هلاااااااااااا,, بنات شحالكن وشخباركن حبيباتي في خاطري اسوي صالونه دجاج بس ما اعرف الطريقه بالضبط,, في خاطري تكون ناشفه ومع خضار…
اتمنى المسااااااااااااااااعده منكن؟؟؟؟
قلي البصل وحطي اللومي اليابس (حسب الرغبة) وحطي الثوم والكزبرة وورق الغار وخليه لين يستوي البصل بني حطي قطع الدياي وسكري عليه يعني خليه ياخذ الطعم شوي وعقب حطي الخضرة (يزر وبطاطس وكوسا وباذنجان )وبعد سكري عليها شوي وعق حطي الطماط مع الملح لانه يساعده على الزوبان بسرعه وإذا حبيتي الصالونه غامجه وحامضه حطي قوطي صلصل وماي الصبار (التمر الهندي ) وأخر شي الماي وخليه على النار لين يتناقص الماي وتتمشبه ناشفه
نفس الطريقه اللي اسويها
وبقولج حسب المقادير اللي انا اسويها انتي عاد سوي حسب افراد اسرتج
اول شي نظفي الدياي وحطيه في طاسه وحطي فوقه البهارات
والبهارات اللي انا استخدمها
اخذ بزار عند حرمه الله يطول بعمرها يخلي الاكل روعه
المهم احط من البزار العربي نص ملعقه وقياس الملعقه مال الاكل هب الكبيره اللي ناكل فيها
المهم نرجع لمقاديرنا
وهي نص ملعقه بزار عربي
ونص ملعقه كركم
ونص ملعقه كاري وطرعا الكاري يخلي الاكل وايد روعه
ونص ملعقه كمون اللي هو السنوت
ونص ملعقه فلفل احمر حار
ودقين ثوم 5 فصوص وزنجبيل طازج مفي كمية الثوم
وفلفل اخضر حار يقارب 5 حبات ولاتكقرين حتى ماتصير الصالونه حاره وايد
وملح حسب الرغبه
الحين اخلطي كل المقادير هذي في طاسه مع الدياي وخلطيهم مع بعض
حتى الدياي يتبل فيهم ونخليه ع جنب
ونسير نحط البصل مع الزيت ع النار ونقلي البصل لين يحمر
ونحط عليه البطاط ونحركه شوي لين نحس البطاط سوي بدى يحمر
نحط عليه الخضره اللي نبغيه مثل الكوسي والقراع والجزر
ونحط عليهم الهال الحب وورق الغار
ونخلطهم مع بعض ونرشهم بالملح شويه ونص ملعقه كاري
ونغطيهم شويه لين ياخز الخضار لون الكاري نحط الدياي عليهم
ونحركه مع بعض ونغطيه شوي يقارب 10 دقايق
ونفتح الجدر ونحط الطماط ونص ملعقه صلصل ونسكر عليه لين يذوب الطماط
الحين ان بغيتي الصالونه وايد حطي ماي حسب رغبتج وان بغيتيها غليضه وقللي ان بغيتيها غليضه
الماي حطي كوب ماي بس وخلي الماي حار حتى ماتاخذ وقت الصالونه
في الاستوا
وخليها ع النار لين تشوفين الدياي نضج يعني ماياخذ وقت نص ساعه تكفيه وقطعي كزبره خضرا وحطيه ع الصالونه
وبندي ع طول من تحطين الكزبره
وهذي طريقتي في الصالونة الدياي
جربيها وصدقيني بتعجبج
والله يوفقج يااااالغلا ..