هذا فطورنا اليوم // طبعا انا كل يوم لي طبخة ،، ولوعت بجبدهم كثر ما اسويلهم معكرونة بالبشاميل ،،، وما شاء الله دومي اطبخ طبخات من القسم واطبق ^_* ،، بس هالمرة من افكارنا
…
وسامحوني ما صورت وايد لاني كل ما اسوي شي اقوووووول راحت عني الصورة ،، وفي اشيا نسيت اصورها ،،،،، بخيس كاميرتي :q ….
روبيان بالبهارات والبصل
المطلوب :
2 كيس روبيان مجمد وسط
نص حبة من الليمون الاصفر الكبير
كركم
فلفل اسود
ملح
2 بصل متوسط
الطريقة :
اول شي نيب الروبيان وانصب عليه ماي عشان الثلج يذووب عنه ،، من بعدها نعصر عليه الليمون ..
وانرش رشة كركم ورشة فلفل اسود وملح … وانتم نخلطهم ويا بعض طبعا هالاشيا كلها اتكونين حاطتنها في ملة …
عقب نبتدي بالطبخة … انصب شوية زيت في التاوه ( مقلاه ) لوول .. وانحط الروبيان ونجلبه شوي شوي لين ما يستوي لونه ذهبي ع الخفيف مب وااايد ..
عقب انحط شوية زبدة في بايركس ،، وانحط الروبيان فيه .. وانخليه شوية في الفرن لين ما اتحسين ان الروبيان اشوي انشوى …
ردي حطي شوية زيت في تاوه يديدة وحطي البصل .. خليه لين ما يحمر .. عقب حطي شوية ( ثوم وزنجبيل ) مدقوقين ويا بعض … بعدين ضيفي الروبيان ..
بس اجلبيه شوي .. وخلاص خلصت الاكلة عندنا …
صلصة الطمام
المطلوب :
3 بصل كبير
3 او 4 حبات طماطم
ملح
بهارات ( على حسب الاختيار )
فلفل اخضر
الطريقة :
اول شي انحط شوية زيت في الجدر ،، عقب انحط البصل … وانخليه لين ما يحمر انحط ( ثوم وزنجبيل ) مدقوقين ويا بعض ..
بعدين انحطر شوية بهارات ونخلط …
انحط الطماطم وانتم انجلبه شوي …. وانحط معجون طمام على حسب انتوا ما اتحطون ،، انا حطيت نص علبة من الصغار …
( نيب خلاطة انحط فيها 1 بصل و 3 او 4 طماطم ونخلطهم ويا بعض ) … بعدين نيب اللي خلطناه وانصبه ع البصل والطماطم اللي في الجدر ..
وانتم نخلط ،، وانحط فلفل اخضر بس طبعا اللي ما تبى الصلصة اتكون وايد حارة اتشل البذور من الفلفل واتقص الفلفل لقطع صغيرة ..
وانصب شوية ماي .. وانخلي الصلصة تنطبخ لمدة عشر لـ ربع ساعة … بتحسين ان الصلصة انطبخت واستوت غليظة …
وخلصنا …
طبعا الصلصة مطلوبة للروبيان ^_^ … ( طبعا لا تنسون العيش الابيض ) …
اكمل ..
سندويات دياي بالبشاميل ( من ايد اختي )
المطلوب :
2 دياي ( دياية كاملة او صدر اتفورينها )
خبر لبناتي من الكبار او ( خبر وقافي )
2 بصل
كركم
بهارات
فلفل اخضر
جبن موزريلا
الطريقة :
انفور الدياي بماي فيه كركم …. بعدين انخلي القطع صغيرة شرات الشوارما ….
انحط شوية زيت في الجدر … انحط البصل لين ما يحمر وعقب ( زنجبيل وثوم ) مدقوقين ويا بعض ….
وانحط البهارات ويا الملح والكركم … وعقب انحط الدياي … وانتم نخلط …
انخليه شوي لين ما اتحسون ان الاكلة استوت …
نيب خبر لبناني وانقص لمثلثات عشان النحط الدياي كحشوة وانلف الخبر ..
وانصفهم كلهم في بايركس … اول دفعة اتحطينها تحت
،، صبي فوقها صلصة البشاميل ..
وعقب ثاني دفعة بعد حطي صلصة بشاميل ،، بعدين حطي رشة جبن موزريلا …
ودخلي البايركس في الفرن ،،
لين ما اتحسين ان الصلصة استوت والسطح استوى باللون البني او الذهبي .. ( مب تحرقينه لوول )
اللي ما اتعرف كيف اتسوي صلصة الباشميل ..
المطلوب :
طحين
ملح
فلفل اسود
زبدة كاملة او زيت
حليب سائل ( مراعي احسن )
الطريقة :
انحط الزبدة في الجدر طبعا انحطها بكبرها عشان اتكون كمية وفيرة …
انخلي الزبدة تغلي شوي ،، من بعدها انحط الطحين بشكل تدريجي ونخلط بسرعة عشان ما اتخلي الطحين يتكتل …
طبعا اتحطين الطحين على حسب انتي ما اتشوفين جدامج يعني اشوف كوب طحين واحد يكفي …
ومن بعدها صبي حليب وبعد تمي اخلطي ،، لين ما اتحسين ان الخلطة غلظت بس مب وااايد غليظة ،، على حسب الغلط اللي انتي تبينه ..
رشي شوية فلفل اسود وملح .. واخلطي … وبس خلصت الصلصة ^_^ .. احلى عن الخلطات الزاهبة …
ني للسويت ،،، عاد انا ما كنت مسوتنه حقنا لوول مسوية حق الييران …
سنااااافر ( اسهل شي )
المطلوب :
2 قيمر سادة
1 بودة كريم كراميل ( الصفرا )
2 كيس دريب ويب
حليب سائل ( مراعي )
بسكوت بدون ملح
كيك الشاي ( مال اول اللي اييج جيه جنه اسفنج ^_* ما اتحصلينه كل مكان يا المخابز او جمعية الامارات )
ككاو فليك
الطريقة :
انحط في الخلاطة نص كوب حليب سائل او ثلاث ارباع الكوب يعني مب وايد ،، 2 قيمر و بودة كريم كراميل و 2 كيس دريب ويب ونخلطهم ويا بعض …
نيب بايركس ،، انصف اول طبقة اللي هي البسكوت وعقب انصب عليها شوية حليب بالخاشوقة مب صب صب من الخاطر لووول يعني لحد التشرب … وعقب نيب الكيك يا تنثرينه او اتقصينه
سلايس واتصفينه فوق البسكوت ،، عقب انحط طبقة من الخلطة اللي سوينها في الخلاطة ،،، عقب مرة ثانيه بسكوت وفوقه شوية حليب وفوقه كيك وعقب طبقة الخلطة ،، وانرش شوية
فليك من فوق للتزيين او قطع فراولة ،،
واندخل السنافر في الثلاجة لمدة 3 ساعات او اكثر عادي ،، وعقب بالهنا والشفاااا ^_* …
وان شاء الله عيبتكم التخبيصات ^_* ….
تسلم ايديكم
وأموووت في شي أسمه سنافر ربي يعطيج ألف عافية يارب
ما شاء الله