من مدة تعرفت على وحدة أنسة .. جميلة وبنت عيلة في النادي الرياضي اللي انا مشتركة فيه ..
البنت روعة بكل المقاييس .. أدب – ثقافة – حسن معاملة -رقي ..
ما شفت منها الا كل خير .. وظلينا 4 شهور نعرف بعض ..
بعدين فجاءة انقطعت عن النادي وانا عندي تلفونها .. اتصلت اسال عنها ..
حسيت بصوتها مرار .. وتكلمت بصوت مليان حزن ..
طلبت انها ياتجي النادي يا تجي البيت عندي .. قالت مالها خلق تطلع من البيت ..
حسيت انها بمصيبة .. قلت لها عازمتك على الغدا بعد دوامك نتقابل ..
رحنا مطعم جميل بدبي .. وجلسنا ..
اصريت اعرف شو صاير .. قالت سالفتي طويلة .. قلت لها كلي اذان صاغية ….. فحكتها لي ..
قالت: ((( كنت مره طالعة من مكتبي بسير لمكتب مديري بالدوام لمحت شخص ..وسيم ..طويل.. جذاب …ملامحة رجولية..شعرت عيونة تخترقني .. درت ويهي عنه .. لكنة مستمر يطالعني ..
شعرت بشي يخترق قلبي .. نغزة قوية .. قوية .. دخلت بقلبي .. كانت عيونة جادة ونظراتة حادة .. أثرت فيني .. شعرت انها تخترقني ..خفت من نفسي .. صديت عنه .. لكنه اصر يعرفني بنفسه ..
قالي بثقة : انا فلان .. الاسم موب غريب عايلة مرموقة بدبي ومعرفين واثرياء ..
شعرت الاسم يتكرر براسي .. اعيد وازيد .. حتي ما انساه .. مستحيل انساه.. مستحيل انسي نظراته وعيونة …آه من نظراته …
استمريت اشوفة 3 ايام بعدين رمسني وقالي انه كثير معجب فيني وانه من زمان يشوفني باماكن متفرقة بمدينه دبي … مارديت .. استمر يلاحقني .. ويلف حولي .. وانا مو معطيته اي اشارة توحي اني ممكن اتجاوب معاه .. او اني ارمسة .. ولكن بالاخير .. وبعد محاولات استمر اكثر من شهر .. صرت لما اشوفة بالدوام .. اسال عنه وعن احوالة .. فيوم سالتة عن احوال المدام والاولاد .. قالي اما موب متزوج … طرت من الفرح .. حسيت بنصيبي قاعد يطاردني .. قالي (( يمكن بيوم اعرس )) أن شاء الله ..ظليت احلم فية ايام وليالي .. قلبي مشتاق له .. عيوني تدور عليه .. مره لمحتة بمول كبير .. حسيت اني بحلم جميل طويل مابي اصحي منه …تخيلتة ..صرت فرحانة .. او طايرة من الفرح ..
مره بالدوام دخل مكتبي .. وظل يتكلم معاي عني .. فسالته انت ترمس عني بس ما قلت لي شي عن نفسك .. قال انا انسان حياتي جدا عادية .. من العمل للبيت ومن البيت للعمل .. واحرص على الصلاة واحيانا اروح مع ربيعي كافيه.. حياتي جدا عادية .. وفي يوم حكي لي عن والدتة وكيف انها اروع انسانة عرفها وانه كل يوم بالليل لازم يشوفها قبل لا يرقد .. وظليت اتخيل نفسي معاهم .. واني زوجتة .. وكنت احلم واحلم واحلم ..
عشت بحلم .. كله حب .. وجمال .. وروعه .. كانت أحسيسي مشغولة فيه ..
لاول مره بحياتي اروح الدوام وانا طايرة من الفرح … انوم نفسي بدري علشان يجي بكره.. اصحي مع العصافير .. بس علشان اشوفة ..
البس احلي ماعندي .. اضحك بسبب وبدون سبب .. الا بتسامة ما تفارقني .. انجازي بالعمل مذهل .. نشاط وحماس وفرح وسرور..
وكنت اشوفة .. اكحل عيوني فيه .. اشم ريحتة قبل لا يتواجد .. رايحة مميزة .. عطر فتاك .. سحرني بكل المقاييس ..
وفي يوم جاني بوكية ورد للمكتب .. الورد هو راسلة لي…معاه رساله باللغة الانجليزية يقولي فيها
(( عزيزتي فيه شي بقوله لك .. انا متزوج .. الموضوع هذا من زمان ..عن نفسي ابيك ومتمسك فيك حتي النهاية .. لكن اذا انتي قررتي تتركيني فهذا اختيارتج وقرراج وانتي حرة فيه ..
وارجوك لا تناقشيني بالموضوع هذا ابد )))
شعرت بلحظتها ان الارض مادت تحت قدمي .. واني مو قادرة اوقف ولا اتحرك من هول الصدمة وقعدت اقراء بالرساله اكثر من ساعه حرف حرف وكلمة كلمة واعيد وازيد فيها …
يلست على الحال هذا 3 ايام .. بعدين شفته بالدوام .. ابتسمت بهدوء وسرت مكتبي وهو خلفي ..
قالي :I MISS YOU
قلت له: ليش ؟؟؟ ليش ما خبرتني من الأول ؟؟؟؟
قال : ماقدرت
قلت : على الاقل كان استمريت مخبي على ..
قال : انتي اطيب من اني اخبي عليك والمفروض انك تعرفين ..
وكان وجهه كلة إحاسيس وتعابير حزينة …
ظليت افكر بالموضوع …
ليه يبي يعرف وحده على مرته .. هل هدفة الزواج؟؟؟ ولا اللعب علي بنات الناس ؟؟؟
وظليت افكر بالموضوع اكثر من اسبوع وقلبي منشغل فيه .. مو قادرة اطردة من خيالي ..
أنام اشوف خيالة .. اصحي اشوف خيالة .. اسير الدوام مع خيالة .. ببالي ما طلع ..كرهت الاكل .. والشرب ..
ابي بس اشوفة ؟؟؟
وفي خلال هالفترة .. خطبني واحد عن طريق وحدة ربيعتي .. أنسان ممتاز .. وخلوق .. ومتزووووووووووج!!!!!!!!!!!!!!!!!!!!!!!!
وصرت اكرر كلمة متززززززززززوج باليوم اكثر من 100 مره ..
احب متزوج .. خاطبني متزوج … ))))
وخلصت سالفتها …
………………………………………..
وظلت تتكلم وانا استمع لها …
قصتها عورت قلبي … استمعت لحيرتها …
حسيت فيها … حسيت ان الرجل من حقة يقتحم حياة اي فتاة ويفرض نفسه.. حتي لومعاه كذبة .. او خيانة …حسيت بالآلمها … بصمت حروفها … بتنهيدة الم صادرة من قلبها ..
ماعرفت شو اقولها .. احترت ..
هل توافق على اللي خاطبها ؟؟؟ولا تستمر باحزانها ؟؟؟
هل تنتقم من اللي كذب عليها وعيشها بوهم ؟؟؟؟
هل تتزوج متزوج لمجرد انه خطبها ؟؟؟؟
او تعيد مشاعرها مع اللي حبته.؟؟ وتسامحة من مبداء كل الرجال يكذبون …وتحاول ترتبط فيه …
او تترك الاثنين ؟؟؟؟
وفضلت الصمت ..
ياريت تساعدوني .. اساعدها …
أنا حزينه علشانها …
وربي يسعدها ان شا الله
الافضل انها تستخير وربي يوفقها ويقدرلها اللي فيه الخير
تكون زوجته موافقه و لازم هي تكلم زوجته شخصيا و تعرف منها الاسباب مب بس من الولد
و اذا الاسباب مقنعه و الزوجه راضيه و اهله راضين و حست انها بتتوفق تصلي استخاره و تشووف
و اذا عذره سخيف و زوجته ماتعرف و عارضت و اهله مب موافقين و غيره اتمنى انها تنسحب و تفكر فالثاني
الي يا و خطبها و تسوي نفس الشي تسأل السبب الي يخليه يتزوج ع زوجته و تاخذ الاسباب منه و من زوجته
يعني من الطرفين و تسأل اهله و تسأل عنه و تصلي استخاره و انشاللله تتوفق فـ حياتهـآ
مغلوبين على امرنا
الريال يوم يبا يرتبط بوحدة ثانية فهالشي ربي حلله
بس فيه اساسيات الحرمة لازم تفهمها
والصراحه ماعندي خبرة وايد
توني صغيرونة
بس اتمنى ربي يرزقها انسان فيه كل الصفات اللي هي تتمناها
ويرزق كل بنت يارب
بس احس الاول اللى مجذب عليها عادي يجذب عليها بعد الزواج
والثاني انه متزوج امممم احسها صعبه واذا كان مطلق يكون اهون
في رايي انج تهدينها وان شاء الله يكون نصيبها احسن من هالاثنين اذا كانت هي صغيره تصبر وربي بعوضها
anoOna تسلمين على الرد .. بس اللي فهمته منها ان الاولاني اللي حبته ما طرحها معها موضوع زوجتة اطلاقا ولا تعرف اي معلومه عنها نهائيا ..
غرشوبة السمر شكرا لمداخلتك ..
فت فت تسلمين على ردك .. هي موب صغيرة عمرها حوالي 35 سنه ومنصبها زين بعملها (( كبير يعني)) وسبب عدم زواجها هو انشغالها بدراستها وعملها .. وهي موب من النوع اللي يرمس وعلاقات ..
بنت جادة وراقية جدا جدا ومهذبة … من البنات اللي تعجبين باخلاقهم ..