>>>فطاير سبانخ غير شكل <<< 2024.

صبحكم الله بالخير بنات ..
هذي أول مشاركة لي في هذا القسم .. اتمنى تتقبلون مشاركتي المتواضعه ..والسموحة على ردائة الصور ،، بحكم إني توني مبتدئة !!
.. بس أوعدكم يكون القادم أفضل بإذن الله

أحب أوجه تحية لجميع الخوات المتميزات في هذا القسم : فراشة دبي ، أم مهاري ، أم سعيد هند و بدون قصور في الجميــــــــع ..وماشالله على إبداعاتكم

اليوم حبيت انزل لكم طريقة فطاير السبانخ وايد لذيذة وسهلة وخفيفة ومغذية بعد
تقدرون تسوونها لعشا خفيف او غدا أو حتى الصبحية إذا صديقاتكم بيزورونكم

مرة ثانية أعتذر إذا كانت الصور مش واضحة .

نبدا مع المقادير :

– 2 باكيت عجينة البيف باستري ( أنا أفضل الحجم الصغير بس تقدرون تستخدمون الكبير عادي)
– باكيت صدور دجاج منزوع الجلد والعظم ، مسلوق مع ماجي +حبة هيل+ورقتين غار+ شوية ملح.ومفروم ناعم
– كيس سبانخ مجمدة مفروم.
-بصلة متوسطة مفرومة ناعم.
– جوزة الطيب مبشورة .
– كاس حليب المراعي.
-علبة صغيرة ويبنغ كريم .
– 2 ملعقة متوسطة جبنة كاسات.
-مكعب ماجي دجاج.

بعد ما تجهزين المقادير ،، تكونين محضرة القالب الي بتسوين فيه الفطيرة
أنا استخدمت قوالب التارت الصغار اللي لها قاعدة متحركة

تفردين العجينة داخلها وترتبينها بالضغط الخفيف على الجوانب وبذلك بتقطعين الاطراف وبواسطة الشوكة تسويين ثقوب في القاعدة

الحين تبتدين في تحضير الحشوة كالتالي:
أولا تحمرين البصل شوية

وعقب تضيفين له السبانخ وترشينها بشوية جوزة الطيب وتغطينها لمدة 5 دقايق على نار هادية

يتبع

ثم تضيفين عليه الدجاج و تحركينه

نضيفين عليهم الويبنغ كريم ثم الحليب مع التحريك

ثم مكعب الماجي وقليل جدا من الملح و البهار و جوزة الطيب

بعد ما تنضج عندج الخلطة ويذوب فيها الماجي توزعينها في القالب ،، أو القواب الصغيرة،، بالتساوي

تفردين البف باستري وتغطين به الويه

تدهنين الوجه بصفار بيض + نقطة خل و تزينين بطريقتج

و هاذي النتيجة النهائية :

السموحة ماقدرت أصورها في الصحون لأن قضو عليها
أتمنى تجربونها وصدقوني وايد بتعجبكم وبيدمنون عليها الصغار قبل الكبار ،، والكل بيسألج عن طريقتها
و ياريت تعلمونا بالنتايج ..

أنتظر رايكم ..لكم أطيب تحياتي
والسموحه على القصور