رسالــــــــه 2024.

أسم القسم ( العلاقات العائليه )

العلاقات اللي تخصكم مثل ( مساعده .. نصيحه .. أفكار .. مشاكل )

شي تستفيدن منه وشي تتعلمن منه والعكس تفيدن وتعلمن غيركن ..

بعض المواضيع اللي ينزلونها الخوات ( البعض هب الكل ) مالهن داعي وفي نفس الوقت

يحصلن أثم وبتعرفن شو الأثم ..

وهالأمثله اللي بحطهن لكم بعض مواضيع الحريم اللي مالهن داعي وخص في هالقسم

لا تفيد ولا يستفيد منهن حد ( بذكر سلبيات المواضيع )

الموضوع الأول

1 – سرت العياده ولا الجمعيه ويا ريلي وجفت وحده تطالع ريلي وماشلت عينها عنه حسبي الله عليها

التعليق :

تتحسبين على البنت ليش .. قولي في خاطرج الله يهديها ويصلح بالها صعبه ؟

يمكن البنت بدون قصد جافته ولا يمكن ذكرها بأنسان غالي فقدته أبوها أخوها خالها عمها ريلها..

يخلق من الشبه 40 .. ولا ايرادي الواحد بيطالع .. ربعتن ونزلتن الموضوع شو بنسوي نحن ؟

البنت جافت وشبعت شوف وتين تكتبين هنيه شو اللي بتغيرينه ترانا نطلع وانجوف هالمواقف ..

مثل هالموضوع الخوات شو بيستفيدن منه ؟ إنتي أنقهرتي هل نحن بننقهر وياج ولا بنحس بأحساسج ؟

الجواب : لا طبعاً لا هو بريلي ولا بريل وحده من الخوات ..

الموضوع الثاني

2 – سرت المول وجفت بنات الله لا يراويكن مترصصات بالليقنز ومطلعات الكشه وفوول ميك آب

وعباه مفتوحه ولا ضيجه ويطالعن هذا ويخزن هذيج ويسون ويسون..

التعليق :

جفتي وأنجوف سرتي وأنسير .. يتي وكتبتي الموضوع هل البنات بيحتشمن ومابيحطن ميك آب

وبيسكرن عبيهن عقب موضوعج فالمنتدى ؟ لا طبعاً دعـــن الخلــق للخالــق ..

اللي جفتيهن ظاهرات برضى أهاليهن وتراهم يجوفون شكل بناتهم كيف وراضين نحن شو لنا خص..

الموضوع الأخير والأهم

3 – زخيت ريلي يخوني ولقيت عنده تلفون ثاني ولا اكاونت فالفيس بوك ولا عالبلاكبيري سوالف الرياييل

ماتخلص إلـــخ … بنات الحرام وبنات الشوارع وبنات وبنات وبنات …و لعان وشعان ..

التعليق :

لعنتي البنت واللعن حراام .. ولو شو ماكانت البنت ترا اللعنه تصك سابع سما وترد عليج ..

والأهم والأثم اللي تحصلينه من كلمة ( بنت الحرام )

كيف طاوعج قلبج تقولين هالكلمه يا كبرها عند الله .. تعرفين شو معناة هالكلمه قبل ماتكتبينها ؟

تشبيه لأبناء الزنوه ( اللي ايبونهم بالحرام العلاقات المحرمه اللي هو الزناا )

يعني خليتي أمها وأبوها الطاهرين اللي يايبينها بالحلال وبالعلاقه الشرعيه زانيين !

بنت الشوارع .. مثلا الشارع حمل فيها 9 شهور وطلعها عالدنيا ؟

هب جنها كانت في بطن أمها وحملت فيها 9 شهور وتعبت عليها ..

هب حرام عليكن يا حريم ؟ على قهركن وحرقة قلوبكن تحصلن أثم واللعن يرد عليكن ..

تسبن البنات ليش ؟ حصلتي بنات عنده فالبلاكبيري من وين بيبن البن كود الا اذا هو عاطنهن اياه..

عرفتي إن عنده أكاونت فالفيس بوك وحاط صوره .. مثلا البنت بتسويله الأكاونت وبتحط صوره

وبتهديه الاكاونت ؟

لقيتي عنده تلفون ثاني وخاشنه فالسياره .. هل البنت هادتنه الرقم والتلفون عشان يكلمها ؟

حطن في بالكن إن الريال هو أساس هالعلوم كلها وبرضاه ولا تظلمن غيركن أظلمن رياييلكن وربعهم..

والشياطيين اللي في روسهم ..

أنقهرتي أستغفري وأطلبيلها الهدايه والله يصلح بالها .. هب تدعين عليها ..

وفالنهايه أدري إني طولت بس حبيت أكتب اللي في خاطري وفي أشيا ماكتبتها ..

أختي الفاضله :

كل كلمه تخطينها عن بنت جفتيها ورمستي عنها ولا عرفتي إن ريلج كلمها ورمستي عنها

أذكري

إنها غايبه بس ملائكتها حاضره ..