سؤال محير ؟؟ يخص الحياة الزوجية 2024.

السلام عليكم ورحمة الله و بركاته

صباحكم الله بالخير والنور والسرور يا عزيزاتي الحلوات

بغيت أتناقش معاكم في موضوع مهم يخص كل زوجة ..

سؤال محيرني و ييت هنا ادور على الإجابه .. ؟؟؟

أول ما تملج البنت تكون هيه الحلم اللي ريلها ينتظره و تكون شاغله باله ليل ونهار و ياجل كل مشاويره وأعماله عشان خاطرها بس ..

و طول فتره الملجة هيه اللي تامر و تدلل و تدلع و طلباتها كلها مجابه

أول يوم العرس .. يوم منى عند الريال .. ..

يستمتعون بأجواء أيام العرس الأولى وشهر العسل و الحواطه و طول الوقت ما يبغي يفارقه ثواني ..

بعد ما تمر هذي الايام الحلوة ويستمتع كل واحد منهم فيها وخاصة الزوجة ( يا حليلها .. انتهت ايام الدلع )

تبدأ حياتها تدخل فالروتين و العوده للعمل و السهر مع الاصدقاء و النوم و غيرها من الاشياء اللي كانت مب راسمتنها الزوجة ( الفقيرة ) أنها بتأدي إلى تغيير جذري و نهايه لشيء اسمه ( انتي كل شي بحياتي و ما في شيء بيشغلني عنج فديتج ) مقوله الزوج ..

المهم ..

تقل الطلعات .. يقل الاهتمام لأنه في اشياء دخلت صح المذكورة فوق .. يقل الدلع .. لاحظوا اني قلت يقل مب يختفي تماما .. هذا معناته أنه موجود ..

و تبدا الزوجة كل ما مر شهر وراء شهر تحس انه في شيء بدأ ينقص و يقل .. ( السؤال .. ليييييش؟؟ )

و تبدا تدارك الموقف و تبتكر أشياء يديدة لتحاول قدر المستطاع إعادة النظر في حياتها التى بدأ الروتين يجتاحها ..

بس اللي شاغل بالي ليش الريال يتغير كل ما طالت المدة .. ؟؟؟؟

مع العلم لو نشوف شو الي تسوي الزوجة لزوجها من اهتمام و رعايه ..

تحاتيه
تحبه أكثر
ما تستغني عنه
تفكر فيه و في راحته طول الوقت
تحاول تسعده و ما تزعله
تتمنى يكون راضي عنها طول الوقت
تهتم فيه
تساعده
تراضيه
تسال عنه دايما
تبعد عنه ضغوطات ابحياة اليوميه
تتنازل عشان خاطره
تسمع كلامه
و غيره وغيره لو يلست أعدد ما بخلص و بياخذ عني صفحات المنتدى كلها ..

أما الزوج الحنون ..

يحبها ولكن بدون ما يبين
دايما مشغول لكن يلبي بعض الطلبات الضرورية
طالع .. و لكن يطلع زوجته متى ما حس هو بالملل
ما يسأل إلا إذا كان في شي ضروري
لاهي أحيانا
راقد لأنه تعبان
يسهر لأنه من زمان ما شاف ربعه مع العلم أنه كل يوم يشوفهم
و غيره من إلتزامات حياة الرجل اليومية

ودي و خاطري نرجع مثل قبل أيام العرس و الملجة ..

هذي مقوله أغلب الزوجات .. اللي ما مرت من حياتهم الزوجية غير شهور …

الله كريم هذي حال الدنيا .. بس المفروض يا زوجات نحاول نلاقي حل لهذي المشكلة ..

لأنه مرات تمر عليه أيام اتم أصيح و أصيح وهو مب موجود واقول وين أيام الدلع و كيف اقدر أرجعها مثل أول .. قبل كنت أيام الملجة أقوله أنا بسير أمشي على الحديقة و يقول يا ريت لو كنت أقدر أمشي وياج وامسك أيديج و نتمشى مع بعض أنتي حلالي ليش الناس ما يخلونا نمشي مع بعض …

و الحين أترجاه تعالى بنتمشى على نفس المكان اللي كان هو في يوم من الأيام يتمنى يمشي فيه معاي ..

خبروني … شو الحل ؟؟؟؟

خبرونا شو الحل؟؟؟
انا اعاني مثلج والله

أنا وياج مع كل حرف و كل كلمه كتبتيها يا الغاليه يعني الزوج يهتم بنفسه أكثر من أي شي ثاني سفر كل سنه و لا مره خذانا ويااه من غير جلساته كل يوم بالكوفي شووب و يلعب البليارد أو البوليج طبعا مع ربعه 000ألخ
يمكن تفكير الريال يختلف عن تفكير الحرمه بحكم التربيه و عاداتنا و تقاليدنا يعني لا تنسين ان الولد من صغير لين يكبر تكون عنده الحريه الكامله بس البنت في الأغلب من المدرسه الى البيت أو العكس وممنوع عليها أشياء واايد فيكون الريال حاط بباله أن الحرمه شغلتها البيت و تربية الأعيال و بس 000
حرااام و الله مظلومات ها الحريم الله يكوون بعوونهم و أنا أقول لو البنت تهتم بنفسها أكثر شوي يعني ما يكوون تفكيرها كله للزوج كيف أرضيه أو كيف أسعده 000 عيشوا حياتكم بالطول و العرض بعيد عن الضغوطات 00

حـــــــــال الدنيا تراني ملقوووفة ,,,,

راسلي العضوة بهلولة بتفيدج أكثر …..
وياريت تكتب اجابتها هني عشان لكل يستفيد لأن الموضوع واايد مهم …

اذكر كنا في محاضرة .. والمحاضر جاوب على سؤالج بالضبط ..

اذكر انه رسم قلب .. وقال ان ها قلب الريال .. وقت الملجة .. يكوون كل تفكيره منصب على حرمته .. ليش انها بعيدة عنه .. وما يقدر يحصلها اي وقت ..

لكن بعد العرس .. تبدأ المسؤولية .. ويبدا تفكير الريال يتوزع على اشيا وايد .. مثل شغله .. ربعه .. اهله .. مسؤولياته المادية .. عياله .. وكل شي كان متناسنه فترة الملجة ..

غير جي .. يعرف انه لو سوا اللي سواه طول اليوم .. بيرد البيت .. بيلاقي الحرمة في البيت تترياه.. فما بيتم يحاتي .. يعني تفكيره ما بيكون منحصر فيها ..

لكن المشاعر والمحبة هي هي .. مووجوودة ما راحت ..

يعني بعد العرس شي طبيعي ان الريال يتغير .. وكل اللي قلتيه عن حركاته عقب العرس صح .. لكن الحرمة بعد لها دور كبير انها تحد وتخفف من هالشي …

يعني .. اذا هي دايما تبي تطلع المكان اللي على مزاجها .. ولما تطلع ما تفتكر في شي غير وناستها .. ولما تصر تروح مشاوير مكلفة ترهق ميزانيته بدون ما تراعي .. ولما يعلى صوتها وتعصب لو استوى شي ما يعيبها .. اكييييييييد ان الريال ما بيتشجع انه يطلع وياها ..

لان الطلعة مع الربع تكون على كيف كيفه .. فهي لازم تحاول انها تخلي طلعته معاها حتى احلى من مشاويره مع ربعه ..

وانا طبعا بعد معاااااناااااه ههههههه .. تعودنا انا وريلي .. اذا طلع مع ربعه .. اخليه على راحته .. لكنه يعرف بديهيا انه لااازم يخصص لي يووم .. ولا تسألوني شكثر عانيت هههههههههههه

ولما اطلع .. اقوله بس بنتمشى في السيارة .. او بنروح الكورنيش .. يعني اماكن خفيفة بعيدة عن المولات .. لان في المول اكيد اني بنشغل عنه بالمحلات .. او مثلا السينما ..

واخلي العشا على مزاجه هوو .. وطول الوقت احاول اني افتح مواضيع اعرف انها تعيبه وتخليه في الجو ..

<<< هااا مثال كيف الحرمة تخلي الريال يحافظ على نفس مزاج ايام الملجة في الطلعات .. وصدقوني من تجربتي .. هالشي يخلي الريال بروحه يقول بنروح مشوار .. والا يشاورج جان فخاطرج مكان ..

ودمتن بوود

عليكم السلام والرحمة ..
غلاي ميمو ..موضوعج يضرب في الصميم والوتر الحسااااااااااس
الكل يعاني والكل يعاتب مثل ما يقولون الحظ عاثر وردي تراااه من البداية
الريال يبين على طبعه من البداية سواء كان عصبي دمه حار كلمته هيه اللي تمشي
اتصدقين في رياييل يوم تطلب منهم الحرمه انها تبا تطلع اويااااه اتغير جو ايرد عليها انتي كله تبين اوياي اوياي خليني اخذ راحتي خلينا نرتاح اشوي ..اللي ايقول الحرمه منكده عليه عيشته يوم انت مب قد العرس لا تعرس وتعذب بنت الناس اوياك البنت طايحه مستريحه في بيت اهلها اتيي لنار الريل لا حول الله بس الكل مب مرتاح في حيااااااااااته صدقيني الغاليه بعض الرياييل يوم تطلبين منهم شيء ايقولن لااااااااااااا ويوم شاف الحرمه بوزت قال يالله قومي بودييييج عاد الحين خلاص غيااض مب سايره … وهكذا الحاااااال من بعضو ..

الله يصلح ازواجنا يا رب