::::
هلا عزيزاتي المتزوجات ولا غيرهن ترا الفايدة باتعم كل واحدة ودها اتوفر ولو بشي بسيط ينفعها في المستقبل الجريب بأذن الله
الأول باخبركن قصة عن واحدة اعرفها وعن جد قصة لطيفة وفيها معنى طيب للأدخار
شي واحد ريال كريم لدرجة ان العالم يستغلونه وماشاءالله عنده منصب طيب في الجيش…ودايم يسلف الناس اول الشهر وايي نص الشهر ملاقي نفسه على الحديدة لا هو مأمن للبيت شي ولا لنفسه شي…وفوق ها كله يستحي يرد البيزات من عند ربعه
اتفقت مرته مع عيالها والعيال ماشاءالله اعمارهم بداية من العشر سنين لي ال13 سنة وال16 سنة…ان بهالطريقة بيكونون على الحديدة فاتفقت الأم وياهم ان بداية كل شهر اييبون مطالب كبيرة للأب…وطبعا العيال يتعذرون بالدورات والمدارس والأندية والأنشطة…والأم تتعذر بالواجبات وطلبات والبيت والصيانة…ومن هني يسلمون الأم المبلغ…
المهم الأب لاحظ طلبات العيال زادت لكن الأم تتعذر واتقول العيال كبروا وزادت همتهم
المهم الأم سمعت من اخوها ان يت دفعة بيوت بيوزعونها على المواطنين وان اسم ريلها من بينهم…وطبعا ريلها ما يدري فراحت عند ريلها وقالتله مطبخنا بايت ويبيلي مطبخ يديد حاول تدبرلي 50 الف حجزت مطبخ يديد وبيتركب بعد اسبوعين…هني الريال فج حلجه…(أنا من وين اييب خمسين الف) قالت له من عند ربعك تراك ما مخلي حد مو مسلفه حتى راعي الدكان اييك شهريا يتسلف منك…وطبعا الريال يعرف ان المرة عاقلة ومدبرة منزل فحس ان من حقها ايكون عندها المطبخ اللي تحلمبه فسار وطلب من ربع ليما جمع لها المبلغ…وطبعا عيالها ذيج الساعة صاروا شباب (للعلم السالفة امتدت سنوات) فخلت العود يخبي سيارته عند ربيعه ويقول حق ابوه ان ربيعه دعمبها ولازم يصلحها بالمبلغ الفلاني( من وين) سير عند ربعك وييب بيزاتك….وخلت الولد الثاني يقول حق ابوه ان ربعه عازميين فلان الفلاني والشباب كلهن قاطين للعزيمة من 5 الاف وفوق …وهاتك يا اعذار ليما تقريبا قدروا يلمون اكبر قدر من المبالغ من عند ربعه…
يت المفاجأة والخبر تأكد بأن الريال حصل على بيت…الريال يا وحط ايديه على راسه…من وين اييب اثاث وترتيب للبيت
هني التموا العيال وام العيال…وما باتصدقون ياو وسلموا الوالد تقريبا 400 الف تجمعت في حوالي 5 سنوات…هني الأب استغرب وخاف لا ايكون الولد العود تسلف لجل ابوه ولا العيال يابوا البيزات بطريقة لا سمح الله…هني عاد ياته مرته وام عياله وصديقته في دنياه وفهمته السالفة الريال من شده فرحته دمعت عينه…عرف ان حرمته خير حرمة له…وعرفت اتربي عيالها خير تربية…وعرفت كيف اتصون مال زوجها واتحافظ عليه لأيام الضيجة ورتب بيته احسن ترتيب والحلو انه سوا لحرمته مطبخ لا صار ولا استوى هديه منه لها وعلى امانتها ورجاحة عقلها…وزوجي يشهد على بيتهم قاللي روووووووووووووووعة ةصدق شي عليه الجيمة والحلو انه لا تسلف ولا شي يعني ترتيب بمبلغ مدخر متوفر عندهم…
الحين انيي في الخطة اللي شغالين عليها انا وزوجي
علما ان الفكرة فكرتي لأن الوالد الله يسلمه كان مسويلنا خطة توفير
خطة الوالد كانت وضع 100 درهم شهريا في حساب كل واحد من عياله ويعطيه المبلغ هدية بيوم عرسه عاد احسبوها انا استلمت تقريبا 15 الف لأنه ما بدا التوفير من وانا صغيرة
أما خطة زوجي هي توفير 300 درهم في حساب كل واحد من عيالنا للعلم هذا الكلام قبل الزيادة ونفذناها…بحيث اتكون توفير يا بنات مش احتياط في فرق بين الأثنين وباشرحها لاحقا
طبعا على الزيادات نوينا بداية من هالشهر التالي:-
*توفير الف درهم لكل واحد من العيال في صكوك الوطنية
(والسبب في اختيار صكوك الوطنية سيتم شرحها لاحقا)
*توفير الفين درهم وندخلها جمعية بحيث من نستلم المبلغ كامل نحطه في صكوك الوطنية.
*1500 احتياط شهريا نحطه في الحساب بدون بطاقة…علشان ما نسحب منه وقت ما بغينا.
*وحاطين خطة بحيث كل ما توفرت عندنا 10الاف من صكوك الوطنية نحطه ودائع على مدى 10 او 5 سنوات في البنك.
الفرق بين التوفير والأحتياط…
التوفير هو اللي بينفعنا يوم ممن الأيام يوم نبني بيتنا بحيث يكون عندنا عائد مالي نأثث فيه البيت ونفرشه…يعني اتحطين خطة واضحة بـأن المبلغ هذا ل10 سنوات جدام واذا خلصت ال10 سنوات وانت مو في حاجتها حطيها في شي من الاستثمارات او الودايع ولا حتى اشتريبها عقار ينفعج.
الاحتياط هو المبلغ اللي ينحط للعازة، يعني مصاريف انييب شغالة يديدة ولا لا سمح الله حد من العيال محتاج يسير مستشفى خاص، ولا واجب ماعذر منه ولا ظرف طاريء لأحد العائلة لا سمح الله.يعني شي تستخدمينه للعازة والعازة ما تشمل تخلص البيزات على نص الشهر ولا تشمل البطرة والسفر.
ليش اخترت الصكوك الوطنية
علشان لا احتجتها (يعني للي ما تعودت على التوفير وناوية اتغير رايها) علشان يسجلولج الصك يبيله شهر وعلشان يصرفونه لو تبين تردين البيزات تاخذ شهر يعني يمديج اتغيرين رايج في السحب وتقرين على التوفير 
وبعدين للي عندهم امل في شراء عقار ترا الصكوك متفقة مع شركة املاك للعقارات بدفع المبلغ من الصكوك نفسها اللي عند الشخص يعني ما يكلف نفسه ويدفع يقوللهم ادفعوا من الصكوك اللي عندي
وبعد الشغلة الأهم…
كل 10 دراهم من قيمة المبالغ المدفوعة تدخل السحب روحها على شغلات وايدة وما تدرين يمكن تربحين المليون (حلم الفقارى) لكن كل شي من بعيد عند الله. علما ان الفقهاء قالوا انه الصكوك ما فيها اي تحريم كونها مؤسسة ربحية واستثمارية حالها حال الكثير من المؤسسات الاستثمارية.
واي استفسار انا حاضرة
::::
+
وفعلا لازم كل انسان يوفر مبلغ ولو بسيط ترا ما بيظهر نفعها الا بالمستقبل الجريب
مشكوره اختي صبح وليل على الموضوع المفيد
الصراحة تفكيرج حلو .. بس تدرين .. بسوي شراتج .. لكن لأني ما عندي عيال .. بنفتح أنا وريلي حساب في بنك غير بنكنا .. يعني مثلا بنك بوظبي الاسلامي .. و بنحط في كل بداية شهر 2000 درهم (توفير)
و الله ييسر لنا أمورنا .. و يفتح لنا أبواب الخير .. و يرزقنا من حيث لا نحتسب ^_*
و حبايبي .. لا تنسون الصدقة حتى لو بمبلغ بسيط .. حتى الله يبارك في بيزاتكم
أنزين ..
أنا عندي مبلغ بسيط جدا ( 11000درهم) و خاطري استثمره .. لأني خلاص بيلس بالبيت و أبا هذا المبلغ يغنيني عن الشغل وووو ألخ ..
فــ شو اتشوين عليه ؟؟ غير الصكوك الوطنية ..
سمعتي بشي أسمه محفظة في بنك ؟؟ و هل تنصحيني فيها؟؟
المهم .. أنتظرج حبيبتي و رايج يهمني .. و ربي يسهل عليج ^_*