اشحالكم بنات علومكم
اليوم عندي سالفة والسالفة هاي للاسف منتشرة بشكل كبير
وهي كالاتي
طبعا يوم تصير الخطبة تشوفون البنت واهلها كانهم ملوك من كثر طيبتهم ويبدا الحوار التالي
بنخلي اسم ابو البنت مثلا بو جاسم
واسم ابو المعرس بو سالم
ها مثال بس للناس اللي ما تخاف ربها
طبعا بوسالم زار بوجاسم وطلب منه يخطب بنته لولده
وقام بو جاسم ورحب باهل المعرس
طبعا اهل المعرس مايطوفون ناس كبارية ولهم سمعة الكل يحسدهم عليها
واهل المعرس سائلين عن اهل العروس وكم مهرهم بالعادة وطلع 80 الف
المهم يا وقت القصوص وقال ابو العروس والله خلو الزهبة عليكم حتى لو تجيبولها يونية
نحن مانهتم بهالاشياء اهم شي انا ناسبناكم
وطبعا ابو المعرس اعترض
المهم بالنهاية وافق ابو العروس على انه تكون الزهبة عليهم وطلب المهر ( فوق المية الف )
ما شالله عليه مايهتم بها الاشياء واضح
طبعا بوسالم قال حاضرين
واهل المعرس اللي هم الحريم زاروا اهل العروس
وماشالله عليهم بالطيبة والترحيب يعني اللي يشوفهم يقول مستحيل انحصل مثل هالناس من كثر الطيبة اللي عليهم ويوم سالوهم اهل المعرس عن حفلة الملجة قالو والله مايحتاي لا ملجة ولا عرس يعني لو تبون اتشلون العروس بوزار نحن ماعندنا مانع
طبعا اهل المعرس قالو لازم حفلة وحفلة كبيرة اللي يشوفها يقول عرس مب ملجة
وسووا الحفلة
وبدووا اهل العروس يظهرون على حقيقتهم
بطمعهم وجشعهم
بعد ما خلصت الملجة راحو اهل المعرس يدورون على صالة للعرس
وطبعا الريال ما عنده فلوس
فحجز صالة على قد الفلوس اللي عنده
يوم وصل الخبر لاهل العروس
والله نحن مانبا هالصالة مب حلوة
وساروا يسالون من ورى المعرس صالة ثانية لانها فخمة
طيب وين كلامكم اول شي
لوتبون اتشلون البنت بوزار نحن ماعندنا مانع حتى لو جدرين عيش اهم الشي الستر ويكفينا نسبكم
وين هالكلام كله راح
المهم تدجي العروس والله اعلم اذا كانت صادقة او جاذبة اونة انا مالي خص
الاهل هم اللي يبون جي
طبعا المعرس ماوافق عالصالة
لان ماعنده شي
وهو مابيمشي على راي اهلها وخصوصا ان وحدة من خواتها كله تبا تدخل بحياة اختها حتى بالملجة بغت تخرب عليها وكانت عفانالله مب فرحانه لاختها .. لانها كانت حارنه شوي وبتنطر يا كافي الشر
وطبعا المعرس بغا يطلقها بس تمت تصيح وحالتها لله
وقالها وحلف يمين اذا حد ادخل باهالسوالف تمي في بيت اهلج
حتى يبون يدخلون بالفرقة اونه لاتييب فرقة للحريم .. انزين هم شو دخلهم هاذا كله يخص الريال الحرمة اذا بتدخل بس بالكوشة ولون الصالة وزفتها مايخصها تدخل بالباجي
والله ان اختها كانت محطية لاختها العروس زفة مب باسمها باسم وحدة ثانية
والحين يبون يدخلون بالرقاصات
والصراحة المعرس ما مقصر على العروس بشي
مخلنها وحده فوق عن خواتها كلهم
من غير الهدايا والمفاجات اللي يسويها لها
يعني انا اقولكم اول ماتسيرون تخطبون عند ناس وقالولكم هالكلمة ( لو تبون تشلوها بوزار عادي ) على طول ارفضوهم
صارت هالكلمة اتخوف
والحين اهل العروس و اختها بالذات يالسة اتجرجها .. يعني ودها تطلق من كثر الغيرة اللي في قلبها وتبا تتحكم بكل شي .. حتى بالاشياء الخاصة
مع انه عندها خوات ثانيات معرسات ما تدخل فيهم
ليش يعني محطية دوبها بدوب المعرس
شو تبا هي بالضبط
منه
الكل مستغرب من هالشي
يعني الحين الصالة شلهم يدخلون باي وحدة المعرس بيحجز
وشو دخلهم بالفرقة اذا ياب ولا
هاي فرحة المفروض يفرحون مب يخربون على اختهم
والصراحة بنظري انا لو المعرس يطلق العروس دام انه بالبر ابرك
وخاصة انه اهلها يدخلون بكل شي
وهي كل محد كلمها انا مايخصني ليش مافيج لسان تردين عليهم
واتقولين محد يدخل فينا
ما تقدرين تردين وتقولين الريال ما عنده شي
وليش طمعانين فيه
قسم بالله مثل هالاشكال محد ياخذ منهم مول
من كثر نفاقهم ومكرهم ودغالتهم
بس كيف نفرق بين الطيب والخبيث ( علما ان اهل العروس سايرين العمرة كذا مرة ) خطر المرة الياية يوم يسيرون العمرة مايشوفون الكعبة من كثر المكر اللي فيهم
بس شو نقول
الله كريم
ومحد بياخذ غير نصيبة
هذا كله نفاق ومظاهر وكلام فارغ الناس طايحه فيه
كلن مسوي نفسه شي ومناك شي ثاني
المشاركة الأصلية كتبت بواسطة اذكروا الله 
لانه يبى يعرس ويكمل نص دينه وياليت يكون كلامج منطقي
اتوقع ماقريتي الموضوع عساس تعرفين محور الموضوع وين من الاساس
