لو سمحتوا الي عندها طريقة عمل الباشميل مع الدياي ياريتها اتقولي الطريقه
المعكرونه مايبالها تقدرين تفترين فالقسم اكيد بتلقين
البشاميل انا اسويها اني اثور بالبطاطس وهو مقشر
عقب اقطعه عقب مايستوي مهروس
واحطه فالخلاط ويا حليب ابو قوس
واحطها على المعكرونه وارشها بجبن واحطها فالفرن وبس
بالعافيه
…. انا دوم اسوي هاي الطريقة اتمنى تعجبج..
المقادير:
معكورنة حلزوني أو عاديه صغيرة (كيس)
3 م ك ملح
2 م ك بزار
1 م ص كركم
1 م ص فلفل احمر
بصلتين وسط مفرومات و فصتين ثوم مهروسات و قرن فلفل اخضر اذا اتحبين الفلفل مفروم
4 م ك صلصة طماطم (العلالي) لذيذه مع البشاميل او المرطبان كامل يساوي 4 م ك
لحم مفروم او (دياي مفروم) على راحتج
بطاطا و بازيلا و جزر مقطعتنهم مكعبات صغيرة
1 بيضة
صلصه البشميل:
يا تاخذينها جاهزة من لاكنور .. لانها بتعذبج لين ما تضبط معاج .. او اذا انتي وحده تحبين التحدي و ناوية اتسوينها بالمقادير فهاي هي: 5 م ك دقيق – كوب ونص حليب كامل الدسم – ملح – فلفل اسود مطحون – 4 م ك جبن كاسات او 3 حبات كيري مطلعتنهم من ساعتين من الثلاجه عشان يذوبون بسرعه في الخلاط
و الطريقة كالتالي..
تفورين الماي عدل و اتحطين زيت و 3 م ملح و تطبخين المعكرونه
في جدر (فيه شوي زيت) تقلين البصل و لين ما يذبل شوي اتحطين فوقه الثوم و الفلفل و تقلينهم و اتحطين وياهم اللحم المفروم لين ما ينشف الماي وبعدين تضيفين الخضار و تقلينهم و شوي الملح و البزار و البهارات كلها و تخلطينهم و الاربع م ك من الصلصه اتحطينهم و تخلطين كل شي عدل و اذا حسيتي انه محتاج شوي ماي حطي م ك واحده و اخلطيهم لين ما ينشف الماي كله..و شيلي الخلطه و حطيها على طرف..
البشاميل: في جدر حطي الحليب و قبل ما يغلي حطي الدقيق و الملح و الفلفل الأسود و اخلطيه بالمشبك و طول ما انتي واقفه اخلطيه و بعدها حطي الجبن و اخلطي لين ما اتحسين ان الخليط صار كثيف شوي .. اذا صارت لج مشكلة التكتلات لا تحاتين افتحي الخلاط مال العصير و حطي البشاميل و اخلطي في الخلاط لين ما يصير سائل.. و صارت عندج خلطة البشاميل
الصينيه البايركس او التيفال على راحتج حطي كمية من المعكرونه و بعدين طبقة من الخلطة اللحم و بعدين معكرونه و بعدين البشاميل و ابشري فوقه شوي جبن (كرافت ، بس متزاريلا احلى ، خالاتي يحطون جبن سلايس و تطلع تحفه)انتي و على راحتج وبعدين هاتي البيضة و اكسريها و امسحي فيها على طبقة الجبن و حطيها في الفرن في الوسط على درجه 150 .. لين ما تستوي من فوق و يذوب الجبن …
و بالعافيه عليكم ..
اختج ليلي دبي
