاعده بطاليه وأنا عارضت الفكره لأني عارفه هذيلا البنات زين وخواتي درسن معاهن في الجامعه يعني ماشيات على الكيف وأظن فهمتن قصدي ..والبنت في هذي الفتره قابله لللأنجراف ولما عرفت اني خبرت ريلي في سالفة ربيعاتها يتني البيت وسوت لي قيامه وقالت لي انتي غريبه وما يخصج فيني .. والله هذي الكلمه حزت في خاطري وقعدت اصيح بعد ما ظهرت من عندي والله اني خايفه عليها بس ألحين قررت اني ما أدخل بينهم واللي بتسويه راح يرجع لها وهي عندها اخوان وهم أدرى بمصلحتها ..
ما أحب أقاطع حد وما أحب الناس يكرهوني بس يمكن أحياناً صراحتي في الحق ما ترضي بعض الناس وتخليهم يبتعدون عني .. الله يصبرني عليها وان شاء الله ربي يهديها ويسخر لها ولد الحلال اللي يهدي سرها ويحفظها…
واكيد ها الشي أثر عليها وااااااااااااايد
انتي لا تقاطعينها بالعكس سيري عندها اتصلي فيها طرشي لها مسجات
اظهري معاها
وبعدين اي شي يستوي لازم تنصحينها مب تخبرين عليها
وإذا هي بطالية خلى تشتغل اكيد بتمل ف البيت
يا خوفي ان تستوي بينج و بينها مشكلة و تأثر ع حياتج الزوجية
والله يوفقج و يوفقها يارب ويسر امركم بإذن الله
وانتي تقولين انها بنت وحيدة وهي كانت وياااااج وااااايد يعني هي حاليا بحالة ضعف ماتعرف تفرق بين الصح والغلط ولازم تشدين على ايدها مو تتركينها للغير يخرب عقلها ويزين لها الشين على انه زين….
الله ايسر امورها والله تمي وياها ونصيحة اي شي يصير خليج بجنبها لانج يوم من الايام بتحتاجينها كاخت وحاولي تردين شرات قبل عسب تنسى البنات اللي تعرفت عليهم…
ولاتخلين ريلج يدخل بين اخته وحرمته والله انج انتي الخسرانة…