شو يعني " فتانة " ؟ 2024.

السلام عليكن و الرحمة . .

شحالكن الغاليات .. مبارك عليكن الشهر . .

خواتي .. ممكن حد يوضحلي .. المعنى الصحيح لـ " فتانة " . . ؟

يعني لم يقولون فلانة فتانة و فلانة فتانة . .!

أنا الي أعرفه أنه الفتانة هي الي تنشر الاشاعات أو تنقل الكلام بنية سيئة . .

هاذا الي اعرفه و الي تعملته .. !! المعنى صحيح ولا انا غلطانة و مب فاهمة الكلمة ؟!

وربي خواتي تعبت نفسيتي من كثر ما قالو عني فتانة فالمدرسة ..

أنا مب فتانة وربي يشهد . .

متى بدت هالرمسة تنتشر .. من كنت فالاعدادية ..

يقولكن .. الصف كله " غش " فالامتحان . . معاداي و كمن بنية . .

وربي انقهرت .. قلت حرااام الابلة تظلمنا بالدرجات ..

سرت خبرتها و انا مقهورة .. ما كانت نيتي أني أقلب الابلة عليهن .. أو انتقم ولا شي ..

بس أبغي أخذ حقي .. يعني أنا اذاكر و اتعب و هن ياخذن الدرجات بالساهل ؟ ؟ , ,

تحملت هالكلام منهن .. ما تم صف الا وقال عني فتانة و انا وربي يشهد مب فتااانة . .

اذا كان المعنى بنفس الي ذكرته فوق ..

اوكي مب مشكلة إذا هالكلام يا من بنات صفيه بتحمل ..

لكن إنه الرمسة تظهر من بنات ما يعرفني حتى ؟؟؟

الله يسلمكن .. ربيع اخوي . .

بالصدفة طلع يرمس وحدة من بنات المدرسة .. اكبر عنيه البنت ..

معاي فالباص .. بس لا ارمسها ولا ترمسني .. ما يخصني فيها .. ولا اعرفها ..

المهم .. سايرة الاخت و قايلتله ( ربيع اخوي ) اونه فلانة بنت فلان هاي فمدرستنا ..

فتانة خبرت الادارة انه نحن مهربين فونات و جذا ..

و انا والله يا بناات وربي يشهد ما خبرت و لا ادري بالموضوع حتى ..

قسمن بالله حسيت بغصة لم خبرنيي اخوي .. استحيييت منه .. احس به افتشل يدام ربيعه ..

وانا والله وربي يشهد اني ما خبرت و لا لي ايييد فالموضوع . .

أعرف البنات الي خبرن .. بس وربي يشهد ما يخصني ..

يعني نهاية السنة وصلني خبر انه فلانة و فلانة اشتكو عهالقروب و كذا .. والخ ..

المغزى من الموضوع ..

خواتي انا غلطانة ؟؟ غلطت بشي ؟؟ انا فتانة ؟ ولا اتوهم اني العكس ؟؟

والله المدارس قريب بتفتح و انا نفسيتي موول .. ماتحمل رمسة زيادة . .

كفاية كلام و كفاية اشاعات . . !! حسبي الله و نعم الوكيل ..

يعني لو بتحمل كلامهن و بقول خليج احسن منهن و طنشي ..

بس جزء مني مب مقتنع .. مب مرتاح .. من كمن سنة انا عهالموال ..

القصة تنعاد و الحركات و النغزات مكانها ،، ادريبكن بتقولن هن يغارن منج و جذا ..

ولا مقهورات و الخ .. ادري والله بس احس بخنقة ..

مابي أنتقل و أريحهن .. حالي من حالهن أبغي أدرس فالمدرسة الي تعيبني ..

يمكن السالفة بسيطة و ما تستاهل .. لكن محتاية كلام يهديني ..

السموحة طولت عليكن بس وربي من الغصة الي فيني ..

( أستغر الله العظيم )

شو أقولج….
المعني الي انتي كتبتيه صح الفتنه هو نقل الكلام وانج اتسوين مشاكل بنقلج هالكلام
بس انج خبرتي المدرسه على الغش انا ما اعتبرها فتنه بالعكس والله اعتبرها شجاعة منج وانج ما ترضين بالغلط

ما عليج من حد دام انج شايفه عمرج صح
وحاولي اتوقفينهم عند حدهم بس بالكلمة الطيبه
والسموحه

فديتج لا تزعلين ولا هم يحزنون خليهم يولون إنتي لا فتانه ولا شي والساكت عن الحق شيطان أخرس … أنا لو مكانج ما بعبرهم ولا بضايج نفسي عادي …. إضحكي وإستانسي حياتي ولا تكدرين خاطرج عشان غشاشات لووووووول… والله ذكرتيني بأيام المدرسة ….

تسلمين الغلا .. وربي قمت أشك بعمري قلت ليكون أنا فتانة . .
و أونه نيتي زينة !! الله يعيني بس ..
سلمتي مرة ثانية ..

الغالية .. وربي ياما طنشت .. وعادي عايشة حياتي ..
المشكلة انهن وراي وراي .. يعني يتعمدن يمرن الصف و يعقن نغزات ..
كم بتحمل مرة مرتين .. ثلاث .. بس مب سنة و سنتين عاد >< . .
والله انهن غشاشات شو بنقول هههه سلمتي غلاية عالطلة . .

والله انج مسوتلهن ساااااالفه

حقرييييهن الحقران يقطع المصراااان

وضحكي وسولفي عادي ماعليج منهم

تعرفين شو..غايظيهن زيادة وقوليلهن هي انا فتانة.. فتانة لاني اشوف الغلط وما اسكت عنه.. وانتن لو يايات تدرسن وتعلمتن شي مفيد جان عرفتن معنى كلمة فتانة بس فالحات تنقلن الرمسة وتسون اعماركن شي..نصكن غشاشات والنص الثاني غبيات

ولا غيري مدرستج اذا ترومين