——————————————————————————–
بسم الله الرحمن الرحيم
مابي ادخل بتفاصيل واسهاب لان الوالدين اكبر من الكلام والكل عارف مكانتهم بس ابي ارتب الافكار مرتبه عشان لاتملون وتقرون الموضوع كله سواء امك عايشه او متوفاه الله يرحمهم جميعا
انا بتكلم عن الام وانتو طبقو على الاثنين
1 فاجأيها بمغطس ماء دافيء حطي فيه ملح او خردل ودخليه عليها بدون مقدمات واحلفي عليها تسمحلك ودلكي اقدامها ترى كبيرات السن يرتاحون بهالعلاج لان رجولهم تعبانه حيييل
امي ماتوافق بس انا اسبقها واحلف عليها كانت تزعل بالبدايه لانها تحس اني اقلل من قيمتي يوم ادلك رجولها ماتدري ان الجنه بكبرها تحتها
2 تعالي يوم وامسكي المصحف وقولي ياالله ياامي اليوم ابي احفظك السوره الفلانيه وتكون من جزء عم لسهولته
ولاتتركينها الا حافظه لو على اجزاء مايخالف
3 قبل النوم بساعه مثلا قولي يمه ترى اليوم تسميع السوره الفلانيه جيبيها بدعابه عشان توافق وماتمل منك وكل ليله اقعديلها تسميع عشان منها تتحمس للحفظ ومنها تحس ان في بنت باره كل يوم متذكرتها
4 قبل ماتنام عطيها جوالها وركبي السماعه وقوليلها يمه ابيك تسمعين هالدعاء والا الذكر والا محاضره قصيره عاد انتي وذوقك بس حطيلها شي قصير وممتع لو فتاوي يكون افضل انا اسوي هالطريقه لان امي منفصله ولانها راعية تفكير قبل النوم فصرت اشغلها بشي الين تنام شسوي ذبحها التفكير ونجحت الفكره نجاح بااااهر
5 شوفي الحلويات الي تحبها وسوي زيها بدون دسم مثلا امي تحب الكيك بس الله يشفيها عندها كليسترول وضغط ودهون مرتفعه فصرت اسويلها كيكة الدخن بدون زيوت بس احط باكنج بودر وسكر وشوية منكهات وتطلع نفس الاصليه وتستانس حيل
واشتريت لها شوايه كهربائيه احط اكلها عليها فصارت تاكل كل الي نفسها فيها بدون زيوت وقلي
والله الشوايه تطلع البطاطس زي المقليه بس صحيه اكثر
6خصصي 10 دقايق مو ساعه وتعالي جنبها وسولفي معاها وتحملي مايجيك ولاتجادلين ترى الكبار يبون احد يسولف معهم الكل لاهي
7 اذا جات بتسير سويلها كيكه والا حلا تاخذه معها تستانس والله
8 افتحي كبتها ودخني ملابسها بدون ماتدري
9اذا عندكم مناسبه اهتمي فيها اول وحده ساعديها باللبس وعطريها وحطيلها روج خفيف حتى لو عجوزه عادي ان شاءالله الروج الي لونه شفاف وشفيها اذا دلعتي امك وحسستيها انها حلوه وزيها زي غيرها انا احط لامي بودره خفيفه واكحلها واحطلها روج زهري مايبان والله لو تشوفون الفرحه احسها تنبسط وتصير فرش فديتها
10 اياني واياك تروحين السوق وماتجيبين لها شي بيدك لو بعشره ريال المهم تذكريها انا اجيب لامي محفظه واحيانا شيله والله ماتكلفني مجايبها 20 و30 ريال بس اجرها عظيم
11 تصدقي عنها بالسر لو بريال انويه لها وبصحتها وطولة عمرها
12 اصبغي شيباتها هاذي اكبر هديه لامي يوم اقولها يمه ترى شريت صبغه عشان اصبغلك تفرح اذا شافت شعرها كله بلون واحد
13 اهتمي بمواعيد علاجها وشربيها الدوا بنفسك
اخيرا ياحسافه والله اني اشوف بعيني البنات لاهيات والام لحالها طول اليوم يابغرفتها والا بالمطبخ توسع صدرها بالشغل والكل لاهي وحاط راسه باللاب توب والبلاكبيري ليش يعني عشانها كبيره راحت عليها والا مابنفقدها الا اذا راحت وفضى مكانها وبنقول ياليت
الله يخليكم انشروها امهاتنا بحاجتنا وانا والله ماازكي نفسي بالعكس مقصره كثير واحاول اهتم وابرها بس وين ووين بس افضل من الاهمال الكلي
الي تستفيد من موضوعي ترفعه لها الاجر ان شاءالله
سيفتهاا عندي
ومشكورة اختي على هالافكار الرائعة
اللهم اجعل قبر أبي روضة من رياض الجنه ولا تجعله حفرة من حفر الناار
اللهم أطل في عمر أمي في طاعتك واغفر لها وارحمها برحمتك يا أرحم الراحمين
يزاج الله خير,,