من أكثر من 8 شهور وأنا ودي أنزل قصة صديقتي، بس كل مرة أنشغل أو أنسى، لكن وبعد ما جفت مواضيع وايد خوات متزوجين من سنوات ومتضايقين ليش ما حملوا أو يتمنون الله يرزقهم بالعيال حسيت اني لازم أشارككم قصة صديقتي..
صديقتي المقربة عرست من 7 سنوات تقريباً واتأخر حملها والكل كان يسأل عن السبب، أنا بصراحة أنا ما كنت أسأل لأني أعتبرها من الخصوصيات وما ودي أحرجها أو أضايقها.. مرة كلمتني صديقة ثانية وقالتلي انها حلمت صديقتي الأولى انها حامل ويابت بنت وايد حلوة.. مادري شو اللي خلاني أقول الحلم حق صديقتي الأولى.. واتخيلوا يوم قلتلها فاجأتني ان كذا حد من عايلتهم حلموها حامل واللي حلمها عندها بيبي أو يايبه توأم، هذا كله في نفس الشهر!! فقالت بتسوي فحص الحمل وبتجوف.. المهم ما طافت فترة بسيطة إلا وتبشرني إنها
<< حامل >>
سبحان الله! بعد مرور أكثر من ست سنوات.. وبدون علاج (( لأنها وزوجها كانوا يراجعون وكان كل شي طبيعي وما فيهم شي)).. أنا بصراحة ذهلت!! وطرت من الفرحة =) !!
المهم قالتلي أنا بقولج سر حملي.. من بداية السنة اليديدة 2024/1 وصلت مرحلة تشبع من أسئلة الناس وتعليقاتهم اللي ما تخلص، وتعبت من العيادات اللي كنت أروحلها وما جفت أي فايدة.. قلت خلني مع السنة اليديدة أفتح صفحة يديدة.. فقررت اني أقرأ سورة البقرة كاملة يومياً مع قيام الليل والدعاااااااااااااااااااء.. وما أدراك ما الدعاء!! ذكرتني بمقولة: "سهام الليل لا تخطئ ولكن.. لها أمد وللأمد انقضاء".. وتقول إذا صار لي شي وانشغلت وما قدرت أكمل سورة البقرة.. مستحيل يطوف اليوم الثاني إلا وهي كملت قرايتها أول وبعدين تبداها من أول ويديد مرة ثانية..
وسبحان الله ما عدت الأسبوعين إلا وكذا حد من أهلها حلمها حامل.. تقولي كأنها رسايل من ربي اني أستمر في هالشي والله ما بيخذلني.. فاستمرت تقريباً شهر أو أكثر شوي ما أذكر بالضبط.. وما يتها الدورة مع انها ما تتأخر عندها.. فسوت فحص الدم وطلعت حامل.. قولوا ما شاء الله تبارك الله!!!
والله عوضها عن السنين اللي طافن ب(( توأم )) نوروا حياتها.. لأنها ما نست ربها فربها ما نساها.. والكل يتحراها ماخذة علاج أو إبر لأنها يابت توأم بعد هالفترة.. وهي تحلف انها ما خذت شي.. وعشان تعرفون كيف الله رحيم بعباده ويسمع تضرعهم ودعائهم بس لازم نبادر ونوكل أمرنا لله وندعي ونحن موقنين ان الله بيستجيب ولو بعد حين..
والله يرزق الجميع الذرية الصالحة ويعينا على حسن تربيتهم =)
و الله يرزقني و يرزق كل اخواتي في الله الذرية الصالحة
المشاركة الأصلية كتبت بواسطة الجنة طموحي 
و الله يرزقني و يرزق كل اخواتي في الله الذرية الصالحة
آمين يا رب.. نورتي الموضوع =)
صبرت ونالت ….
بارك اللخ فيج ختيه عالطرح الطيب والله يرزق كل محروم ومحرووومه يااارب ..
بنات نحن في زمن كثرت فيه البلاوي من حسد وسحر والله يجيرنا من هالاشياء
ووايد حريم مايومنون بهالشي
هي صح قدرة الله ونصيب
بس شو بيضر الوحدة لو تسمع الرقيه وتقرا البقره يوميا
وربي يرزق كل محرومه يارب
وانتبهوا من الخدم سحرهن ممعاهن في شنطهن بالذات الاندونيسيات