شخباركم خواتي .. عساكم عالقوة ..
مشكلتي .. ما اعتقد لها حل ..
أني حاولت بكل الطرق اني اوجد حل بس مافي فايده..
يا ناس تعبت من معامله اهل ريلي للخدم .. و بالذات ام ريلي و اخته ..
يعني صدق و ربي ما ابالغ .. بس مافي احترام للخدم ..
بتقولون لي شو صاير ,,
و بقوللكم السالفه و انتوا شوفوا الحل ..
و قولولي اذا انا عاطيه الموضوع اكبر من حجمه او مبالغه فيه ..
و انصحوني شو اسوي ..
السالفه و مافيها ..
بيت ابو ريلي صح انه صغير بش شالنا- و الحمد لله ,,
و اخت ريلي معرسه و ساكنه معانا .. و عندها ما شاء الله 6 عيال و حامل ..
و ريلي انسان وايد زين بس هي اللي مظيعه شخصيته ..
لا احترام و لا تعامل .. وااااايد قاسيه و ظالمه مع ريلها
المهم
قبل .. كانت تشتغل عند ام ريلي خدامه سيلانيه ..
و كانت اتيي من الساعه 7 ونص لين الساعه 3
و كانت عمتي واااايد مدلعتها .. و القهر ان الخدامه كانت اتقول انا ما اعرف
اكوي – و ما تنظف الغرف و المطبخ عدل – حتى الحمام تكرمون ما تغسله
و فوق كل هذا كانت ترتاح لفترات طويله مع ان دوامها و وشغلها جزئي
و يوم الجمعه ما تيي البيت
و يوم نرمس ام ريلي – ما يعيبها .
و فوق كل هذا كانت تعطيها معاش 900 درهم- على شو – ما ادري ..؟؟
و سافرت الخدامه هاي .. و تم البيت بدون خدامه ..
ام ريلي مع مرور الايام تعبت .. لأن بنتها العوده- ام العيال – اشتغلت
و عندها ولد و بنت صغار – 5 سنوات و 3 سنوات
و ما شاء الله عليهم وايد حشرة و حركيين زياده عن اللزوم ..
و بحكم كبر سن عمتي طفرت و تعبت من عيال بناتها
و اللي كان مصبرنها على هالتعب ان بنتها تعطيها بيزات راس الشهر عسب
تمسك عيالها ..
المهم .. انا ربيت .. و قررت اني اييب مربيه حق بنتي ..
و من سمعوا اني بييب خدامه .. كل حد شد حيله و قال انا بعد ابا .
المهم .. مرت حميي يابت خدامه .. و حميتي يابت خدامه و ام ريلي بعد يابت خدامه .. و انا بعدني ما كنت يايبه المربيه ..
خدامه عمتي كانت تستوي بنت اخو خدامه امي ..و يبناها بدون مكتب
و كانت وايد تحب اليهال بس على قولتهم – ما تنفعنا لأنها متييينه و مافيها حيل ..
و سفرناها
و تمت عمتي هي و خدامه بنتها يتناقرون ..
في هالفترة وصلت المربيه مالتي
و خدامه حميتي كانت زينه .. بس كانوا وايد يعايبون على شكلها
و يقولون هاي سوده و هاي ظروسه جي و هاي جي و جي ..
و كنت وايد اتظايج و اقوللهم يا جماعه الخير مب زين اتعايبون عالخدم ..
هاي خلقة رب العالمين .. شوفوا عيوبكم بدال ما تشوفون عيوب الناس
و ام ريلي كانت هي اللي تترس راس بنتها على البشكارة ..
و كانوا يظربونها … و كانت تشتكيلي و رتشتكي حق المربيه ..
لين ما استوت مشكلة .. و هزت البيت هز ..
و سفرناها …
و عقبها .. يت خدامه اندونيسيه ..
ما تمت الا ليله وحده … و اليوم الثاني قالت انا بسير ما ابغي اتم ..
و عقبها بفتره يت وحده اندونيسيه بعد ..
و كانت زينه .. و طيبه .. بس بهدلوها ..
و حميتي كانت تظربها و يوم ارمسها و اقوللها حرام تسكت ,,
و يوم تمرظ الخدامه يتحرونها جذابه …
و عمتي مره اتقول انا ما يخصني في بشكارة بنتي و مرة تهزب الخدامه
يعني بالعقل ..
الخدامه شو و لا شو بتسوي ..
بتخدم عمتي و عمي و بناتها ال3 و اولادها ال5 و لا بتخدم اخت ريلي و عيالها ال6 ..
و فوق كل هذا .. يبونها تكوي كل ملابسهم .. و تغسل الملابس و تهتم بالاطفال
و تسوي كل شغل البيت ..
عنبو هاي انسانه …
المهم .. و هاي بعد ردوها المكتب ..
و في هالفتره .. انا رمست عمتي بكل صراحه .
و قلتلها العيب مب في الخدم .. العيب فيكم انتوا ..
انتوا اللي ما تعرفون تتعاملون مع الخدم ..
جان اتقولي شو قصدج و انا ما احب الخدم يتدلعون ..
قلتلها .. يعني ألحين يوم بتعاملين الخدم بأدب و احترام سميتي هذا دلع
قلتلها انتوا لو تعرفون شو مكتوب في العقد مال الخدم جان انصدمتوا ..
و لو تعرفون ان الخدامه لازم ترتاح الظهر و تاخذ اجازه عالاقل يوم واحد
و يكون لها غرفه شو بتقولون و شو بتسوون ..
و ريلي قاللها.. انتوا اصلا مب مال خدم …
انتوا لازم تشتغلون رواحكم عسب تعرفون التعب اللي تتعبه الخدامه ..
و فوق كل هذا كانت بعظ الاحيان تصارخ على خدامتي ..
و يابوا خدامه اندونسيه ..
اللي الحين تشتغل ..
الصراحه .. خدامه عسل .. شاطرة ..
و تحب اليهال .. و نظيفه .. و تصلي ..
و نفس الحركات قاعدين يسوونها ..
و على فكرة .. اخت ريلي ام ويهين ..
يعني جدام امها ما تروم اتقول شي ..
و من وراها اتقول ليش امي جي اتسوي ..
و اذا امها عصبت عالخدامه .. تسكت و ما تقول شي …
الخدامه تقريبا كملت شهر ..
و خلال هالفتره كلها ,, تبغي تتصل حق ولدها – عمره سنتين-
عسب تتطمن عليه و ترمس ريلها .. عندها فلوس و كانت تبغي بطاقة و
كانت تبغي فازلين .. حق اصابعها المتشققه ..
قاموا و سوولها حشره قد الدنيا ..
و الخدم كلهم يسيرون عند المربيه مالتي عسب يتصلون من تيلفونها حق اهاليلهم – حتى خدامه مرت حميي ما تخلي خدامتها تتصل
و البارحه شو استوى ..
على اساس ان خدامه حميتي اتسوي العشا ..
ما خلتها اتسوي العشا و سكتنا نحن ..
و يوم قعدنا نتعشى في الحوش ..
قالت حق خدامتها بصوت واطي- سيري ارقدي ,,
و سارت اتشل فراشها .. و عمتي كانت قاعده في الحوش ,,
و جان تهزب الخدامه و قالتلها ( اييي انتي يا الجلبه .. مافي رقاد ..
وين سايره ترقدين .. انتي مب احسن عني عسب ترقدين قبلي ..
ايي انتي يا الحمارة .. خلي الفراش و ما في رقاد لحد الساعه 12 )
و الخدامه كانت تتطالع عمتي مستغربه .. و جان اتقول عمتي لا تتطالعيني جي
ويا عيونج مثل عيون القطاو .. و تمت تتحرطم …
طبعا اخت ريلي ساااااااااااااااااااكته .. و لا قالت حق امها انها هي اللي قايله
حق الخدامه تروح ترقد …
و الخدامه قالت حق مربيتي .. خلاص .. انا ما اقدر اتم اكثر هني ..
انا ابغي ارجع المكتب .. و اتصيح ..
و انا تعبت من كثر ما انصح … و اقوللهم ( الله الله في الخدم .. و خافوا الله
في الخدم .. ترى كل بني آدم وله حوبات .. و هذيل صدقوني انتوا ظالمينهم ..
و دعاء المظلوم مستجاب ,,,)
مب عارفه شو اسوي ..
يعني ام ريلي .. وايد سليطه اللسان .. و اخت ريلي منافقه ..
شوروا علي ..
بس ما يصير جي حراااام مهماا يكوون هااي انسانهـ حرااام يسوولهاا جي
الله يهديهم…
والله اني ادري انه حرام و اكبر حرام ..
لأن باجر رب العالمين بيحاسبنا على هالشي ..
متى بيخلص البيت .. عسب ارتاح من مشاكلهم مع الخدم يا ربي ..
يعني الواحد حتى يوم تيه بشكاره سيئه ما يتضارب وياها! سيده المكتب من غير بهدله ولا حرق اعصاب! بس اللي اييونكم حرام يبن يشتغلن…
الله يهديهم و انتي سويتي اللي عليج.. إن شاء الله يخلص بيتج جريب و تفتكين من هالخرابيط
انا ما اقدر استر على هالحاله ..
اشوف ظلم و بعد اسكت ..
يعني هم اللي محتاجين للخدم .. و الخدم مب محتاجينهم ..
الخدم يقدرون يسيرون يسترزقون في بيوت ثانيه ..
بس ليش جي ..
و الله العظيم ان في حياتي ما شفت ناس تعامل خدمهم بهاي الطريقة الشنيعه
و انا دايما اقول حق الخدم .. و الله ثم و الله ..,,
لو الحل عندي و الأمر بايدي جان ما خليت اللي قاعد يستوي يصير ..
او اني انا بروحهم بوديهم المكتب ..
يعني احترت وياها ..
ما عندهم خدامه – ظرابه
عندهم خدامه .. بعد ظرابه
حسبي الله و نعم الوكيل ..
سمحيلي
خليهم ينقلعون مع بشاكيرهم
دامج مرتاحه انتي وريلج وشغالتج
ينقلعوووووووون