شخباركم بنات عساكم بخير وسهالة ……. خواتي البارحة شفت ربيعتي من زمان كنت قاطعتنها مثل ما تعرفون الدنيا ومشاغلها ومشاكلها اللي ما تخلص …….. المهم بدخل بالموضوع اول شي بعطيكم نبذة عن حياة ربيعتي هي بنت عرست وهي صغيرة وعندها بنوتة آية من الجمال وزوجها شو اقول عنه كان مدمن كل انواع المخدرات الله لا يراويكم وهي من كثر ما كانت تركض وراه وتاخذ الحبوب والمخدرات عنه والله تقول انا صرت خبيرة في انواع المخدرات اعرفهم من اشكالهم واعرف اساميهم بعد وغير التفتيش اللي كانت كل يوم تدور وتحوط بالبيت علشان تطلع السم اللي يخشه زوجها عنها في البيت ما شاء الله ابدا ما كانت تتعب والله انها كانت مثل ظله وكل الناس كانوا يتعجبون على صبرها وقوتها ………ما شاء الله عليها ……. البارحة يوم شفتها كانت تضحك وتسولف وفرحانة ويبين عليها سعيدة الله يديم عليها السعادة عاد انا هني استغربت قلت خلني اتجرا واسالها …….. ويوم سالتها ما شاء الله يا فلانة فرحانة ويبين عليج الراحة عكس قبل حزينة ومهمومة جان تقول ريلي الله هداه وخلاص ودر شي اسمه مخدرات وصار يكره طاريه وبروحه وبدون مساعدة ودره……انا والله فرحتلها من قلبي وسكتت مدة بعدين قالت تعرفين والله انه الله رحيم والله انه رحيم ونزلت دمعة من عينها …..انا ما قلت شي قلت خلها تكمل لاني احس انها تبى تقول شي وكملت وقالت تعرفين يا فلانة انا كنت كل ليلة اقوم واصلي قيام الليل وواقرا القران وادعوا ربي انه يصبرني وانه يهدي زوجي ويودي عن قلبه السم اللي ياخذه وادعي وادعي لين ما ايني النوم وانا على السيادة وتميت على هالحالة وكل ليلة كنت اشوف رؤيا مو احلام لانها ما كانت تاخذ معاي الا دقايق واقوم من النوم وكانت رؤيا تبشر بالخير وتصبرني وكل ما اقول للشيخ كانت يتعجب ويقولي لا تخبرين حد بهالرؤيا وان شاء الله خير كانه رب العالمين يبشرني ويصبرني كنت احس باحساس غريب وكل يوم كنت ازيد اصرار اني اوقف جنب زوجي واساعده وما اتعب …. في ليلة من الليالي زوجي رجع من برع طبعا في كامل نشوة ادمانه ومو داري بالدنيا هل هو بالسما ولابالارض والله لو بتاخذينه وتقطعينه ما بيحس المهم انا سرت ونازعته وكنت اصيح والدموع ما توقف من عيوني وكل ما اطالع بنتي دموعي اخس تنزل شو ذنبها هالمسكينة ؟؟؟؟المهم مثل كل ليلة فرشت سيادتي وقمت اصلي والدموع ما توقف وكل ما اخلص من ركعتين واسلم ادعي ربي واناجيه انه يراف بحالي ويساعدني عاد تميت اقرا قران وباب الغرفة كان مسكر وظلام بس نور من برع خفيف وانا اقرا الا اشوف انه الغرفة قامت تنور وانا اشوف ومستغربة ومو مصدقة عيني وتابعت قلت خلني اشوف والله والله والله انه الغرفة نورت وانا لو كملت جان الغرفة نورت كاني مشغلة الليت عاد هني ياني خوف عجيب وشعر ينبي قام وقمت وفتحت الباب …….. حسيت بخوف وبفرح بنفس الوقت ما ادري ليش والله من بعد هالسالفة ما اشوف الا زوجي ربي هداه كيف وشلون ما اعرف وبروحه مستغرب على عمره يقولي وانا كنت اشفط السم حسيت بخنقه وغصة ياتني ما قدرت اكمل بعدها وقمت من مكاني وبعد ذاك اليوم وانا اكره شي اسمه مخدرات ……… وطول ما هي تخبرني بالسالفة ودموعها ما توقف وقالت شي دخل قلبي( ولا تقنطوا من رحمة الله) ………خواتي شوفوا هذا الا شي بسيط من رحمة رب العالمين علينا احنا غافلين ونروح ونطلب الرحمة من عباد الرحمن ……… ان كانت فلوس او حل مشكلة او مساعدة وغافلين عن رب العباد اللي لو رجعتيله وطلبتيه ما ردج ولا خيب ظنج بعكس الناس ……… اختي الحبيبة في الله انا ما ذكرت القصة الا علشان تاخذون العظة والعبرة وتستفيدون ارجو من الرحمن العلي القدير ان يهديكم ويهدي ازواجكم ويوسع عليكم ا بواب رزقه ويرزقكم بالزوج الصالح والذرية الصالحةللهم امييييييييييين
وادعولي بان الله يسهل اموري ويفتح لي ابواب رزقه ويهديني ويهدي زوجي اللهم اميييييييييين
والسموحة على الاطالة…………….