ربيعتي وأم ريــلها حسبي الله ونعم الوكيل ! 2024.

بنات وحريم منتدانا انا بكتب لكم قصة ربيعتي وانا متأكدة انه بتلقى الحل هني هي طلبت مني اني احطها في المنتدى وتبا مشورتكم ..

ربيعتي خلصت ثانوية عامة ويابت نسبة 96% ونصحناها انها تكمل دراستها في جامعة لكن رفضت بحجة انه البنت مالها الا زوجها وعيالها لانهم من العوايل الي عندهم البنت تخلص ثانوية وعلى طول يزوجونها .. وتزوجت واحد مب من اهلها وسافرت معاه ..
كانت مستانسة واايد فيه وطايرة من الفرحة عاشت معاه ثلاث سنين شافت العذاب من امه كانت تبا لها الرضى ترضى كانت تعتبرها مثل امها وتحترمها وتحط فوق راسها ..لكن للأسف عمتها كانت دوم تكوك ولدها فيها وتقوله اعتبرها خدامة عندك لاتستشيرها في اي شي دوس فبطنها .. سوي مثل اخوك الكبير هو عنده اخ اكبر عنه عمره 30 سنة صبح ليل يضرب حرمته ويعذبها ويأمر عليها .. واخوه كان كل مايشوفها يقعد يطالعها بنظرات خايسه وغصب يباها تتكلم معاه وتيلس وياه بالمختصر كان قليل الادب !وسكتت ماقدرت تقول لريلها بحركاته لانه كانت تدري انه بيقول لأمه بكل شي وبتنقلب ضدها اكثر ..
كانت العمة اتقوله خلي عندك شخصية وخليها تخاف منك .. كان يضربها مسكينة ضرب مجرد ماانها تعلي صوتها تبا تبرر موقفها من عمتها يفرها في الارض ويسبها ويهينها ويقولها يابنت الشوراع .. تخيلو اتقولي حتى في العلاقة الزوجية كان يسأل امه !
لين مايا اليوم الي كانت فيه حامل في الشهر السادس وقررت انها تهده وترد لأهلها وهي طالعة كانت تقولها انتي الخسرانه بتسافرين وكرشتج جدامج وكانت تغلط عليها وتهينها حتى وهي مروحة !
سافرت لاهلها وربت ويابت ولد وحتى ماكلف عمره يتصل يسأل عليه وسكتـت ..
يلست تقريبا 6 شهور عند اهلها والعمة حتى ماقالت حرام عنده ولد ماله ذنب خليني اردهم لبعض واصلح بينهم !
تقولي والله ما تتصل هي ولدها فيني على الاقل يطمنون على الياهل
لكن البارحة صدمتني باتصالها المفاجئ تقولي ريلي عرس علي الاسبوع الي طااف وهي تصيح
تقولي والله انها تتحسب عليه وعلى امه في كل سجدة تقولي اقعد ربع ساعه وانا ساجده ادعي عليه وعلى امه الله ياخذ حقي منهم لانهم ظلموني وقهروني.. وانا بعيدة عن اهلي .. اتقول طلبت الطلاق ماتبا ترجع له .. لكن رفض انها يطلقها الا لما ترد له الذهب والخساير الي خسرها عليها ..ويعطيها الولد وهي رافضة تقولي لو ياخذون روحي والله مااعطيه ولدي بحرمه منه وهو يستاهل بصراحه مايستاهل يكون أب !
بذمتكم في ناس بها الشكل والله العظيم اليهود مابيسون سواتهم ..
انا نصحتها انها تكمل دراستها وتغير جو الحزن الي عايشة فيه ..
وتدور وظيفة قالت ابا مكان كله حريم ومب مختلط لانه ملتزمة وهالشي صعب الحين كل الوظايف اختلاط !

نصحوها شو تسوي وخففو عنها ترا ها بتقرا ردودكم كاملة ..

ويزاكم الله خير ..