شحالكم الغاليات؟؟
عساكم بصحة و عافية ..
بنتي في كي جي 1 في مدرسة الكمال.. و الحمدلله أشوف مستواها زين و الانجليزي عندها أوكي..
و مفكرة أخليها عندهم
بس…..كان عندهم "اليوم المفتوح" اليوم و سرت و ياها و شفت الأمهات هناك و زعلانات على مستوى عيالهم في المدرسة من نفس المرحلة ..يعني كذا أم تشتكي ..
ما أقول اقتنعت بكلامهم..لأن لكل واحد نظرته و خبرته بالموقف.. و لكن …بعد تأثرت خاصة بعد ذكر المواقف الموجودة من جانب المدرسة..مثلا:
– قالوا لنا عدد الطلاب في اكلاس الواحد ما يتجاوز ال20..و في كلاس بنتي 30 طالب
-شفت مرة ولية أمر تشتكي أن ولدها مضروب.. و ردهم انهم ما يقدرون يسيطرون على عدد الطلاب!!
– مرة عطوا بنتي دوا بدون ما يرجعون لي و يخبروني..و كلمتهم.. و عادوها!!
– مرة قصوا أظافر بنتي لدرجة تتألم فيها.. و كانت أول مرة ما أقص أظافرها.. و مب طوال ذاك الزود ..و من الأساس ما يخصهم!!.. و ينقلون الأمراض بين اليهال بهالمقص!!
– لما كلمتهم عن الدوا..و ليش يعطونها و يمكن أكون عطيتها في البيت و يمكن البنت تتحسس منه..قالوا أنهم اتصلوا كذا مرة للأم و الأبو..و محد يرد ..و للأسف ما في أي مس كول على تليفوناتنا..و مع اني تأكدت من أرقامنا عند السكرتارية..!! يعني يمكن ما في مصداقية!
و لـــــــــــــــــــــــكـــن:
-بنتي مستواها عندهم الحمدلله وايد أوكي ..و تقدر تفهم بالانجليزي -ماشالله- و تكوّن جمل بسيطة..تعرف حروف العربي و الانجليزي..و الأرقام تقدر تتعرف عليهم..تلوينها تحسن عندهم..و تحفظ السور القصيرة الحمدلله…بس لو حد سألني إذا مستوى المدرسة أوكي ولا لأ؟؟..بقول ما أعرف ..ما أقدر أقارن و ما عندي خلفية عن فعاليات و نظام المدارس الباقية..
– (أبلتهم ) فناانة ..أجنبية ..عانوا وياها اليهال في البداية ..ما يفهمون عليها..بس تعودوا و انجبروا يفهمون عليها.. تتكلم بشكل علمي.. و عن كيفية التعامل مع الأطفال..عيبتني..
-عندهم فعاليات و رحلات حلوة.. و كل خميس عندهم حفلة..أو فعاليات..
…..
شوروا عليّ..
فشو رايكم..أخليها و لا أنقلها؟؟
المكان له سلبياته مثل ما له ايجابياته..
و وين أنقلها..؟أبي مدرسة في الشارجة زينة و تعليمهم أوكي و يهتمون بالقرآن..فكرت بالابداع العلمي بس خلاص..راحت علي.. و كي جي 2 فل..
أن بستخير إن شالله,,
ماخاب من استخار.. و ما ندم من استشار..
اتصلت الرسالة ..و قالوا حاليا التسجيل لأهل اللي يدرسون عندهم..
انا عيالي فالرسالة ومرتاااااحه آخر راااحة… ساحتهم مغلقة وكشخة .. والكي جي قسمهم بروحهم يعني منفصلين عن المراحل الثانية…. مب باقي المدارس الصغارية عندهم يلعبون فالحر وحالتهم حالة..وفي الفسحة خلط بلط ويالكبار…
بس الكمال مادري شقايل انا ما ارتحتلهم…
بحاول و بتم وراهم مثل ما قلتي..
و الله ييسر..
المشكلة بعيدة شوي علي..
ما عليه..المهم عيالي و دراستهم..
مرسي..