فضفضة: إنتقاء بعض النساء للألفاظ أمام البنات المتأخرات فالزواج 2024.

هلا يا بنات هذه مب مشكلة ولا أي شي مجرد بس حبيت إني أفضفض وأقولكم عن تعليقات بعض الحريم جدام البنات المتأخرات فالزواج وأنا منهم بس الحمدالله قمت حاليا أتجاهل هالسخافات لانه نصيب ومتوكله على الله، بس إن أحيانا يعقون الكلام بدون ما يحسبون له حساب وغيري ينجرح وبذكر البنات إن يحاولون ما يقولون بعض الكلمات اللي أنا أعتبرها جارحة:

أولا كلمة عانس أو عنوسة هاي ياريت ما تنقال أو نختار ألفاظ ثانية أحسن لان هالكلمة وايد تجرح وأصلا كلمه مب محترمة، ولازم نلغيها من قاموسنا، عشان اللي عندها خوات صغار أو يهال ما يتعلمونها وعقب يتمون يعقونها على أي بنت من أهلهم بالغلط.

ثانياً شوفوا هالقصة البايخة، أعرف حرمه كبيرة فالسن بس هي غير مواطنه كل ما تشوف أختي تقولها يا فلانه لين متى بتمين جذي حرام عليج يا فاطمة (مثال) لا تخلين نفسج جذي تزوجي محد بيتملج!!! يعني كيف هو بكيفي مثلاأنا أسير وأخطب وأييب لي الريال ليش وين إحنا عايشين فأمريكا؟ ليش ما يفهمون إن مب بيدنا هالشي. وبعدين موضوع شخصي جدا مب أي حد له الحق أنه يتكلم فيه.

ثالثا: تعليقات بعض اليهال السخيفة وياريت الحريم يعلمون بناتهم المراهقات قوم بو 13 و 14 ما يتدخلون فسوالف خواتهم ا لكبار أو عماتهم أو خالاتهم، مثال وحدة من هالبنات الصغار تقربلي وأنا كنت أيلس معاهم أسولف ونضحك عادي، قالت لي فجأه عمو إنتي ليش ما تعرسسين ما تنخطبين!!؟ فعلا ما حبيت سؤالها حسيبت به شي شخصي وعيب وحدة صغيرة تسأله بس أنا ما رديت عليها لاني تجاهلت السؤال وقلت لها هذا نصيب متى ماراد الله بيستوي.

وفي النهاية بس حبيت اشكركم لقراءتكم موضوعي وحبيت اشاركم فيه ودمتم بود.

عاد انا اتاثر بسرعه واحس اني اتحطم نفسيا بس يسالوني متزوجه ولا لا

احس الدموع اربع اربع او يضيج الصدر خص لاني كل خواتي اصغر عرسن ويابن العيال الا انا
عسب جي وااااااااااااايد اتحسس حتى لو سويت نفسي اني قويه ومطنشه ما اقدر

الله يرزقج بالزوج الطيب الصالح ويعوض صبري وصبرج باحسن الريايل يارب

وكل البنات المتاخرات ياااااااااارب اللهم عجل ولا تؤجل

إن شاء الله خير يا حبيبتي، صدقيني لو الزواج فيه خيرة لنا جان ربنا قدره لنا من زمان بس هو مأخرنه لسبب نحن ما نعرفه وربنا يعرف مصلحتنا أكثر منا نحن، مشكلتنا نتأثر بكلام الناس، تجاهلي نحن ما غلطنا في شي، من يقولولج شي قوليلهم بعده الله ما كتبه لي ويوم بيريد بإذن الله بيستوي.

اختي الله يهديهم الناس، نحن ما نقدر نغير سلوكيات او اسلوب الرمسة عندهم حرمة عودة او مراهقة سمعت من اهلها، بس مثال ردج عل البنت الصغيرة عين العقل ما شاء الله عليج، تدرين نحن عندنا بنات في العايلة ما شاء الله عليهم اللي مدرسة واللي وكيلة و اللي مديرة و ما عرسوا اللي محد خطبها و اللي ما يا الشخص المناسب عمرا او اخلاقا الى اخره، بصراحة انا احب ارشحهم اول شي قبل الاصغر لانهم هم الاولى و اتمن من كل وحدة في عايلتها شباب يبون يعرسن ترشح البنات الاكبر سنا مب تدور عل الصغار سبحان الله استوى نصيب و حلو البنات يخلصن و لاحقين عل الصغار وان شاء الله تتحقق امنياتكن كلكن

عيبني تفكيرج الراقي …
مثل ما قلتي كله نصيب وارادة رب العاليمن فوق اي شي
طنشي حبيبتي قوليلهم بعدني ما شبعت من العزوبيه ويوم يي النصيب ربج كريم..
موفقه غناتي والله يرزقج بالريل الصالح اللي يقدرج ويسعدج ..

صاااااااادقة