صالونة بااذنجان – يمي يمي 2024.

اليوم بقولكم كيف نسوي صالونة باذنجان لاني اموووووووووت في الباذنجان….. بقول لكم بالتفصيل واسمحولي لاني ما اعرف احطي صور خخخخخخخخخ

نبدأ………………………. بسم الله

المقادير:

بصل – ثوم مطحون او غير مطحون (انتي وكيفج) بس مطحون أحلى – كزبرة – حبة ماجي – طماط – فلفل أخضر حار – فلفل أحمر مطحون – معجون طماط – بطاط – بزار خاص حق صالونة (بهار خاص خذته من اخت العضوه بنت الطموح) بصراحه ريحة بزار روووووووعه وبهارات (هال – بزار + كمون + ملح) + اذا حابه تحطين حطي شوي مشروم بس مب لازم – واخر شي زيت مرات استخدم سمن احلى

الطريقة:

1. أول شي تقطعين باذنجان وبطاط وتحطينهم شوية بماي وملح عسب ما يطلع باذنجان لون أسود يوم يتقلى. وعقب تشخلين باذنجان عسب ما يكون فيه ماي..

2. قلي باذنجان في زيت أو سمن لين ما يستوي لون أصفر

3. وفي نفس زيت تحمرين البصل لين ما يتسوي لون أصفر بعد….وحطي باقي المكونات ما عدا بادنجان.. والمكونات هي:

1. تحطين ثوم

2. تحطين طماط وتخلينه شوي لين ما يذبل الطماط + حبة ماجي

3. عقب تحطين بطاط واذا حابه حطي شوية مشروم وياه..

4. حطي بهارات (بزار – فلفل أخضر – كزبرة + كمون + هال + فلفل أحمر شوي)

5. حطي معجون طماط وخلي دقيقتين..

6. الحين صبي شوية ماااااي فالصالونة مع ملح شوي لانج حطيتي بعد حبة ماجي بروحه مااالح خخخخ

7. حطي باذنجان وصبي ماي شوي بعد( على حسب كم تبون ماي عسب يكون صالونه)

8. خلي صالونة على نار هادئ لين ما ينشف ماي شوي…