السالفة صايرة يوم الاربعاء بس انا قلت لازم استشيركم بعد يا خواتي..
أنا ما داومت يوم الأثنين والثلاثاء لأني كنت محمومه وتعبانه ويوم الأحد على نهاية الدوام قلت لواحد من الموظفين المهندة أن يخبر المدير اني مريضة لأني ما ابغي أخبره واتصل واقوله لأنه وايد طفس وااايد يسأل المهم ثاني يوم اللي هو يوم الأثنين طبعا أنا ما داومت وهو معصب أونه ليش ما اتصلت فيه
وقاله الموظف أنها خبرتني واتخيلو قاله طرش رساله للموارد البشريه انها مب مداومه وما خبرت حد وهو قاله بس هي قالت قاله طرش ومع ان هذا مب شغلته تدرون لأنه بعد هو مب لين هناك في الانجليزي والموظفين يضحكون عليه لأنه دوم يقولهم اكتبولي وسوولي فوروورد، اليوم اللي عقبة يوم الثلاثاء أنا ما داومت بعد جان يتصل في الوالد مستانس عنده رقم أبويه قاله بنتك ما داومت وما خبرت حد خير شو في أنا طبعا عصبت وااايد قلت مب من حقه يتصل في ابويه قالي ابويه ليش ما خبرتيهم ابويه بعد على نياته قلت ابوي ماله داعي اتصل فيه انا عندي عذر وماخذة إجازة مرضية وأنا طبعا ما ابغي أتصل لأنه واحد مب محترم احرجني وايد لما اتصل في ابويه وانا مب ياهل ذكرني بأيام المدارس يوم المديرة تتصل في ولي الأمر ..
المهم من داومت يوم الأربعاء بديت بالشغل وعقب زقرني قالي ايلسي يلست قالي شو اللي سويتيه كأني مسويه جريمه ع فكره هو تافه يسوي شي من لا شي قلتله شو سويت قالي مب مداومة ليش ما اتصلتي قلت الغايب حجته معاه وانا كنت تعبانه قالي على الأقل طرشي مسج يعني يبغيني اطرشله مسج ع تيلفونه قلته والله يوم بداوم بقول شو عذري وقلتله ابصراحه ما كان له داعي انك تتصل في الوالد احرجتني مع اهلي جان يعصب قالي انتي مايخصج فهمتي مب انتي اللي تقوليلي شو أسوي وأنا جان أعصب وفولت حسيتبه رافع خشمه وقاعد يهيني قلتله لا يخصني وهو أبويه قالي وهو يصرخ يالله اطلعي برع و من باجر ما أداومين قلتله جيه بنك أبوك هو بداوم غصبا عليك طبعا شكله اتغير ع باله بخاف منه شرات القبليات اللي كانن يداومن وياه طلعت وأنا متضايقة موت سرت مكاني سرت مسحت كل اللي يخصني في الكمبيوتر ولميت اغراضي وهو طلع ومن رجع شافني جان يقول انتي بعدج هني قلتله وانا اصرخ عليه ما يخصك بطلع متى ما أبا أطلع فهمت وانت مب ريال والله لأفضحك وبتشوف طبعا هو افتضح لأن الموظفين سمعوا وانا اصرخ عليه وسار مكتبه وأنا لميت أغراضي وطبعا من شفت الموظفين عيوني دمعت قالولي يلسي سار واحد منهم اييب لي ماي حليلهم على فكرة هم هنود وفي منهم باكستانيين وايد محترمين لأنهم كانوا وايد اوكيه ويايه عاملوني مثل أختهم الصغيرة وما بغيت اخسرهم وفي نفس الوقت ما اقدر اشتغل ويا هذا الحقير وهم كلهم كارهينه كل حد يعرف سوالفه.
وطلعت واتصدقون متصل في ابويه وقايله بنتك قايله انها بتفضحني وتم يتصل فيه وايد قلتله ابوي لا ترد عليه هو شكله خايف عشان جذه حارق التيلفون قلتله ابوي هذا وقح وحاول انه يتحرش ابوي عصب قال ماعليه انا براويه بين الرياييل انا سرت الادارة وطبعا طول الطريق وانا أصيح من القهر منو يكون هو عشان يكلمني بهذي الطريقة واشتكيت عليه وتموا يهدوني لأني كنت معصبه وقالولي وايد مشتكين عليه قبل وهم بعد عارفين سوالفه وقالولي اكتبي رسالة شكوى للمدير العام طبعا انا كتبت وما قصرت وع فكرة هو غير معاملته لي لأني ما عطيته ويه حاول يتحرش بس انا صديته طبعا خبريتهم بالموضوع وقلتلهم ما ابغي ارد القسم لأني ما بغي اشوف رقعة ويهه وقلتلهم إذا ما خذيتوا حقي اخواني ما بيقصرون بيقطعونه من الظرب والا بعد وسائل الإعلام وايد بفضحه عندنا الانترنت والإذاعة والجرايد والمجلات استغربوا قالولي انتي قويه . وقابلت المدير العام وقالي نحن ما نسكت عن هذي الأمور بالذات اللي توصل للإهانة ومحاولة التحرش وانتي بتشتغلين اهني عندنا ونحن بنستدعيه باجر وقالي ما ابا الموضوع يطلع برع لأن نحن تهمنا سمعة البنك وسمعتكم قلت المهم تاخذون حقي قالي ولا يهمج .
بنات انا داومت يوم الخميس وشفته في الإدارة كان ياي لأنهم زاقرينه اتمنيت اني ما شفته جاستني غصة المهم كنت قاعدة في القسم اللي خلوني فيه وما عرفت شو قالوله لأن المدير العام قالي ما بنواجهكم بس يمكن ما سووله شي انا ما ابغي اسكت عن الموضوع ما اقدر اسكت تدرون قالولي ان ما في وحدة قدرت تستمر وياه في الدوام يقصدون مكاني وايد قبلي انتقلو وما تمو الا فتره قصير وانا بس ثلاث شهور في الدوام هذا وما استحملته والله حرام اللي بتيي من عقبي وهي ما تدري عنه اكيد بيلعوزها .
قولولي شو أسوي ابغي انتقم منه مب اللي قبلي سكتوا عنه لا انا ما بسكت بكسر خشمه عشان يعرف الدنيا مب فوضى يتعرض لبنات الناس المتربيات اللي ما يخاف ربه متزوج وابو عيال وهذي حركاته فيه قهر فضيع ما اعرف شو أسوي ..
ماشالله عليج زين سويتي مريت بموقف نفس موقفج المسؤول كان وايد اوكيه وياي ووايد يراعيني لين ما استوا شهر قالي ابا كلمج وبدا يتحرش ويوم قلتله لا بدى يغايظني واتغيرت معاملته لي واااايد وما ارتحت الا يوم انتقلت من عنده والحين ما اسويله سالفه ولا حتى سلام اسلم عليه
بس احسن شي اتسوينه انج تنتقلين من القسم وبس
المشاركة الأصلية كتبت بواسطة dxb baby 
ماشالله عليج زين سويتي مريت بموقف نفس موقفج المسؤول كان وايد اوكيه وياي ووايد يراعيني لين ما استوا شهر قالي ابا كلمج وبدا يتحرش ويوم قلتله لا بدى يغايظني واتغيرت معاملته لي واااايد وما ارتحت الا يوم انتقلت من عنده والحين ما اسويله سالفه ولا حتى سلام اسلم عليه
بس احسن شي اتسوينه انج تنتقلين من القسم وبس
بس هذا احقر واحد شفته في حياتي هذي أول وظيفه لي في حياتي وجيه يستوي فيني
بس زين سويييتيي ولا تسكتييين عنه لانه بيتماداا اكثر واكثر..البناات اللي قبلج سكتو عنه وعشان جييه كبر رااسه..خله يعرف انه في ناس اكبر عنه والله موجود وبيحاسبه على اللي يسوويه في بناات الناااس……شو هالاشكال اللي تلوع بالجبد
المشاركة الأصلية كتبت بواسطة miss elegant بتشوفين اكثر عن جي انا اول ما داومت استوت لي وايد مواقف وما كنت اعرف كيف اتصرف وكنت وايد على نياتي وكنت اتم اصيح واسكت
بس شوفي انتي هالمره عرفتي كيف اتوقفينه عند حده واللي سويته صح بس بعد في مرات لازم تنجبرين تسكتين وتتحملين وقد ما تقدرين طنشي ولا تبينين انج مضايجه من الشخص اللي يدامج خاصة لو كان مديرج والله يوفقج ياااارب