سؤال للمعلمات ضروري أبغي رايكم الله يخليكم بموت من الخوف 2024.

رجاء اللي بترد علي اتكون معلمة .. أبغي راي يريحني ..

زميلاتي المعلمات ..ما أعرف من وين أبدأ .. محد بيحس فيني إلا إنتوا .. مشكلتي أو يمكن مب مشكلة …. أبغي حد يطمني .. لاني وايد خايفة .. أبغي حد يقول لي هل أنا امكبرة السالفة من ولا شي ؟؟ هل أنا أسوس على الفاضي ؟؟ هل المفروض انسى الموضوع ولا أكبر السالفة وما أفتح على عمري باب ؟؟ أنا فعلا خايفة فكرة إتي على بالي وإتخوفني وفكرة اتريحني .. ياربي .. والله إني خايفة وايد ..

السالفة هي ..

بشهر 4 تقريبا أو قولوا 3 .. عقب زيارة التوجيه لي .. الموجه عقب الزيارةالتقييمية والأخيرة بإسبوع اتصل فيني وقال لي : شو رايج إتدرسين ثانوية ؟؟ أنا على طول رديت وقلت : لا ما أبغي ادرس ثانوي .. رفضت وبشدة بنفس الوقت .. جان الموجه قال لي : أعطيج فرصة أتفكرين ؟؟ قلت له : لا ما ابغي أنتقل مدرسة ثانية ولا ابغي أدرس ثانوية أنا مرتاحة بمدرستي .. وانتهت المكالمة وسكرت الخط

بس عقب المكالمة بدقايق اتصلت فيه مرة ثانية لاني خفت وايد قلت أحسن أأكد عليه إني ما أبغي أنتقل ولا أبغي ادرس ثانوي عشان يعرف إني ما أبغي .. مب يتصرف من نفسه وعقب أتفاجأ في الجرايد وأولول .. المهم عقب المكالمة بدقايق جان أتصل وقلت له : السلام عليكم حضرة الاستاذ فلان : أنا فعلا ما أبغي انتقل من مدرستي ولا أبغي أروح ثانوي انا مرتاحة بمدرستي.. جان يرد علي ويقول : أنا شاورتج بس وانتي مالج رغبة إتدرسين مرحلة أعلى خلاص .. وسكرت الخط

بس الشيطان تم يوسوس لي وتميت خايفة لاني صدق ما أثق فيهم أحس أحيانا لو طنشتي بيتصرفون على كيفهم وينقلونج فجائي لو حطوج براسهم.. انزين جان عقب المكالمتين بدقايق اطرش للموجه مسج .. نص المسج (أستاذ فلان أنا اسفة على الازعاج مرة ثانية .. بس للتأكيد أنا لازت خايفة .. رجاء لا تنقلوني ثانوي ولا تنقلوني مكان .. ابغي أتطمن .) جان الموجه يتصل هههههههههه انا وا يد حنانه ..
المهم جان يقول لي : المنطقة طلبت منا اسامي اللي تقاريرهم زينة ونحن نعطيهم .. خلاص أنا مسحت اسمج شطبت عليه .. اعتبري إني ما قلت لج ولا سألتج .. بس لو الإدارة نقلت أنا مب المسؤوول .. حاليا أنا مسحت اسمج وإنتي ان شاء الله ثابتة في مدرستج .. اعتربي اني ما قلت لج عن الثانوي .. بس لا اتقولين لحد ) وانتهت المكالمة ..

تدرون لين يومكم انا خايفة ومتوترة ..
هل أخبر المديرة إبالسالفة وأقول لها إني خايفة إني الموجة ينقلني للثانوي ؟ بس الموجة قال لي لا اتقولين لحد ..؟؟ وأخاف المديرة اتصعب عليه واتعصب وتكبر السالفة والموجه يحطني براسه ويعاند وينقلني ؟؟ يمكن هو صدق مسح اسمي ومحد ينقلني وعقب افتح على عمري باب أنا في غنى عنها ؟؟
هل أتصل في الموجه أحسن وأاكد عليه إني صدق ما ابغي انتقل وأسأله إذا أنا ثابتة بمدرستي أم لا ؟؟
ياربي والله إني تعبانة من التفكير من شهور وانا خايفة ..
هل اسكت عن الموضوع ؟؟ لاني امكبره الموضوع على الفاضي ؟؟ هل أسكت ولا اسوي مشاكل ؟؟
ياربي انزين اخاف اذا سكتت صدق أتفاجأ باسمي في التنقلات وعقبها صدق الموت ارحم لي من النقل ..

الله يخليكم خبروني .. طمنوني ..